काठमाडौं- इटालियन कम्पनी सिएमसीले २ वर्षअघि काम छोडेर भागेपछि अलपत्र परेको तनहुँ जलविद्युत आयोजनाको पहिलो चरण (फेज १) को ठेक्का सम्झौता प्रकृया अझै टुंगिन सकेको छैन।
१ सय ४० मेगावाट उत्पादन क्षमताको यो आयोजनाको पहिलो चरणको काम अधुरै छोडेर सिएमसी २०७५ मा भागेको थियो। त्यसपछि आयोजनाको काम अगाडि बढाउन शुरु भएको ठेक्का प्रकृया अहिले पनि अपूर्ण अवस्थामै छ। तनहुँ हाइड्रोपावर लिमिटेडका प्रबन्ध निर्देशक प्रदीप कुमार थिकेकाअनुसार ठेक्का प्रकृया अहिले मूल्यांकन र छनौटको चरणमा पुगेको छ।
‘प्राप्त आवेदनहरुमध्येबाट स्वीकृत भएका टेण्डरको मुल्यांकन प्रतिवेदन एसियाली विकास बैंक (एडिबि) लाई पठाएका छौं। एडिबीबाट सहमति आएपछि हामी काम अगाडि बढाउँछौं‚’ उनले भने‚ ‘हामीले पठाएको दुई हप्ताजति भइसक्यो। नोभेम्बरको अन्तिमसम्ममा समय थियो। अब चाँडै टुंगिन्छ होला।’
आयोजनाको पहिलो चरणको काम गर्नका लागि तीनवटा कम्पनीले बोलपत्र हालेका थिए। जसमध्ये २ वटाको मात्र टेण्डर स्वीकृत भएको र अन्तिम सहमतिका लागि एडिबिलाई थिकेले बताए।
आयोजनामा पहिलो चरणको कामअन्तर्गत १ सय ४० मिटर अग्लो ड्याम, नदी डाइभर्सन तथा सुरुङ निर्माणलगायत हेडवर्कर्सको कामका लागि पटक पटक टेण्डर आह्वान गरिएको थियो। सिएमसीसँग भएको ठेक्का सम्झौतालाई समेत हेर्दा आयोजनाका लागि टेण्डर सूचना प्रकाशित गरेको पाँचौ पटकमा अहिले यी कम्पनीलाई छनौटको प्रकृया चलिरहेको छ। आयोजनाले यो ठेक्का प्रकृया शुरु गरेको पनि डेढ वर्षभन्दा बढी समय भइसक्यो।
सिएमसी भागेपछि आयोजनाको पहिलो चरणको काम सक्न २०७६ वैशाखमा दोश्रो पटक टेण्डर आह्वान गरिएको थियो। तर आयोजनामा लगानी गरिरहेका एसियाली विकास बैंक ९एडिबी० र युरोपियन लगानी बैंक (इआइबी) लगायत संस्थाहरूले दोश्रो चरणको टेण्डर प्रक्रियामा सहभागी भएका कम्पनीहरुको योग्यता नपुगेको भन्दै ती प्रस्ताव अस्वीकृत गरेपछि तेश्रो पटक ग्लोबल टेण्डर आह्वान गरी ठेक्का प्रक्रिया अगाडि बढाइएको थियो। गत फागुन १६ गते (फेब्रुअरी २८) मा आयोजनाका लागि तेस्रो पटक टेण्डर सूचना प्रकाशित गरेर २०७७ वैशाख १ (१३ अप्रिल) भित्र प्रस्ताव पेश गरिसक्न भनेको थियो। तर टेण्डर प्रस्ताव पेश गर्न तोकिएको अन्तिम मिति सकिन ४ दिन अगावै गत शुक्रबार आयोजनाले टेण्डर प्रक्रिया जेठ ७ गते (मे ११) सम्मका लागि लम्बियो। त्यसपछि पनि आयोजनाले टेण्डरको मिति थप गरेको थियो।
समयावधि १ महिना थपेर चौथोपटक सूचना प्रकाशित गरिएको छ। दोश्रो चरणको ठेक्का प्रक्रियामा तीनवटा चिनियाँ कम्पनी सिनो हाइड्रो कर्पोरेसन लिमिटेड, चाइना गेजुवा ग्रुप कम्पनी लिमिटेड र चाइना नेशनल इलेक्ट्रिक इन्जिनियरिङ कर्पोरेसन लिमिटेडले प्रस्ताव पेश गरेका थिए। त्यस्तै ‘सोङ डा कर्पोरेसन भियतनाम र कालिका कन्ट्रक्सन नेपालको संयुक्त उपक्रम (जेभि) मा पनि प्रस्ताव परेको थियो। तर प्रस्ताव परेका यी सबै कम्पनीहरुले टेण्डर प्रक्रियाका लागि तोकिएको योग्यता नपुगेको भन्दै अर्को पटक टेण्डर आह्वान गरिएको हो।
१ सय ४० मेगावाट उत्पादन क्षमता रहेको यो आयोजना सन् २०२३ सम्ममा निर्माण गरिसक्ने लक्ष्य लिइएको छ। आयोजना निर्माणको पहिलो चरणमा नै ठेकेदार कम्पनीले काम छाडेको र नयाँ ठेकेदार कम्पनी छनौट गर्ने दुई वर्षभन्दा बढी समय लागेपछि निर्माणको काम समयमै सम्पन्न गर्न थप चुनौतीपूर्ण हुने देखिएको छ। आयोजनाको दोश्रो चरणको काम भने चिनियाँ कम्पनी सिने हाइड्रो लिमिटेडले गरिरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
