आत्महत्या गरेका सुवेदीको मुद्दामा विशेषको पूर्णपाठ : प्रमाणै नपुगी भ्रष्टाचारी ठहर गर्न मिल्दैन

राजनीति

दुर्गा दुलाल सोमबार, असोज ५, २०७७ १४:५०

विशेष अदालतले एक हजार घुस लिएको आरोपमा ४२ दिन हिरासत रहेर भ्रष्टाचार मुद्दामा १ हजार धरौटीमा छुटेपछि आत्महत्या गरेको रामहरि सुवेदीको फैसलाको पूर्ण पाठ सार्वजनिक भएको छ। विशेष अदालतले सुवेदीको पूर्णपाठ सोमबार सार्वजनिक गरेको हो।

न्यायाधीशद्वय चन्द्रबहादुर सारु र रवी शर्मा आर्यालको इजलाशले सुवेदीलाई असार ३० गते सफाइ दिने फैसला सुनाएको थियो। दुई महिनापछि तयार भएको पूर्णपाठमा अदालतमा पेश भएका तथ्य, प्रमाण र अदालतवाट निर्माण भएका सिद्धान्तले समेत एक हजार घुस लिएर भ्रष्टाचार गरेको पुष्टि नभएको भनिएको छ।

४२ दिन हिरासत अनि धरौटीमा छुटेपछि आत्महत्या
अख्तियारले भ्रष्टाचारी खोज्ने भन्दै २०७५ चैतदेखि स्टिङ अप्रेसन टिम बनाए परिचालन गरेको थियो। २०७५ पुस १५ गते मालपोत कार्यालय कलंकीमा रामहरी सुवेदीको सरुवा भएको थियो। २०७६ साउन दोस्रो हप्ता एक सेवाग्राही कृष्णप्रसाद घिमिरे र सुवेदी चिया पसलमा गएका थिए। उक्त चिया पसलमा समेत सिसिटिभीको निगरानी राखिएको थियो। उक्त चिया पसलमा सुवेदीले घुस लिएको भन्दै २०७६ साउन २१ गते अख्तियार उपस्थित हुन पत्र आयो।

घरमा समेत अख्तियार छिरेर आउने काम भएकाले ढिला हुन्छ भनेका सुवेदी अख्तियारकै हिरासमा पुगे। उनलाई पक्राउ पुर्जी दिँदै अख्तियारले हिरासतमा राख्यो। २०७६ भदौ ३० गते उनी विरुद्ध विशेष अदालतमा भ्रष्टाचार मुद्दा दायर गर्‍यो। भदौ ३१ गते उनले बयान गरे।

उनलाई सिसिटिभी फुटेजमा सेवाग्राहीसँग एक हजार लिएको देखिएको आधारमा अख्तियारले भ्रष्टाचार मुद्दा चलाएको थियो। उनी अख्तियारको हिरासतमा ४२ दिन बसेका थिए। अदालतमा मुद्दा दायर भएपछि भदौ ३१ गते एक हजार धरौटीमा रिहा भए।

२०७६ साउन २२ गते पक्राउ परेका उनी अदालतबाट छुटेर घर पुगे लगत्तै २०७६ असोज ६ गते आफ्नै घरको भर्‍याङमा झुन्डिएर आत्महत्या गरे। उनले आफूले भ्रष्टाचारमा सफाइ पाएको देख्न पाएनन्। अख्तियारले पेस गरेको प्रमाणमा भ्रष्टाचार पुष्टि हुने आधार नभएको विशेषको पूर्णपाठमा भनिएको छ।

विशेषको ठहर
‘सुवेदी उपर लगाइएको भ्रष्टाचार निवारण ऐन, २०५९ को दफा ३(३) बमोजिमको भ्रष्टाचारजन्य कसुर हुनको लागि प्रतिवादी कृष्ण प्रसाद घिमिरेले प्रतिवादी रामहरि सुवेदीबाट कुनै काम गर्न, गराउन वा नगर्न, नगराउनको लागि घुस रिसवत दिएको पुष्टि भएको देखिनु पर्दछ’, विशेषको पूर्णपाठमा भनिएको छ, ‘प्रतिवादी कृष्णप्रसाद घिमिरे सेवाग्राहीको रुपमा मालपोत कार्यालय, कलंकीमा खरिदार पदमा कार्यरत सुवेदी समक्ष निजको कानुनी कर्तव्यसँग सम्बन्धित कुनै काम गराउन गएको, सो काम गर्न वा गराउनको लागि रिसवत दिएको, सुवेदीले आफ्नो कर्तव्यसँग सम्बन्धित काम गर्न वा गराउनको लागि प्रतिवादी कृष्ण प्रसाद घिमिरेसँग घुस माग गरी लिएको प्रत्यक्ष र स्वतन्त्र प्रमाणबाट पुष्टि भएको हुनुपर्दछ।’

घिमिरेले प्रतिवादी खरिदार सुवेदीसँग के, कुन काम गर्न, गराउन मालपोत कार्यालय कलंकीमा गएका हुन्? अनुसन्धानबाट खुल्न आएको नदेखिएको फैसलाको पूर्णपाठमा देखिन्छ।

‘खरिदार सुवेदी समक्ष गएको, सो काम गर्न गराउन निजलाई रिसवत दिएको भन्ने व्यहोरा ठोस प्रमाणबाट पुष्टि हुन सकेको छैन’, फैसलामा भनिएको छ, ‘मौकामा बयान गर्दा खरिदार सुवेदीले कृष्णप्रसाद घिमिरेको पुर्जा बनाईदिए बापत खाजा खान एक हजार दिएको’ भन्नेसम्म उल्लेख देखिन्छ।’

