सिओल- गैरआवासीय नेपाली संघ दक्षिण कोरियामा सातौं कार्य समिति निर्वाचित भएको एक वर्ष पूरा भएको छ। संघमा गत वर्षको सप्टेम्बरमा यज्ञराज सुवेदीको नेतृत्वमा नयाँ समिती निर्वाचित भएको थियो।
एक वर्षको अवधिमा समितीले यहाँका नेपालीका हरेक समस्यामा सहयोगी बन्दै हातेमालो गर्दै काम गरिरहेको दाबी गरेको छ।
समितिका अधिकांश पदाधिकारीहरुले आ-आफ्नो ठाउँबाट यहाँका नेपालीका समस्या समाधानका लागि सक्दो सहयोग गर्दै आएको बताएका छन्।
‘हाम्रा अधिकांश पदाधिकारीहरु यहाँका नेपालीहरुसँग सधैं सम्पर्कमा रहिरहनुभएको छ, कोरियाका सरकारी निकाय र नेपाली दूतावाससँग सहकार्य गर्दै यहाँका नेपालीको समस्या समाधानमा खटिइरहनुभएको छ।’ संघका अध्यक्ष सुवेदीले भने।
संस्थाले एक वर्ष पुरा गरिसक्दा यहाँका नेपालीको सहयोग र समर्थन पाएको सुवेदीको दाबी छ।
उनले थपे, ‘कतिपय अवस्थामा एनआरएनएका केही पदाधिकारी र यहाँका केही नेपाली संस्थाका पदाधिकारीका बीचका आपसी असमझदारीको विषयलाई तोडमोड गरी संस्थामाथि प्रहार गर्न खोजिएपनि संस्थाले सकारात्मक काम गरेकै कारण यहाँका नेपालीको माया पाइरहेका छौँ।’
नयाँ समिती निर्वाचित भएयता पहिलाका समितीले गरेका सकारात्मक कामहरुलाई निरन्तरता दिँदै संस्थाको वैधानिकतादेखि धेरै कामहरु सम्पन्न भएको संस्थाका महासचिव विमल सुवेदीले जानकारी दिए।
संस्थामा नयाँ समिति निर्वाचित भए पश्चात नोभेम्बरमा संस्थाले वैधानिकता पाएको थियो। कोरियाको आधिकारीक सरकारी निकायमा सम्पुर्ण प्रक्रिया पुरा गरी संघको स्थापनाका १४ वर्षपछि २०१९ नोभेम्बर १९ का दिन संस्था दर्ता गरिएको संस्थाको तथ्याङकमा उल्लेख छ।
व्यक्तिको निजी बैंक खाताबाट चल्दै आएको संस्था दर्ता भइसकेपछि संस्थाकै नाममा खाता सञ्चालन भएको छ। यसअघिका समितिलाई आर्थिक अपारदर्शिताका आरोप लाग्दै आएकोमा अब भने संस्थाका सबै आर्थिक गतिविधि संस्थाकै खाताबाट गरिने भएकाले सबै विवरण लिन सजिलो हुने बताइएको छ।
यसअघिको छैठौं कार्यसमितिमा भएको भनिएको आर्थिक अपचलनको विषय व्यक्तिको खातामा संस्थाका गतिविधि गरिएको हुनाले बैंक विवरण लिन नपाइएको गुनासो नयाँ समितिको छ।
संस्थाले वैधानिकता पाएपश्चात् यसअघि वषौँदेखि कार्यालयबिनै चलेको संस्थाको २०२० जनवरी १ देखि कोरियाको राजधानी सिओलमा सभा हलसहितको व्यवस्थित कार्यालय सञ्चालन गरिएको छ। उक्त कार्यालयमा कर्मचारीको व्यवस्था गरी सञ्चालनमा ल्याइएको छ।
त्यस्तै डिसेम्बरमा नेपाल सरकार युवा तथा खेलकुद मन्त्रालयअन्तर्गतको ‘राष्ट्रिय युवा परिषद्’सँग युवाहरुलाई उद्यमी बनाउने उद्देश्यले सिपमुलक तालिम उपलब्ध गराउन एमओयुमा हस्ताक्षर गरी काम अगाडि बढाइएको छ। जसअन्तर्गत नेपालबाट युवाहरुलाई कोरिया ल्याई यहाँको सरकारसँगको समन्वयमा आवश्यक सीप तथा तालिमहरु उपलब्ध गराई नेपालको विकासमा लगाइने उल्लेख छ। कोरोनाका कारण रोकिएको उक्त कामले कोरोना महामारी सकिनासाथ निरनतरता पाउने बताइएको छ।
