काठमाडौं–वैज्ञानिक वनबारे अध्ययन गर्न बनेको संसदीय उपसमितिको टोली गत साउनको तेस्रो सातातिर सिन्धुलीतिर लाग्यो। टोलीको नेतृत्व गरेका थिए पर्सा १ बाट निर्वाचित प्रतिनिधि सभा सदस्य प्रदीप यादवले।
सिन्धुलीमा अनुगमन सकेपछि टोली सर्लाही तथ रौतहट पनि पुग्यो। उनीहरुले साउन १५ गते बाराको सिमरामा रहेको इच्छा होटलमा बास बस्ने निधो गरे। साँझतिर सांसदको टोली केही अनौपचारिक कुराकानीमा जुटेको थियो। तर यता यादव भने असहज महसुस गरिरहेका थिए। जिउ दुख्ने, हिँड्न मन नलाग्ने, ज्वरो आउने भयो। उनले डाक्टरलाई फोन गरे। डाक्टरले एन्टीबायोटिक लिन सल्लाह दिए।
उनले राति नै एन्टीबायोटिक खाए। बारामा बस्न मन नलागेपछि साथीहरु सँग बिदा भएर वीरगञ्ज गए। १६ गते बिहान पिसीआर गरे। दिनभरि घरमा छुट्टै बसे। राति साढे ९ बजे अस्पतालबाट फोन आयो–उनमा कोरोना भाइरस पोजेटिभ देखियो।
त्यसपछि यादवले सामाजिक सञ्जालमा आफू पोजेटिभ भएको उल्लेख गर्दै आफ्नो सम्पर्कमा आउने सबैलाई टेष्ट गराउन आग्रह गरे। १६ गते रातभर उनलाई निद्रा लागेन। ‘कोरोनाबाट संक्रमित भएपछि बालबच्चा, घर परिवार, राष्ट्र र मेरो जिम्मेवारी सम्झिएँ,’ यादव भन्छन्, ‘त्यतिबेला वीरगञ्जमा दिनकै २÷३ जनाकाृ मृत्यु हुन्थ्यो, त्यो रातभर म जागा रहेँ, निदाइनँ।’
‘सेड्युलमा’ बिते १० दिन
उनलाई १७ गते बिहान ५ बजेदेखि नै लगातार फोन आउन थाले। धेरै आफन्त, साथीभाइले नआत्तिन र इच्छाशक्ति बलियो बनाउन प्रोत्साहन दिइरहे। अघिल्लो रात राम्रोसँग ननिदाएका उनले राति नै ‘सेड्युल’ बनाए। बिहान ६ बजे उठ्ने, जगिङ गर्ने, अन्य व्यायाम गर्ने, नुन पानीले मुख कुल्ला गर्ने, गुर्जाे पानी, मरिच, दालचिनी र तुलसीको पत्ता हालेर काडा बनाएर पकाएर खाए।
त्यस्तै, दुई वटा प्याज,२–२ पोटी लसुन अढाइ चम्चा बेसार र विरेनुन मसिनो गरि पिसेर दिनमा तीन पटक पानीसँग घोलेर पिए। ‘दिनमा पानी प्रशस्त पिएँ, ६ गिलास फ्रेस जुस, ६ गिलास नरिवलको पानी पनि पिएँ,’ यादब भन्छन्, ‘स्याउ, अण्डा पनि खाएँ। खानेकुरा, व्यायाम र आत्मविश्वास हुने हो भने कोरोना सजिलै जितिने रहेछ।’
१० दिनको बीचमा उनलाई लक्षणले पनि सतायो। पखाला पनि लाग्यो। तर उनी आत्तिएनन्। ‘रोग सञ्चो हुन खानासँगै आत्मविश्वास पनि चाहिने रहेछ। कोरोना लागे पछि मैले यही महसुस गरेँ।’
भिटामिन डि को लागि घाम ताप्ने, भिटामिन सीको लागि कागती पानी खाने गरे। दिनहुँ उनलाई लक्षण कम हुँदै गयो। साउन २६ गते त उनको रिपोर्ट नेगेटिभ आयो।
कोरोना केही हो
सामाजिक सञ्जालमा एक समूह नै छ। कोरोना केही हैन भन्दै हल्काफुल्का लिने, मास्क लगाउन नपर्नेजस्ता अफवाह पनि फैलाइरहेका छन्। तर यस्ता हल्ला फैलाउने काम रोक्नुपर्ने यादव बताउछन्। ‘कोरोना केही हैन यो लागे पनि केही हुन्न भनेर अफबाह फैलाउने काम गरिएको छ,’ उनले भने, ‘यस्तो हल्लाको पछि कोही नकुद्नु होला, यो डरलाग्दो रोग हो र त विश्वभरि महामारीका रुपमा फैलिइरहेको छ, रोग लाग्नेलाई मात्र थाहा हुन्छ यो कस्तो हो भनेर।’
आत्मविश्वास दर्हो बनाउनुस्, कोरोना जित्नुस्
पछिल्लो समय कोरोना संक्रमित धेरै जना होम आइसोलेसनमा बसिरहेका छन्। सासंद यादव पनि होम आइसोलेसनमै बसेका हुन्। होम आइसोलेसनमा बस्दा धेरै कुरामा ध्यान दिनुपर्ने उनले बताए। ‘घरमा बस्दा पहिलो कुरा परिवारलाई नसरोस् भनेर छुट्टै शौचालय प्रयोग गर्ने, एउटै प्रयोग गर्न परे संक्रमितले प्रयोग गरिसकेको आधा घण्टापछि मास्क लगाएर प्रयोग गर्ने र ज्वरो र मुटुको धड्कन नाप्ने मेसिन ल्याएर नापिरहने र डाक्टरको सम्पर्कमा रहन सक्नुपर्छ। अस्पताल बस्दा भने डाक्टरले हेरिहाल्छन् तर आफूचाहिं होसियार हुनुपर्यो,’ उनले भने।
कुनै पनि रोगबाट जित्न आत्मविश्वास दर्हो हुनुपर्ने यादवको अनुभव छ। ‘रोग त लागिहाल्यो के गर्ने भनेर आत्तिन नहुने रहेछ,’ यादवले भने, ‘आत्मविश्वास रोगसँग लड्न आवश्यक कुरा हो, जो–जो आइसोलेसनमा हुनुहुन्छ उहाँहरुलाई आत्मविश्वासचाहिँ नगुमाउन सल्लाह दिन्छु।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1770562345.jpg)