घिमिरेले फर्पिङमा जग्गा किन्नको लागि मोठ भिडाउनको लागि एक हजार दिएको भन्ने व्यहोरा पनि बयानमा उल्लेख भएकाले यी दुई बयान आपसमा बाझिएको विशेषको फैसलामा उल्लेख छ। सुवेदीमाथि यस्तो आरोप लागे पनि बयान अनुसारको काम कार्य मालपोत कार्यालय कलंकीमा भए नभएको वा कार्बाहीयुक्त अवस्थामा रहेको र सो कार्य गर्ने जिम्मेवारी रामहरि सुवेदीको भएको भन्ने सम्बन्धमा अनुसन्धानबाट केही नखुलेको फैसलामा उल्लेख छ।

‘यस स्थितिमा बिना प्रयोजन घिमिरेले खरिदार सुवेदीलाई रिसवत दिने र उनले लिने अवस्थै रहँदैन’, फैसलाको पूर्णपाठमा भनिएको छ, ‘ सिसिटिभी फुटेजको दृश्य अवलोकन गर्दा घिमिरेले खरिदार सुवेदीलाई एक हजारको नोट दिएको प्रष्ट रुपले देखिँदैन।’

अख्तियारले जुन प्रमाणको रुपमा पेश गरेको थियो, त्यसलाई विशेषले ठाडै खारेज गरिदिएको छ। ‘घुस लिए/दिएको अन्य सर्वसाधारण समेतले देखेको भन्ने व्यहोरा आरोप पत्रको पृष्ठ ३ मा उल्लेख भएकोमा प्रत्यक्षदर्शी भनिएका मानिसहरुको अनुसन्धानको क्रममा कागज गराउँदा दाबीलाई पुष्टि गराउन समेत नेपाल सरकारले सकेको देखिदैन’, फैसलाको पूर्णपाठमा भनिएको छ, ‘यसरी सुवेदीमाथि नेपाल सरकारले शंकारहित तवरले सप्रमाण पुष्टि गर्न नसकेको अवस्थामा दोषी ठहर गर्न नमिल्ने फैसलाको पूर्णपाठमा उल्लेख छ।

‘सेवाग्राही भनिएका घिमिरेले पाँच सय दिएको भनी गरेको बयानकै भरमा भ्रष्टाचार जस्तो गम्भीर कसुरमा कसुरदार ठहराउन न्यायसम्मत हुने देखिँदैन’, फैसलामा भनिएको छ, ‘भ्रष्टाचारको कसुर स्थापित हुनको लागि प्रतिवादीले आफू वा अरु कुनै व्यक्तिलाई गैर कानुनी लाभ पुर्‍याएको भन्ने कुरा प्रत्यक्ष, सार्थक र विश्वासपरक प्रमाणबाट शंकारहित तवरले पुष्टि भएको हुनु पर्दछ।’

रामहरि सुवेदीले अख्तियारमा दिएको बयान
म मालपोत कार्यालय कलंकीमा २०७५ साल पौष १५ गतेदेखि कार्यरत छु, मेरो उक्त कार्यालयको २ नं फाँटमा कीर्तिपुर नगरपालिका लगायतको मोठ रोक्का, भिडाउने, मिसिल दा.खा. गर्ने, पुर्जी बनाउने, रोक्का फुकुवा गर्ने काममा महत्त्वपूर्ण भूमिका रहने गर्दछ, भिडियो फुटेजमा सँगै बसी गफ गरिरहेका मानिस कृष्णप्रसाद घिमिरे हुन्, फुटेजमा देखिए बमोजिम मैले कृष्णप्रसाद घिमिरेको पुर्जा बनाई दिए वापत खाजा खान निजबाट पाएको रकम रुपैयाँ एक हजार हो, अफिसको काम छिटो छरितो गरिदिए बापत खुसीले खाजा खानको लागि दिएको रकम हो।

सुवेदीले अदालतमा गरेको बयान
म कार्यरत रहेको कार्यालयको च.नं. ४३७ मिति २०७६/४/२१ को पत्रसाथै लिई मिति २०७६/४/२२ गते म समेतलाई अनुसन्धान गर्नका लागि भनी पक्राउ पुर्जी दिई हिरासतमा राखेका हुन्। प्रतिवेदन व्यहोरा भ्रामक, कपोलकल्पित एंव झुठा लाग्यो। म कार्यरत कार्यालयमा मेरो सन्दर्भमा मैले कहिल्यै पनि कोही कसैसँग घुस र रिसवत मागे लिएको तथा लेनदेन गरेको होइन, छैन। मिसिलमा उल्लेखित सेतो सर्त, घिउ रंगको क्याप र निलो रंगको पाइन्ट लगाएको तस्बिरको फोटो मेरो हो। उक्त फोटो कार्यालय गएको दिन खाजा खाने सन्दर्भमा खिचेको फोटो हुनुपर्छ। को कसले किन खिचेका हुन् मलाई थाहा भएन। फोटोमा उल्लेखित अन्य व्यक्तिमध्ये मसँग कुरा गरी बसेका अन्य व्यक्ति यसै मुद्दाका प्रतिवादी कृष्ण प्रसाद हुन जस्तो लाग्छ। फोटोबाट एकिन गर्न सकिएन। बिगो रु १,०००/- कायम गरी भ्रष्ट्राचार निवारण ऐन, २०५९ को दफा ३ को उपदफा (१) को कसुरमा सोही ऐनको दफा ३ को उपदफा (१)र दफा (३) को उपदफा (१)को खण्ड (क) बमोजिम सजाय तथा बिगो असुल गरी जफत गरी पाउँ भनी म उपर लगाइएको झुठा आरोप खारेज गरी सफाई पाउँ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।