विगतका वर्षहरुमा संस्थाको अधिवेशनका बखत प्रतिव्यक्ति २० हजार वन शुल्क लिएर सदस्यता वितरण गरिँदै आएकोमा सो झण्झटलाई हटाउँदै अनलाइन मार्फत फाराम भराई निःशुल्क रुपमा सदस्यको ईमेलमै स्मार्ट कार्ड उपलब्ध गराउने परिपाटीको सुरुवात गरिएको छ।
त्यस्तै संस्थाले महाविर पुनको सक्रियतामा नेपालमा सञ्चालित राष्ट्रिय आविस्कार केन्द्रका लागि कोरियामा सहयोग संकलन गरी ७८ लाख १५ हजार कोरियन वन सहयोग रकम उपलब्ध गराएको जनाएको छ।
त्यसैगरी कोरियामा ब्रेन ट्युमरको समस्या भई उपचार गराइरहेका नेपाली युवा संजय खत्रीका लागि संस्थाको तर्फबाट ६ लाख ५० हजार वन सहयोग गरिएको बताइएको छ।
नेपालमा कोरोना महामारीमा खटिने स्वास्थ्यकर्मीलगायत संक्रमितकालागि स्वास्थ्य सामग्री सहयोग गर्ने हेतुले सञ्चालित ‘एक व्यक्ति एक किट अभियान’का लागि यहाँका नेपालीबाट संकलित १४ करोड ९६ लाख ७५ हजार ७ सय ७९ कोरियन वन रकमबाट आवश्यक स्वास्थ्य सामग्री नेपाल सरकारलाई हस्तान्तरण गरिएको उल्लेख छ।
संस्थाले कोरोना महामारी सुरु हुनुभन्दा पहिले नै नेपाल गएका नेपाली ईपियस श्रमिक महामारीका कारण कोरिया फर्किन नपाई समस्यामा परेको र उनीहरुको रोजगारी गुम्ने अवस्था आएको भन्ने गुनासो आएपछि उनीहरुलाई फर्काउन नेपाल सरकारसँग नीतिगत निर्णय गराई कोरिया फर्काएको थियो।
रोजगारी गुम्ने अवस्थामा पुगेका ७ सयभन्दा धेरै नेपाली ईयिस श्रमिक कोरिया फर्काएर रोजगारी सुनिश्चित गर्न सहयोग पुगेको संस्थाको भनाइ छ।
त्यस्तै कोरोना महामारीका कारण कोरियाबाट नेपाल फर्किन नपाएका नेपालीका लागि स्वदेश फर्काउने विषयमा सरकारसँग पहल गरी तीन पटकसम्म स्वदेश फर्काउने विषयमा समन्वय समेत गरेको जनाएको छ।
कोरोना महामारीका कारण स्वदेश फिर्ता हुन नपाएका नेपालीलाई लक्षित गरी संस्थाले सिओल, सुवन र किम्हेमा आवासगृह सञ्चालनमा ल्याएको उल्लेख छ।
महामारीकै समयमा कोरियामा रहेका नेपालीलाई सचेतना र संयमताका लागि यहाँका सरकारी निकायमा आवद्ध विज्ञहरुलाई ल्याई तीन पटकसम्म भिडियो सचेतना कार्यक्रम गरिएको संस्थाले उल्लेख गरेको छ।
त्यस्तै कोरोना महामारीभन्दा पहिले नेपाल सरकारले घोषणा गरेको पर्यटन वर्ष २०२० सफल पार्नका लागि दूतावाससँगको सहकार्यमा कोरियामा नेपाल चिनाउने कार्यक्रमहरु गरिएको बताइएको छ।
त्यस्तै दूतावाससागको सहकार्यमा देशका विभिन्न ठाउँमा स्वदेश फिर्ती, गुनासाहरू सुन्नेलगायतका कार्यक्रमहरु गर्दै आएको संस्थाले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1792292945.webp)
-1786602170.png)
