काठमाडौं- शनिबार बिहान अकस्मात् प्रधानमन्त्री तथा नेकपा अध्यक्ष केपी शर्मा ओली कार्यकारी अध्यक्ष पुष्पकमल दाहाल प्रचण्ड निवास खुमलटारमा पाहुना लाग्न पुगे। अध्यक्षद्वयबीचका हरेक भेट बालुवाटारमै भइरहेको समयमा ओलीले बाहिर कदम राख्नुका अनेक राजनीतिक अर्थ छन्। त्यसमध्ये सिधा देखिने र बुझिने अर्थ छ, पछिल्लो समय पार्टीमा रहेको शक्ति संघर्षमा ओली पहिलभन्दा कमजोर हुँदै गएका छन्। उनकै कदम र निर्णयले उनलाई अप्ठ्यारोमा ठाउँमा ल्याइपुर्याएको छ। त्यो परिस्थिति बदल्न कोसिस गरेका हुन्।
अर्को उनले आफू अझै 'अखडा'मा रहन शारीरिक रूपमा पनि कमजोर नरहेको सन्देश प्रवाह गरेका छन्। भोलिका दिनमा पार्टी तलमाथि भइहालेको अवस्थामा 'मैले प्रयास गरेको थिएँ' भन्ने बाटो पनि राखेका छन्। आम कार्यकर्तामाझ आफू पार्टीको पछिल्लो अवस्थाका विषयमा गम्भीर रहेको सन्देश प्रवाह गरेका छन्।
आइतबार तय भएको स्थायी कमिटी बैठकअघि उनी राजनीतिक मैदानमा खाली हात उत्रिएका भने होइनन्। ओलीले भन्दै आएको नयाँ पुस्तालाई नेतृत्व हस्तान्तरणको कार्ड उपाध्यक्ष वामदेव गौतमसँग खेलेका छन्।
गत मंसिरमा आफ्नो निवास भैंसेपाटीमा भेला बोलाएर सचिवालयमा ओलीलाई कमजोर बनाएका गौतम त्यही कार्डका कारण दुई अध्यक्षको खुमलटार भेटवार्ताका साक्षी बने। उनलाई पार्टी अध्यक्ष दिने लालसा देखाएर उक्त भेटको सहजकर्ता बनाइएको आँकलन नेकपावृत्तमा छ। यद्यपि उनले यस विषयमा मुख खोलिसकेका छैनन्।
ओली-प्रचण्ड भेटपछि ओलीले नै गौतमलाई खुमलटार बोलाएका थिए। तीन नेताबीचको छलफलमा प्रचण्डको प्रतिवेदन फिर्ता गर्ने विषयमै पुनः छलफल भएको थियो। खुमलटारको तीन नेताबीचको छलफलमा ओलीले गौतमलाई पार्टीको नेतृत्व दिनुपर्ने बताएको प्रचण्ड निकट एक स्थायी कमिटी सदस्यले बताए।
शनिबार प्रचण्डपछि उनले सचिवालय सदस्यसमेत रहेका गृहमन्त्री रामबहादुर थापालाई समेत भेटे। अरु दुई आफूनिकट मन्त्री पनि। उनीहरुसँगको भेटको अर्थ शनिबारको सक्रियताको संख्या बढाउनुभन्दा महत्वपूर्ण भने देखिँदैन। तर शनिबार बेलुकी राष्ट्रपति निवास बालुवाटार पुग्नुको भने अर्थ छ।
शनिबार नै ओलीले प्रचण्डलाई भेट्नुको कारण आइतबार निर्धारित स्थायी कमिटी बैठक हो। जहाँ दुवै अध्यक्षका प्रतिवेदन छन्। त्यसमाथि छलफल थालिने सम्भावना छ। प्रधानमन्त्री ओलीले प्रचण्डको प्रतिवेदन आरोपपत्र भनेका छन्। फिर्ता नलिए बैठकमा नआउने नीति कायम छ। यही बीचमा प्रधानमन्त्री ओलीले अध्यादेश ल्याएका कारण प्रचण्ड कुनै हालतमा उक्त प्रस्ताव फिर्ता लिने पक्षमा छैनन्। अध्यक्ष ओलीको अनुपस्थितमा समेत उक्त प्रस्तावमा छलफल हुन सक्छ। बहुमत स्थायी कमिटी सदस्य प्रचण्ड-माधव समूहका रहेकाले पास हुन सक्ने सम्भावना छ।
