काठमाडौं–काठमाडौं महानगरपालिका ३० मा दिनप्रतिदिन संक्रमित बढ्दै गएका छन्। वडाध्यक्ष दलबहादुर कार्कीका अनुसार यस वडामा पर्ने मैतीदेवि, ज्ञानेश्वर, धोबीचौर, रातोपुल क्षेत्रमा संक्रमण फैलिएको छ। कार्कीका अनुसार अहिलेसम्म यो वडामा संक्रमितको संख्या २५ पुगेको छ। तर उनीहरु वडाको सम्पर्कमा नआउँदा समुदायस्तरमा फैलिने जोखिम बढेको छ। त्यस्तै संक्रमित भएकाहरु मोबाइल स्वीच अफ गरेर बस्दा कुन संक्रमित कता छन् भन्ने नै वडाले पत्तो पाएको छैन। ज्ञान भैरव मन्दिरको उत्तरपट्टि कोरोना संक्रमण समुदायस्तरमा नै फैलिएको कार्कीले जानकारी दिए।
यो वडामा बैंकमा काम गर्ने कर्मचारी, घरेलु कामदार, लकडाउन खुलेपछि बाहिरबाट आएका व्यक्ति र ठाउँ-ठाउँमा कार्यालय सार्नेले कोरोना संक्रमण बढेको वडाध्यक्ष कार्कीको भनाइ छ। ‘यो वडामा बसोबास गर्नुहुने दाजुभाइ दिदिबहिनीलाई मैले पटक–पटक भनेको छु। यो संक्रमणको महामारी रहुन्जेल घरेलु कामदार नलगाउनु,’ कार्कीले भने, ‘कसैले टेर्नुभएको छैन । एउटै कामदार धेरै घरमा काम गर्न जाने हुँदा समुदायस्तरमा कोरोना फैलियो।’
संक्रमित फोन अफ गरेर सम्पर्कविहीन
वडाध्यक्ष कार्कीका अुनसार यो वडामा २ सय ५० जनालाई पिसीआर परीक्षण गरिएकोमा २५ जना संक्रमित छन्। एकजना बैंकमा काम गर्नेलाई बैंकले नै होटलमा राखेको छ। त्यस्तै वडाको सम्पर्कमा आएका ४ जनालाई अस्पतालमा राखिएको छ भने १२/१३ जना सम्पर्कमा आएकाहरु घरमै सुरक्षित बसिरहेको तर बाँकी संक्रमित वडाको सम्पर्कमा आएका छैनन्। ‘क-कसले स्वाब परीक्षण दिन जानुभएको थियो। वडालाई जानकारी छैन,’ कार्कीले भने, ‘रिपोर्ट आएपछि संक्रमित खोजिदिनु भनि फोन आउँछ। हामीले फोन गर्दा संक्रमितकाे फोन अफ छ, अब कता खोज्न जानु ? संक्रमित नै हराए।’
मगंलबार पनि स्वाब संकलन गरेर दिएकाले संक्रमितकाे संख्या बढ्न सक्ने वडाध्यक्ष कार्कीको भनाइ छ। संक्रमितको मोबाइल त अफ छ नै। काठमाडौं महानगरपालिकाको स्वास्थ्य महाशाखाले समेत वडालाई नसघाएको वडाध्यक्ष कार्काीले गुनासो गरे। ‘महानगरपालिकाको कार्यालयमा फोन गरेको गर्यै छु। फोन अफ छ,’ कार्कीले भने, ‘संक्रमित त हराए नै महानगर पनि हरायो।’
वडामा न अस्पताल, न क्वारेन्टाइन
वडाध्यक्ष कार्कीका अनुसार यो वडामा गतिलो अस्पताल छैन। क्लिनिकमा गएका बिरामी क्लिनिकमा नै ससंक्रमित हुने अवस्थामा पुगेका छन्। केही समयअघि वडाले यहाँ रहेका विद्यालयलाई क्वारेन्टाइन र आइसोलेन कक्ष बनाउन नखोजेको हैन तर स्थानीयले बिरोध गरेपछि क्वारेन्टाइन पनि बन्न सकेन। पार्टी प्यालेस र वडाको समेत आफ्नै भवन नहुँदा बिरामीलाई नै राख्ने स्थान छैन। ‘वडाको आफ्नो भवन बनाउन २ वर्षदेखि महानगरमा भन्यौं, अहिलेको महामारीमा क्वारेन्टाइन छैन। केही व्यवस्था गरौँ भनेर पटक पटक महानगरमा भनेँ तर कसैले सुनेनन्,’ वडाध्यक्ष कार्कीले भने, ‘अहिले कोही बिरामी भएर एम्बुलेन्स बोलायो भने १०/१२ घण्टा कटेपछि आउँछ यसरी त कसरी काम गर्न सकिन्छ र?’
कार्कीका अनुसार गगन थापा स्वास्थ्य मन्त्री भएका बेला राम्रो अस्पताल बनाउने भनेर एक करोड ४० लाख बजेट आएको थियो तर भनेजस्तो जग्गा नपाउँदा र केही स्थानमा स्थानीयले विरोध गर्दा अस्पताल नबनी उक्त रकम फिर्ता गयो। ‘अस्पताल बनाउन बजेट आएको थियो तर बन्न सकेन,’ उनले भने, ‘अहिले त्यसैको प्रभाव देखिरहेको छ । यत्रो महामारीमा न अस्पताल न क्वारेन्टाइन।’
महानगर र स्थानीयले सहयोग गरे रोक्न सकिने कार्कीको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
