काठमाडौं-कोरोना संक्रमण जारी रहेकै अवस्थामा महाधिवेशन गर्ने नयाँ विकल्पमाथि कांग्रेसमा छलफल हुन थालेको छ। जिल्लादेखि केन्द्रसम्म भेला गरेर अधिवेशन गर्न असहज अवस्था रहेकाले नयाँ ‘मोडालिटी’तय गर्न नेताहरुले सुझाएका छन्।
जिपी कोइराला लोकतन्त्र सम्वर्द्धन केन्द्रले महाधिवेशनमा केन्द्रित रहेर गरेको भिडिओ संवादमा पदाधिकारी र केन्द्रीय सदस्यले फागुनमा महाधिवेशन सम्भव नरहेको बताएका हुन्। उपसभापति विमलेन्द्र निधिले तल्लो तहका अधिवेशनको मोडालिटी परिवर्तन गर्ने पक्षमा आफू सकारात्मक रहेको बताए।
नेपाल बार एसोसिएसनले गर्ने अधिवेशनकै मोडालिटीमा तल्लो तहका अधिवेशन गर्न सकिने विकल्प उनले सुझाए। उनले भने,‘१६५ निर्वाचन क्षेत्रमा अधिवेशन गर्न सकिन्छ। महाधिवेशनलाई रोक्न हुँदैन।’
गत महिना भएको पदाधिकारी बैठकमा फागुनमा महाधिवेशन हुन नसक्नेमा एकमत जस्तै बनेको थियो। महाधिवेशन सार्नै पर्ने अवस्थामा जेठभन्दा पर लैजान नहुने धेरै नेताको मत छ। जिल्ला अधिवेशनमा भीडभाड हुन नदिन अधिवेशनलाई विकेन्द्रीकरणको ढाँचामा लैजानुपर्ने नेताहरुको राय छ। नयाँ ढाँचाले तल्लो तहको अधिवेशन गर्ने निर्णय केन्द्रीय समितिबाट हुनुपर्ने उनले बताए।
महाधिवेशनको कार्यतालिका कार्यान्वयन नभएको निधिले स्वीकारे। निर्वाचन समितिलाई समायोजनको पूर्ण अधिकार प्रत्यायोजन गर्दासमेत संगठन समायोजन हुन नसकेको उनले बताए। निर्वाचन समितिले पठाएका प्रतिनिधिलाई जिल्ला कार्यसमितिले असहयोग गर्दा समायोजन हुन नसकेको उनको बुझाइ छ।
समायोजनमा विवाद उत्पन्न भए त्यसको निराकरण गर्ने अन्तिम निकाय पनि निर्वाचन समिति नै भएको निधिले बताए। समायोजन सक्न साउन १० सम्मको समयावधि निर्वाचन समितिलाई दिइएको थियो। प्रदेश २ का अधिकांश जिल्लामा समायोजनको काम सकिएको छैन। जिल्लाले समायोजन सकेका केही जिल्लामा विवाद पनि छ।
महामन्त्री डा शशांक कोइरालाले डेढ महिनाभन्दा पर महाधिवेशन सार्न नहुने मत राखेका छन्। महाधिवेशन कार्यतालिका अनुसार काम नहुनुमा पदाधिकारी मुख्य जिम्मेवार रहेको प्रश्न उठेपछि उनले कोरोनाको कारण देखाए।
नेता कृष्ण सिटौलाले महाधिवेशनको तयारीमा पदाधिकारीको सक्रियता नदेखिएको बताए।
महाधिवेशन ढिलो हुँदा त्यसलगत्तै आउने निर्वाचनमा तयारीको अभाव हुने चिन्ता नेताहरुले गरेका छन्। आगामी भदाैसम्म महाधिवेशनको मिति पुर्याउँदा स्थानीय चुनावमा पार्टीको तयारी नपुग्ने नेता सिटौलाले बताए। कोरोनाको तत्काल खोप पत्ता लागेर कार्यान्वयनमा नआउने उल्लेख गर्दै उनले भने,‘महामारी सकेर महाधिवेशन गर्ने हो भने २/४ वर्ष कुनुपर्छ।’ महामारीकै क्रममा कतिपय मुलुकमा नियमित कार्य भएको सुनाउँदै पदाधिकारीको सक्रियताको अपेक्षा उनले गरे।
ठूलो संख्यामा भेला भएर अधिवेशन गर्न सम्भव नभएकाले तल्लो तहका अधिवेशनलाई अधिकतम रुपमा विकेन्द्रिकरण गर्न सुझाइएको छ।
अहिलेको पार्टीको गति हेर्दा आगामी भदौमा पनि महाधिवेशन हुनेमा नेता गगन थापाले शंका व्यक्त गरे। ‘प्रधानमन्त्री केपी ओलीलाई भोलि के हुन्छ नसोच्ने,तयारी नगर्ने हामीले भनिरहेका छौं। भोलि हामीलाई पनि सोधिनेछ।’ थापाले भने। नेकपाको सरकारले यो गरेन,त्यो गरेन भन्दै गर्दा कांग्रेसले आफूले चाहिँ अधिवेशन किन समयमा नगरेको प्रश्न उठ्ने उनले बताए। नेतृत्वलाई थापाले प्रश्न गरे। संकटका बेला पनि कांग्रेसले महाधिवेशन गर्न सकेको उदाहरण सरकारलाई देखाउनुपर्ने उनको तर्क छ।
जेठसम्म भेला भएर अधिवेशन गर्न नसकिने हुँदा विकल्प खोज्नुपर्ने उनले सुझाए। नेपाल बार एसोसिएनले गरेजस्तै अधिवेशन तल्लो तहमा गर्नुपर्ने उनले विकल्प अघि सारे। उनले भने,‘दुई हजार बढी भेला भएर जिल्ला अधिवेशनको त कल्पनै गर्न सकिन्न।’
जिल्ला अधिवेशन पनि वडा तहबाट गर्ने विकल्प उनले अघि सारे। अधिवेशन गर्ने विधि परिवर्तन बदल्न उनले केन्द्रीय समितिबाट निर्णय गराउन नेतृत्वसँग माग गरे।
कार्यतालिका अनुसार कार्यान्वयन नुहुनको मुख्य दोष पार्टी सभापतिको हुने उनले बताए। उनले भने,‘महाधिवेशन समयमा हुन सकेन भने सभापतिले मेरो असफलता हो भन्ने ठान्नुपर्छ।’ पार्टी सभापतिले पछिल्लो समयमा गरेका निर्णयले आसन्न महाधिवेशनको ‘फेयरनेश’मा शंका रहेको उनले बताए।
नेता प्रदीप पौडेलले सिद्धान्त र विचार छाडेर पार्टीमा उम्मेदवार को बन्ने होडबाजी सुरु हुनु दु:खद पक्ष रहेको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
