सिओल- कोरियामा सञ्चालित केएमई ट्राभल्स कम्पनी र दुर्गा ग्रुपले गैर आवासीय नेपाली संघ दक्षिण कोरियालाई एक करोड ६० लाख कोरियन वन सहयोग गर्नेगरी शनिबार सम्झौता गरिएको छ।
केएमई तथा दुर्गा ग्रुपका कार्यकारी निर्देशक विनोद कुँवर र एनआरएनए कोरियाका अध्यक्ष यज्ञराज सुवेदीले शनिवार उक्त सहयोग सम्झौतामा हस्ताक्षर गरेका हुन्।
केएमई ट्राभल्सले कोरियन एयरसँगको सहकार्यमा आफ्नो निश्चित मुनाफा सामाजिक क्षेत्रमा सहयोग गर्ने दायित्व बमोजिम कोरियाली कानुनमा आधारित रही १ करोड वन सहयोग गर्ने जनाएको छ। त्यस्तै दुर्गा ग्रुपले संघको सभाहलको मासिक ५ लाख वनका दरले १ वर्षको ६० लाख वन भाडा वेहोर्नेगरी सम्झौतामा हस्ताक्षर गरिएको केएमई तथा दुर्गा गु्रपका सञ्चालक कुँवरले जानकारी दिए।
केएमईले प्रदान गर्ने १ करोड वन सामाजिक क्षेत्रमा गरिने विभिन्न कार्यक्रमहरुमा खर्च गरिने एनआरएनए कोरियाले जनाएको छ।
केएमई ट्राभल्सले कोरोना महामारीका समयमा नेपाल बिदामा गएका नेपाली श्रमिकलाई कोरिया रोजगारीमा फर्काउने एनआरएनए कोरियाको अभियानमा साझेदारी गरेको थियो।
सोही अभियानमार्फत् ७ सय नेपालीलाई गुम्नै लागेको कोरिया रोजगारीमा फर्काउन सफल भएको एनआरएनए कोरियाको दाबी छ। केएमई ट्राभल्स र दुर्गा ग्रुप नेपाली व्यवसायी विनोद कुँवरद्वारा कोरियामा सञ्चालित व्यवसायिक कम्पनी हुन्।
दुर्गा ग्रुपअन्तर्गत दुर्गा रेष्टुरेण्टका नामले देशभरीमा ७ वटा शाखा छन्। सन् २००६ मा कोरियामा स्थापना गरिएको एनआरएनए कोरिया शाखा स्थापनाको १४ वर्षपछि हालको समितिले कोरिया सरकार मातहतमा वैधानिक रुपमा दर्ता गरेको हो। संस्था दर्ता भइसकेपछि विभिन्न समाजिक गतिविधिहरु गर्नका लागि सहज भएको र संस्थालाई थप बलियो बनाउन काम भइरहेको संस्थाका अध्यक्ष सुवेदीले बताए।
यसअघिका निर्वाचित पदाधिकारीहरुले संस्थालाई बैधानिकता प्रदान नगरी बेलगाम सञ्चालन गरेको र संस्थाको बैंक खाता समेत सिमित व्यक्तिका नाममा सञ्चालन गरेका कारण आर्थिक अपचलन भएको आरोप लाग्दासमेत बैंक विवरण लिन अप्ठ्यारो परेको नयाँ समितिको गुनासो छ।
सहयोग सम्झौता पत्रमा हस्ताक्षर गर्ने क्रममा संघका संस्थापक अध्यक्ष केपी सिटौला, समाजसेवी रुद्र शर्मा, संघका महासचिव विमल सुवेदी लगायतको उपस्थिति थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
