सिओल- कोरियाको देजङस्थित चुङनाम नेस्नल युनिभर्सिटीमा नेपालीको नाम गरेका एक व्यक्तिको शव बेवारिसे बनेको छ। जसबहादुर पुन नाम भएका उक्त व्यक्तिको परिवार र स्थायी ठेगाना पहिचान हुन नसक्दा शव बेवारिसे बनेको हो।
क्यान्सर पीडित रहेका पुनको गत अगस्ट १५ मा मृत्यु भएपनि हालसम्म ठेगाना पहिचान हुन नसक्दा शव अस्पतालमै बेवारिसे बनेको छ। शव पुनकै निवासमा फेला परेपनि राहदानीलगायत कुनैपनि कागजात प्राप्त नहुँदा उनी नेपाली नै भएको वा नेपाली मुलका अन्य देशका नागरिक भएको भन्ने विषयमा यकीन हुन नसकेको कोरियन प्रहरीलाई उद्धृत गर्दै नेपाली दूतावास सिओलले जनाएको छ।
प्रहरीले मृतकको औँठा छापका आधारमा उनी जसबहादुर पुन नाम गरेका नेपाली भएको बताउँदै सम्बन्धित अध्यागमनसँग समन्वय गरेर शवको व्यवस्थापन गर्न नेपाली दूतावाससँग आग्रह गरिएको छ। तर अध्यागमन विभागले भने दूतावाससँग समन्वय गर्न आनाकानी गर्दा पहिचान गर्न ढिलाइ भएको नेपाली दूतावास सिओलका उपनियोग प्रमुख रामसिंह थापाले बताए।
थापाले भने, ‘हामीले देजङस्थित अध्यागमन विभागलाई मृतकका विषयमा विवरण उपलब्ध गराउन अनुरोध गर्दै पत्राचार गरेपनि अध्यागमनले प्रहरीसँग नै समन्वय गर्न भन्यो। अब भोलिसम्ममा फेरि प्रहरीसँग बुझ्छौं त्यसपछि थाहा होला।’
दूतावासले शवको पहिचानमा सहयोग गर्न गैरआवासीय नेपाली संघ दक्षिण कोरियासँग आग्रह गरेको र संघले पनि प्रयास गरिरहेको बताएको थापाले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1792292945.webp)
-1786602170.png)
