कोरोना अपडेट

विराटनगरमा ५ सय संक्रमित होम आइसोलेसनमा, मेयर भन्छन्- सीमामा कडाइ गरे संक्रमण घट्छ

प्रजु पन्त मंगलबार, भदौ ९, २०७७ १५:५५

काठमाडौं- विराटनगर महानगरपालिकामा सङ्क्रमित हुनेको सङ्ख्या पछिल्ला केही दिनयता घटन् थालेको छ। विराटनगर महानगरपालिकाका मेयर भीम पराजुलीका अनुसार पहिले दैनिक औसत २०/२५ जना सङ्क्रमित देखिएका थिए। अहिले १० देखि १५ जनासम्मा छ। पराजुलीका अनुसार महानगरमा कन्ट्याक्ट ट्रेसिङको दायरा बढाउनु, निषेधाज्ञा लगाउनु, निषेधाज्ञाको पालनामा कडाइ गर्नुले सङ्क्रमित कम देखिन मद्दत गरेको हो।

‘हामीले कन्ट्याक्ट ट्रेसिङको दायरा बढायौँ,’ मेयर पराजुलीले भने, ‘यदि यो चेन ब्रेक भएन भने सङ्क्रमित सङ्ख्या बढ्दैन।’ महानगरमा भदौ १० गतेसम्म निषेधाज्ञा छ। निषधाज्ञा बढाउने विषयमा छलफल भइरहेको पराजुलीको भनाइ छ।

सीमामा कडाइ नगरे पुःन फैलन्छ
भारतसँग सिमाना जोडिएको विराटनगरमा भारतका विभिन्न प्रान्तबाट मालबाहक ट्रक त आउँछन्। त्यस्तै खुला सीमाना भएकाले लुकिछिपी आउजाउ पनि हुन्छ। सिमानामा सेना परिचालन नगरे विराटनगरमा कोरोना सङ्क्रमण पुन फैलने मेयर पराजुली बताउँछन्।

‘संघीय सरकारले सिमानामा सेना परिचालन गर्नुपर्छ,’ मेयर पराजुलीले भने, ‘पहिलो तहमा सेना दोस्रोमा सशस्त्र र तेस्रोमा जनपथ परिचालन गरे कोरोना नियन्त्रण गर्न कुनै अप्ठ्यारो हुँदैन। यसले संघीय सरकालाई राजश्व पनि बढ्छ। चोरी निकासी पनि कम हुन्छ।’

मेयर भीम पराजुली

पराजुली तराईंका सबै जिल्लाको सीमामा सेना परिचालन गरे कोरोनाको भयावह स्थितिबाट धेरै मुक्ति मिल्ने बताउँछन्। उनले कोरोना संक्रमण नियन्त्रण गर्न सकिने तर यसका लागि योजनावद्ध रूपमा सबैको समन्वयमा काम गर्नुपर्ने बताउँछन्।

दुर्व्यवहार नगरौं
१५ दिन अघि अस्पताल छेउछाउ बस्ने स्वास्थयकर्मीलाई घरबेटीले कोठा छाड्न दबाब दिएको खबर महानगरमा आइपुग्यो। लगत्तै महानगरले घरबेटी र स्थानीयसँग छलफल गर्‍यो र स्वास्थ्यकर्मीमाथि कुनै पनि किसिमको दुर्व्यवहार नगर्न आग्रह गर्‍यो।

यो घटनापछि भने कुनै गुनासो नआएको महानगरका प्रशासकीय अधिकृत इन्द्रमणि पोखरेलले जानकारी दिए। ‘१५-२० दिन अघि अस्पताल वरपरका घरबेटीबाट स्वास्थ्यकर्मीमाथि कोठा छाड्न दबाब आएको कुरा आएको थियो,’ उनले भने, ‘हामीले त्यो समन्वय गरिसक्यौँ। सङ्क्रमितलाई पनि कुनै अपमानजनक व्यवहार गरेकोबारे जानकारी हामीलाई आएको छैन।’

विराटनगर महानगरपालिका- ८ मा ६४ जना सङ्क्रमित रहेका छन्। वडाध्यक्ष निश्चल निरौला सङ्क्रमितलाई छिछि र दुर्दुर नगरेपनि सङ्क्रमित बस्ने क्षेत्रमा स्यानिटाइज गर्न दबाब आउने गरेको बताउँछन्। ‘प्रत्यक्षरुपमा सङ्क्रमितलाई छिछि र दुर्दुर त गर्नुभएको छैन। तर अन्यको तुलानामा हेर्न दृष्टिकोण चाहिं फरक छ,’ निरौलाले भने, ‘बिरामीबाट प्रत्यक्ष गुनासो वडामा आएको छैन।’

वडा नम्बर ९ बढी सङ्क्रमित भएकोमध्ये दोस्रो स्थान हो। वडाध्यक्ष विश्वनाथ भगतका अनुसार टोलबासीले टाढैबाट सङ्क्रमितसँग बोलचाल गरिरहेको बताए। ‘होम आइसोलेसनमा बसेकाहरुलाई टोलबासीले नराम्रो व्यवहार गरेका छैनन्,’ भगतले भने, ‘बरु टाढैबाट सुरक्षित भएर हालखबर सोधिरहेका छन्। सङ्क्रमितले मेरो क्षेत्रमा नराम्रो व्यवहार सहनु परेको छैन।’

होम आइसोलेसनमा ५ सय जना
हालसम्म कोरोना सङ्क्रमितको सङ्ख्या ८ सय ३१ जना पुगेको छ। विराटनगर महानगरपालिकाले उपलब्ध गराएको तथ्याङ्कअनुसार सबैभन्दा धेरै सङ्क्रमित वडा नम्बर ८,९ र १२ मा देखिएका छन् भने हालसम्म वडा नम्बर १९ मा कोही पनि सङ्क्रमित देखिएका छैनन्। सङ्क्रमितमध्ये आधाभन्दा बढी ‘होम आइसोलेसन’मा छन्।

अस्पताल अभावका कारण ५ सय जना होम आइसोलेसनमा बस्न बाध्य भएका हुन्। महानगरमा भएको १ सय ६ बेडको आइसोलेसन, विभिन्न संस्थाले चलाएको आइसोलेसनमा स्थान नभएकोले सङ्क्रमित घरै बस्न बाध्य भएको विराटनगर महानगरपालिकाका प्रशासकीय अधिकृत इन्द्रमणि पोखरेलले बताए।

‘यहाँको प्रमुख समस्या भनेको सङ्क्रमितको लागि पर्याप्त स्थान नहुनु हो,’ पोखरेलले भने, ‘सङ्क्रमितहरु घरमै बस्न बाध्य भएका छन्।’

१९ वटा वडाको कोरोना सङ्क्रमितको तथ्याङ्क (८ गते सम्म)

वडा नम्बर	संक्रमितको संख्या
१	१३
२	४६
३	५२
४	२२
५	५३
६	७६
७	४०
८	६४
९	७४
१०	३१
११	५३
१२	१११
१३	२१
१४	१६
१५	४१
१६	२७
१७	२६
१८	४
१९	०