काठमाडौं- नेकपा उपाध्यक्ष वामदेव गौतम पक्षको भेलाले पार्टी अध्यक्ष केपी शर्मा ओली अर्का अध्यक्ष पुष्पकमल दाहाल‘प्रचण्ड’ सहित वरिष्ठ नेता माधवकुमार नेपालले समेत प्रस्ताव गरेमात्रै अध्यक्ष पद स्वीकार गर्ने निष्कर्ष निकालेको छ। शनिबार प्रचण्ड निवास खुमलटारमा भएको छलफलमा ओलीले गौतमलाई पार्टी अध्यक्षको प्रस्ताव गरेपछि गौतम पक्षको भेलाले ओलीबाट मात्रै आए सहर्ष स्वीकार नगर्ने निष्कर्ष निकालेको हो।
शनिबारको अध्यक्ष प्रचण्डसहित गौतमसमेत सहभागी भएको छलफलमा ओलीले गौतमलाई अध्यक्षको प्रस्ताव गरेका थिए। ओलीले पार्टीमा गौतमलाई अध्यक्षको प्रस्ताव गरेपछि गौतमले आफ्नो पक्षका नेताहरुलाई बोलाएर छलफल गरेका हुन्। काठमाडौमा उपलब्ध ९ केन्द्रीय सदस्य र सांसदहरुलाई बोलाएर गौतमले भैँसेपाटीमा छलफल गरेको गौतम निकट केन्द्रीय सदस्य हरिप्रसाद गौतम पराजुलीले बताए।
दिउँसो २ बजेतिर भएको भेलामा गौतम सहित १५ जना सहभागी भएका थिए। ‘केपी कमरेडले पार्टी अध्यक्षको प्रस्ताव गरेपछि वामदेव कमरेडले काठमाडौंमा उपलब्ध नेताहरू भैँसेपाटीमा बोलाउनुभएको थियो‚’ पराजुलीले भने, ‘हामीले पार्टीमा अन्तरविरोध छ भएकाले यस्तो अवस्थामा केपी कमरेडले मात्रै प्रस्ताव गरेर हुँदैन‚ प्रचण्ड र माधव कमरेडले पनि प्रस्ताव गरेमा मात्र सोच्न सकिन्छ भन्ने सुझाव दियौँ।’
पार्टीमा अन्तरविरोध चर्किएकाले केपी कमरेडले मात्रै अध्यक्षको प्रस्ताव गरेर मात्रै स्वीकार गर्न नसकिने भेलामा सहभागी नेताहरुले सुझाव दिएका छन्।
‘पार्टीमा अन्तरविरोध चर्किसकेको छ । माधव कमरेड र प्रचण्ड कमरेडबाट पनि अध्यक्षको प्रस्ताव आउनुपर्यो। त्योपनि तीनै जनाको सामूहिक प्रस्ताव आउँनुपर्यो‚’ पराजुलीले भने, ‘पार्टीमा अहिले दुई अध्यक्षको सहमतिमा भन्ने छ। अहिलेको परिस्थितिमा तीन नेताको सहमतिमा अध्यक्षको प्रस्ताव आउँनुपर्यो भन्ने निष्कर्ष छ।’ अध्यक्ष केपी शर्मा ओलीबाट अध्यक्षको पद प्रस्ताव गर्नुलाई सकारात्मक रुपमा लिनुपर्ने भेलाले निष्कर्ष निकालेको छ।
‘पार्टीमा एक व्यक्ति एक पद लागू गर्नेपर्नेछ। यस्तो अवस्थामा वामदेव कमरेडलाई पार्टी अध्यक्ष दिँदा उचित हुन्छ‚’ भेलामा सहभागी पराजुलीले भने, ‘माधव कमरेड १५ वर्ष महासचिव भइसक्नुभयो। प्रचण्डजी पनि ३० वर्षभन्दा धेरै पार्टी नेतृत्वमा हुनुभयो। अहिले पनि पार्टी अध्यक्ष हुनुहुन्छ। केपी कमरेड पनि अध्यक्ष भइसक्नुभयो।’
यसअघि वैशाख १७ गते सचिवालय बैठकमा ओलीले गौतमलाई प्रधानमन्त्रीको प्रस्ताव गरेपछि गौतमले आफूनिकट नेताहरुलाई बोलाएर छलफल गरेका थिए।
आफू निकट नेताहरुसँगको भेलामा गौतमले प्रधानमन्त्रीको प्रस्ताव आउँछ भन्ने आफूले सपनामा समेत नचिताएको बताएका थिए। त्यसलगतै गौतमले राष्ट्रिय सभाबाट प्रधानमन्त्री बन्न सकिने/नसकिने भन्ने विषयमा समेत कानुनी परामर्श गरेका थिए। ओलीले यसअघि पनि गौतमलाई आफ्नो पक्षमा पार्न प्रधानमन्त्रीको पासा फालेका थिए। त्यसपछि गौतम प्रचण्ड-नेपाल कित्ता परिवर्तन गरेर ओलीतर नजिकिएपछि ओली बलियो भएका थिए।
फेरि पार्टीमा अप्ठ्यारो परेपछि ओलीले गौतमलाई पार्टी अध्यक्ष पदको पासा फालेका छन्। अध्यक्षको पासा फालेर ओलीले गौतमलाई फेरि आफ्नो पक्षमा पार्न खोजेका छन्। तर, यसपटक प्रस्तावलाई भने गौतम निकट नेताहरुले भने रणनीतिक चालवाजी भएको भन्दै ओलीबाट मात्रै आएको प्रस्तावमात्रै स्वीकार गर्न नसकिने सुझाव दिएका छन्। यदि अध्यक्ष पद नै दिने भए ओली‚ प्रचण्ड र नेपाल तीनै जनाबाट प्रस्ताव आएमात्रै स्वीकार गर्न सकिने सुझाव उनीहरूले दिएका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778036869.gif)
-1764146706.png)
