काठमाडौं- चिनी मिलबाट आफूहरूले बिक्री गरेको उखुको मूल्य नपाएका किसानहरुले गतवर्षको सम्झौता बमोजिम सरकारले तत्काल उक्त रकम दिलाउन पहल गर्नुपर्ने माग गरेका छन्। यदि उखु उद्योगीले सो रकम उपलब्ध नगराए सरकारबाट नै उपलब्ध गराउनुपर्ने माग उनीहरूको माग छ।
उखु किसानको सबै बक्यौता रकम तिर्ने गरी गतवर्ष पुस १८ गते भएको चिनी उद्योगीहरुसँगको सम्झौतामा उद्योग, वाणिज्य तथा आपूर्ति मन्त्रालय जमानी बसेका कारण सरकारबाटै त्यो रकम पाउनुपर्ने उनीहरुको भनाई छ।
उखु किसान संघर्ष समितिका संरक्षक राकेश मिश्र अब कुनै पनि हालतमा उधारो सम्झौता नहुने र अहिले किसान आफ्नो पैसा लिएर मात्रै फर्किने गरी काठमाडौंमा धर्ना बस्न आएको बताउँछन्। सरकार उद्योगीको जमानी बसेका कारण किसानलाई सरकारले पैसा दिएर उद्योगीहरुसँग त्यसको शोधभर्ना गर्नुपर्ने उनको भनाई छ।
‘गतवर्ष उद्योग मन्त्रीकै अगाडि सम्झौता भएको थियो। त्यो कार्यान्वयन भएको त्यसको जिम्मा सरकारले लिनुपर्छ,’ उनले भने।
यता उद्योग, वाणिज्य तथा आपूर्ति मन्त्रालयले भने चिनी उद्योगीहरुलाई किसानको बक्यौता तिर्न १ महिना समय दिएको भएपनि उद्योगीहरुले हालसम्म कुनै प्रतिक्रिया नजनाएको बताएको छ।
मन्त्रालयकी सहप्रवक्ता उर्मिला केसीका अनुसार मंसिर ९ गते उद्योग, वाणिज्य तथा आपूर्ति राज्यमन्त्री मोतीलाल दुगढको संयोजकत्वमा बैठक बसेर यो विषयलाई एक महिनाभित्र टुंगाईसक्ने निर्णय भएको थियो। त्यहीअनुसार मन्त्रालयले चिनी उद्योगीहरुलाई पत्राचार पनि गरेको थियो। तर त्यसको प्रगति के कति भयो भनेर उनीहरुले मन्त्रालयलाई जानकारी गराएका छैनन्।
उखुको बक्यौता नपाएका किसान माइतीघरमा आएर धर्नामा बसेको विषयलाई मन्त्रालयले गम्भीर रुपमा लिएको पनि उनको भनाई छ। ‘मन्त्रालयले जानकारी लिईरहेको छ। मन्त्री आफैँले अनौपचारिक रुपमा चासो देखाइरहनु भएको छ। अघिल्लो वर्ष १ अर्ब ६० करोड बक्यौता थियो। गत वर्षको सम्झौता र त्यसपछि मन्त्रालयले गरेको ताकेताका कारण धेरै बक्यौता रकम तिरिसकेर अहिले ४ वटा मिलले ७६ रुपैयाँ बराबर तिर्न बाँकी छ,’ उनले भनिन्, ‘बक्यौता तिर्न बाँकी रहेका मध्ये श्रीराम सुगरमिल बन्द अवस्थामा छ। उसले आफ्नो जग्गा बेचेर किसानको रकम दिन्छु भनेर मन्त्रालयलाई भनेको छ।’
त्यस्तै अन्नपूर्ण सुगर मिलले अहिले चिनी बिक्री भइनसकेकाले रकम तिर्न नसकेको जानकारी मन्त्रालयलाई केही समय अगाडि गराएको केसीले जानकारी दिइन्।
‘अन्नपूर्ण सुगर मिलले आफ्नो ५० करोड रुपैयाँ बराबरको चिनी बिक्री नभएको भनेको छ। १७ करोड रुपैयाँ बक्यौता रहेको यो मिलले चिनी बिक्री भएपछि तिर्छु भनेको छ,’ उनले भनिन्। बक्यौता तिर्न बाँकी अरु चिनी मिलहरु भने अहिले मन्त्रालयलको सम्पर्कमै छैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
