काठमाडौं- सत्तारुढ नेपाल कम्युनिस्ट पार्टी (नेकपा) को स्थायी कमिटी बैठक बस्दैछ। दिउँसो १ बजेका लागि बोलाइएको बैठक साढे १ सम्म बस्न सकेको छैन।
पार्टीको महत्त्वपूर्ण बैठकअघि सरकारले चालेको कदमलाई नेकपाका नेताहरुले नै आलोचना गरेका छन्। प्रवक्ता समेत रहेका सचिवालय सदस्य नारायणकाजी श्रेष्ठले प्रतिगामी कदम भनेका छन्।
आज प्रधानमन्त्री श्री के पी शर्मा ओलीले संघीय प्रतिनिधिसभा विघटन गर्न गर्नुभएको सिफारिस गैरसंवैधानिक, अलोकतान्त्रिक, निरंकुश र परिवर्तनविरोधी प्रतिगामी कदम हो। यो लागू हुन सक्दैन। यसको विरुद्ध संघीय लोकतान्त्रिक गणतन्त्र, लोकतन्त्र एवं परिवर्तनका पक्षधर सम्पूर्ण शक्तिहरु एक होऔं’, श्रेष्ठले ट्विटमार्फत धारणा सार्वजनिक गरेका छन्।
त्यस्तै, स्थायी कमिटी सदस्य जनार्दन शर्माले केपी ओलीले संघीय लोकतान्त्रिक गणतन्त्रको उपलब्धि अपहरण गरेको बताएका छन्। ‘केपी ओलीले फेरि हाम्रो एक मात्र उपलब्धि नयाँ संघीय लोकतान्त्रिक गणतन्त्र नेपालको संविधानको अपहरण गरेका छन। यसको रक्षाका लागि सबै तयार होऔं’, उनले पनि ट्विटरमार्फत आफ्नो धारणा सार्वजनिक गरेका छन्।
ओलीमाथि अनुशासन कारबाही होला?
प्रधानमन्त्री केपी शर्मा ओलीले पार्टीको निर्णय उल्लंघन गर्दै आएको आरोप पार्टीभित्रै लागिरहेको छ। पछिल्लो विवादको सूत्रपात पनि त्यही आरोपबाट भएको थियो।
तर, ओलीको कार्यशैलीले संसद विघटन नगर्लान् भन्ने नदेखिए पनि गरिहाल्लान् भन्नेमा चाहिँ पार्टीकै नेताहरुलाई पनि लागेको थिएन। तर, आइतबार बसेको मन्त्रिपरिषद् बैठकले अचानक संसद विघटन गर्ने निर्णय गर्यो।
आजको स्थायी कमिटी बैठकमा यो कदमबारे छलफल हुने प्रवक्ता श्रेष्ठले बताए।
‘आजै बस्ने स्थायी कमिटीको बैठकमा विशेष एजेन्डा बनाएर छलफल गरेर आवश्यक निर्णय लिन्छौं’, उनले भने।
श्रेष्ठले संकेत गरेको ‘आवश्यक निर्णय’ मा ओलीमाथि गरिने कुनै किसिमको कारबाही हुनसक्छ। उनलाई पार्टीको निर्णय पटकपटक उल्लंघन गरेको र संसद नै विघटन गर्ने अलोकतान्त्रिक कदम चालिएकोमा पार्टीले कारबाही गर्ने आकलन गरिएको छ।
बैठकमा प्रधानमन्त्रीमाथि अनुशासनको प्रश्न उठ्न सक्ने एक नेताले बताए ।
ओलीमाथि कुनै पनि खालको निर्णय लिन नेकपाका पार्टी कमिटीलाई कठिन छैन। किनकि, अहिले ओलीविरुद्धको मोर्चामा रहेका पुष्पकमल दाहाल प्रचण्ड र माधव नेपाल समूहसँग सबै कमिटीहरुमा बहुमत छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1767836232.jpg){kind=logo}
-1764146706.png)