ओलीले प्रचण्डलाई खुमलटारमा भेटेर उक्त प्रतिवेदन फिर्ता लिन आग्रह गरेको प्रचण्डका प्रेस संयोजक विष्णु सापकोटा जुगल बताउँछन्। उनी भन्छन्, ‘दुई अध्यक्षवीचको भेटमा ओली कमरेडले प्रचण्ड कमरेडलाई आफनो प्रतिवेदन फिर्ता लिनुस् भन्नुभयो। प्रचण्ड कमरेडले मान्नुभएन।’
नेकपा स्थायी कमिटी सदस्य देवेन्द्र पौडेल केपी ओली र प्रचण्डबीच पार्टी विवादका विषयमा एक घण्टा भन्दा धेरै छलफल भएको बताउँछन्। पार्टीमा जारी विवाद समाधानका लागि प्रचण्डलाई आफ्नो प्रतिवेदन फिर्ता लिन ओलीले आग्रह गरेको उनले पनि बताए। पौडेलले भने, ‘प्रचण्ड कमरेडले पार्टी कमिटीमा पेश भइसकेको विषय फिर्ता गर्नु राम्रो हुँदैन । दुबै अध्यक्षको प्रतिवेदनका विषयमा बैठकमा छलफल गरौं। त्यहीँबाट निकास निकालौँ भन्नुभएछ।’
प्रचण्डले ओलीलाई संवैधानिक परिषद् सम्बन्धी अध्यादेश फिर्ता लिने प्रक्रिया थाल्न अध्यक्ष ओलीलाई आग्रह गरेको बताइएको छ। आइतबारको स्थायी कमिटी बैठकअघि नै अध्यादेश फिर्ताको प्रक्रिया थाल्नु उपयुक्त हुने राय प्रचण्डको रहेको थियो।
बेलुकी राष्ट्रपति विद्यादेवी भण्डारीलाई भेट्न ओली शीतल निवास पुग्नुको कारण अध्यादेशका विषयमा छलफल गर्नु रहेको बुझाइ राजनीतिक वृत्तमा छ। प्रधानमन्त्रीका प्रेस सल्लाहकार सूर्य थापाले भने राष्ट्रपति र प्रधानमन्त्रीबीचको छलफलको विषय आफूलाई जानकारी नभएको बताए।
गत पुस १ गते बसेको स्थायी कमिटी बैठकले अध्यादेश फिर्ता गर्ने निर्णय गरी सकेको छ। अध्यादेश ल्याउने र फिर्ता लिने कार्यले राष्ट्रपतिको गरिमा र भूमिकामाथि प्रश्न उठिरहेको छ। त्यसैले फिर्ताका विषयमा राष्ट्रपति भण्डारी सजिलै सहमत हुने अवस्था नरहेको बुझिएको छ। फिर्ता गर्नुपरे पनि केही समय लिने तयारीमा राष्ट्रपति छिन्। त्यही अनुसार नेकपा नेताहरुलाई मनाउनुपर्ने उनको धारणा रहेको बुझिएको छ।
राष्ट्रपति राजी भएको अवस्थामा प्रधानमन्त्री ओली आइतबारको स्थायी कमिटी बैठक अघि मन्त्री परिषद् बैठक बोलाएर फिर्ताका लागि पहल गर्न सक्छन्। स्थायी कमिटीमा हुने आलोचनाको एउटा बुँदा स्वभाविक रुपमा घट्नेछ। आफूले अध्यादेश फिर्ता लिएको भन्दै पार्टी एकताका लागि प्रतिवेदन फिर्ता हुनुपर्ने धारणा राख्ने ठाउँ समेत पाउने नेकपाका एक नेता बताउँछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821306.jpg)
-1786602170.png)
-1789631269.jpg)
