चक्रपथ विस्तारमा स्वयम्भुको स्तुपा नहटाइने

पूर्वाधार

नेपाल लाइभ बुधबार, मंसिर २४, २०७७ १२:३९

काठमाडौं- भौतिक पूर्वाधार तथा यातायातमन्त्री वसन्तकुमार नेम्बाङले चक्रपथ विस्तारका क्रममा स्वयम्भुको स्तुपा नहटाउने बताएका छन्। विश्व सम्पदा क्षेत्रभित्रका बौद्धमार्गीहरुले तपस्या गर्ने बुद्धको हजार मूर्ति स्तुपा नहटाइने उनले बताएका हुन्। मंगलबार 'स्वयम्भू विश्वसम्पदा क्षेत्र बचाऔँ' अभियानको ज्ञापनपत्र बुझ्दै मन्त्री नेम्वाङले यस्तो आश्वासन दिएका हुन्।

उनले सडक विस्तारका क्रममा कम्तिमा पनि स्वयम्भु क्षेत्रमा रहेको भगवन बुद्धको हजार मूर्ति स्तुपा जोगाउनुपर्छ भन्नेमा आफू रहेको बताए। ‘हाम्रो आवश्यक डिजाइन, सडक निर्माणको मापदण्ड, पुरातत्व विभाग र युनेस्कोको प्रावधानका परिधिमा रहेर हजार मूर्तिको स्तुपा जोगाउनुपर्छ भन्ने प्रष्ट भएको छ,’ उनले भने, ‘प्राविधिक रुपमा सम्भव भएसम्म स्वयम्भू क्षेत्रका अरु पनि सम्पदा जोगाइने छ।’

सरकार विभिन्न समुदायको संस्कृति संरक्षणमा मात्र होइन नयाँ चरणमा विकास गर्न लागि परेको मन्त्री नेम्वाङले बताए। ‘यो सरकार नयाँ संविधानद्वारा निर्देशित छ। नयाँ मुलुक निर्माणमा अगाडि बढेको सरकार स्वभावैले मुलुुककाे चौतर्फी विकास गर्न चाहन्छ,’ मन्त्री नेम्वाङले भने, ‘चौतर्फी विकासका अलावा मुलुकको विविध धर्म, विविध समुदाय विविध, सस्कृतिको रक्षा मात्र होइन। यसको नयाँ चरणमा विकास गर्न लागिपरेको छ।’ मुलुकको विविध सस्कृति सामाजिक सम्पत्ति भएको उनको भनाइ छ।

मन्त्री नेम्वाङले स्वयम्भूजस्तो विश्वसम्पदा सूचीमा रहेका क्षेत्रहरुको संरक्षणमात्र होइन अझ विकास गरेर लैजाने कुरामा सरकारको नीति कार्यक्रममा स्पष्ट रहेको बताए। उनले सडक विस्तार गरिँदा यसका प्राविधिक पक्ष, धार्मिक पक्ष, विश्वसम्पदा क्षेत्रका प्रावधान सबै विषयवस्तुलाई ध्यान दिएर काम अघि बढाइने आश्वासन दिए।

समुदायको भावना र संवदेनशीलतासँग जोडिएकाले विषय भएकाले अभियानले ध्यानाकर्षण गराउँदै पुरातत्व विभाग, महानगरपालिकासँग छलफल गर्नुका साथै आयोजना कार्यान्वयन गर्ने निकायलाई सचेत गराईसकेको समेत उनले जानकारी दिए। भौतिक पूर्वाधार तथा यातायात मन्त्रालयका सचिव रविन्द्रनाथ श्रेष्ठले स्वयम्भुजस्ता सम्पदाहरु सरकारले नै विश्वसम्पदा सूचीमा सूचीकृत गराएकाले त्यसको प्रावधान पालना गर्ने बताए।

त्यस्तै अभियानका संयोजक नुर्बु शेर्पाले आफ्नो अभियानमा सरकार सकारात्मक भएको भन्दै विकासको काम पनि नरोकिने र सम्पदा पनि जोगाउने पक्षमा जानुपर्ने उल्लेख गरे। कार्यक्रममा पुरातत्व विभागका महानिर्देशक दामोदर गौतम, पासाङ शेर्पा र सडक विभागका महानिर्देशक केशवकुमार शर्मालगायत उपस्थित थिए।

काठमाडाैं चक्रपथ सुधार आयोजनाकाे दोस्रो खण्ड कलंकीदेखि धोविखोला ११.६ किलोमिटर साइट क्लियरेन्सको काम अन्तिम चरणमा रहेको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

संघीय अस्पताल विकास समितिको आम्दानीको १ प्रतिशत स्वास्थ्य बीमा कोषमा जम्मा गर्ने मन्त्री पौडेलको निर्णय

यी हुन् तीनकुने घटनामा म्याद थप भएका ४१ प्रतिवादी र यस्ता मुद्दा लगाइयो (सूचीसहित)

थाइल्याण्ड भ्रमण र बिमस्टेक सम्मेलनमा सहभागिताबारे प्रधानमन्त्रीले गरे परामर्श