काठमाडौं- राष्ट्रिय ध्वजावाहक नेपाल वायुसेवा निगम (नेपाल एयरलाइन्स) ले गन्तव्य अनुसारको ब्रेक इभन कस्ट (संचालन खर्च)सम्बन्धी अध्ययन गरेको छ। निगमले जहाजको चार्टर रेट परिमार्जनका लागि अध्ययन गर्न गठन गरेको कार्यदलले गन्तव्य अनुसारको ब्रेक इभन कस्ट पनि अध्ययन गरेको हो।
निगमका मार्केटिङ निर्देशक जनक कालाखेतीको संयोजकत्वको कार्यदलले महाप्रबन्ध डिमप्रकाश पौडेललाई अध्ययन प्रतिवदेन बुझाएको थियो। कार्यदलले हालै सोसम्बन्धी अध्ययन प्रतिवेदन बुझाएको थियो।
उक्त अध्ययनमा निगमले अहिले आन्तरिक र अन्तर्राष्ट्रिय उडान प्रयोग गर्दै आएको ए–३३०, ए–३२० र ट्विनअटर जहाजको चार्टर रेट र व्यवसायिक उडानमा लाग्ने खर्चको अनुमानित विवरणसमेत समावेश गरिएको छ। अनावश्यक खर्च कम गरेर फाइदामा लैजानका लागि अध्ययन गरिएको निगमले जानकारी दिएको छ।
‘कार्यदलले चार्टर रेट र उडानका ब्रेक-इभन कस्टका विषयमा अध्ययन गरेर रिपोर्ट बुझाएका छन,’ निगम स्रोतले भन्यो, ‘अब कार्यदलले दिएको रिपोर्टका आधारमा केही दिनमा निर्णय हुन्छ। यसको लक्ष्य भनेको आर्थिक संकटमा चुलिएको र घाटामा गएको निगमलाई फाइदा लैजानु नै हो।’
ए-३२० को ब्रेक इभन कस्ट
नेपाल एयरलाइन्सले अहिले अन्तर्राष्ट्रिय उडानका २ वटा ए-३२० जहाज मार्फत उडान गर्दै आएको छ। एयरबस ३२० को ब्रेक इभन कस्ट प्रतिघण्टा ६ हजार ९ सय ७४ डलर लाग्ने कार्यदलको निष्कर्ष छ।
सोही आधारमा कार्यादलले ए-३२० जहाज मार्फत भारतको दिल्ली उडानमा दुई तर्फ उडान समय ३.४ घण्टा लाग्ने र त्यसको ब्रेक इभन खर्च २३ हजार ७ सय १२ डलर लाग्ने अध्ययनको प्रतिवेदनमा उल्लेख छ।
यसैगरी हङकङ उडानको दुईतर्फी समय ९.४५ घन्टा हुने र लागत ६६ हजार ९ सय ५ डलर लाग्ने कार्यदलको रिर्पोटमा उल्लेख छ।
ए-३३०को ब्रेक इभन कस्ट
नेपाल एयरलाइन्सले २ वटा ए-३३० वाइडबडी जहाज अन्तर्राष्ट्रिय उडानमा प्रयोग गर्दै आएको छ। वाइडबडीको ब्रेक इभन कस्ट प्रतिघण्टा १४ हजार ४२ डलर हुने कार्यदलले बुझाएको रिर्पोटमा उल्लेख छ। वाइडबडीको गन्तव्य अनुसारको ब्रेक इभन कस्ट तालिकामा देखाइएको छ।
यसैगरी निगमले अहिले आन्तरिक उडानका ट्विनअटर जहाज प्रयोग गर्दै आएको छ। निगमसँग ३ वटा ट्विनअटर जहाज भए पनि उडानका २ वटा मात्रै जहाज रहेको छ।
कार्यदलले दिएको रिर्पोटमा ट्विनटरको ब्रेक इभन कस्ट पनि प्रतिघण्टा ९ सय ५६ डलर लाग्ने उल्लेख छ।
एक स्थानबाट अर्को गन्तव्यमा पुग्नका लागि हुने वास्तविक सञ्चालन खर्चलाई 'ब्रेक इभन कस्ट' भनिन्छ। ब्रेक इभन कस्टमा नाफा पनि हुँदैन र घाटा पनि हुँदैन। व्यापारमा ब्रेक इभन कस्टभन्दा बढी हुन आउने रकमलाई नाफा र ब्रेक इभन कस्ट भन्दा कम भए घाटा भनिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
-1765273665.jpg)
