प्राधिकरणले ल्याएको ४१ अर्बको बजेटमा कुन विमानस्थललाई कति?

पर्यटन-उड्डयन

उत्तम काप्री शुक्रबार, साउन २३, २०७७ १८:१५

काठमाडौं– नेपाल नागरिक उड्डयन प्राधिकरणले चालु आर्थिक वर्ष २०७७/०७८ का लागि ४१ अर्ब ११ करोड ३ लाख रुपैयाँको बजेट सार्वजनिक गरेको छ। जसमा आन्तरिक तथा अन्तर्राष्ट्रिय विमानस्थल विस्तारदेखि नयाँ निर्माणको विषयलाई प्राथमिकतामा राखिएको छ।

प्राधिकरणले त्रिभुवन अन्तर्राष्ट्रिय विमानस्थलको धावनमार्गको उत्तरतर्फ एप्रोन तथा प्यारलल ट्याक्सी वे निर्माणका लागि १ अर्ब ९१ करोड २३ लाख बजेट विनियोजन गरेको छ। यसैगरी त्रिभुवन अन्तर्राष्ट्रिय विमानस्थलको धावनमार्गको दक्षिणतर्फ प्यारलल ट्याक्सी वे निर्माणका लागि १ अर्ब ४६ करोड १ लाख बजेट विनियोजन भएको छ।

यसबाहेक पूर्वाधारतर्फको बजेट
- त्रिभुवन अन्तर्राष्ट्रिय विमानस्थलको टर्मिनल भवन विस्तार तथा स्तरोन्नतिका लागि ४० करोड।
- त्रिभुवन अन्तर्राष्ट्रिय विमानस्थलमा बुटिक एयरपोर्टको अवधारणाअनुसार बाँकी काम पूरा गर्नका २८ करोड।
- गौतमबुद्ध अन्तर्राष्ट्रिय विमानस्थलको धावनमार्ग तथा टर्मिनल भवन निर्माणका लागि ३ अर्ब २८ करोड।
- पोखरा अन्तर्राष्ट्रिय विमानस्थल निर्माण भवन तथा धावनमार्ग समेतका लागि १० अर्ब २५ करोड बजेट विनियोजन।
- निजगढ विमानस्थल निर्माणका लागि १९०० हेक्टर क्षेत्रफलमा रहेका रुख कटान तथा साइड क्लिरेन्सका लागि ३ करोड।
- निजगढ विमानस्थलको पेरिफेरी रोड निर्माणका लागि ५ करोड।
- ताप्लेजुङ्ग विमानस्थलको धावनमार्ग विस्तार कार्यका लागि २ करोड।
- ईलाम, गुल्मी, डोल्पा, मसिनेचौर, कालिकोट, बझाङ, बलेवा विमानस्थलको धावनमार्ग पक्की गर्न आवश्यक बजेट।
- तुम्लिङ्टार, राजविराज, सुर्खेत र सिमरा विमानस्थलको धावनमार्ग ओभरले गर्नका लागि आवश्यक बजेट।
- लुक्ला तथा सिमीकोट विमानस्थलमा एप्रोन तथा हेलिप्याड निर्माणका लागि आवश्यक बजेट।
- विराटनगर, रामेछाप, रारा, तुम्लिङटार, साफेबगर, नेपालगंज, सिमरा विमानस्थलमा टावर टर्मिनल भवन निर्माणका लागि आवश्यक बजेट विनियोजन भएको छ।

जग्गा प्राप्तीतर्फ
- गौतमबुद्ध अन्तर्राष्ट्रिय विमानस्थलको लागि अधिग्रहण गरिएको जग्गाको मुआब्जा वितरण गर्न २ अर्ब १६ करोड ८३ लाख।
- निजगढ अन्तर्राष्ट्रिय विमानस्थलका लागि अधिग्रहण गरिएको जग्गाको मुआब्जा वितरण गर्न २० करोड।
- पोखरा अन्तर्राष्ट्रिय विमानस्थलका लागि अधिग्रहण गरिएको जग्गाको मुआब्जा वितरण गर्न ७८ करोड।
- त्रिभुवन अन्तर्राष्ट्रिय विमानस्थलका लागि अधिग्रहण गरिएको जग्गाको मुआब्जा वितरण गर्न ८० करोड।
- ताप्लेजुङ्ग, चन्द्रगढी, विराटनगर, रामेछाप, सुर्खेत, नेपालगंज, धनगढी, जुम्ला, राजविराज र डोटी विमानस्थल विस्तारको लागि आवश्यक जग्गा अधिग्रहण गर्न ६१ करोड।
- दाङको नारायणपुरमा नयाँ विमानस्थल निर्माणका लागि जग्गा अधिग्रहणका लागि ५० लाख बजेट।

यान्त्रिकरण तर्फ
- विराटनगर, राजविराज, थामखर्क, फाप्लु, नेपालगंज, दाङ, रारा, डोटी, साफेबगर, बलेवा, रुम्जाटार र सिमिकोट विमानस्थलमा एटीसी टावर कन्सोल जडानका लागि ८ करोड।
- डोटी, साफेबगर, राजविराज, रुकुम, जनकपुर, सिमरा, बलेवा, रारा, चन्द्रगढी, भरतपुर विमानस्थलमा मौसमी सूचना प्रणाली जडान तथा स्तरोन्नतिका लागि ४ करोड २६ लाख।
- गौतमबुद्ध अन्तर्राष्ट्रिय विमानस्थल संचालनका लागि यन्त्र तथा उपकरण खरिद तथा जडानका लागि ६० करोड।
- गौतमबुद्ध अन्तर्राष्ट्रिय विमानस्थल, चन्द्रगढी, जनकपुर, सिमरा, भरतपुर र धनगढी विमानस्थलमा एक्सरे खरिद तथा जडानका लागि १४ करोड।
- काठमाडौं, धनगढी, भैरहवा र नेपालगंज विमानस्थलमा एडीएस बी संचालका लागि ३ करोड।
- गौतमबुद्ध, लुक्ला, विराटनगर र नेपालगंजमा विमानस्थलमा इएफएस प्रणालीको जडान गर्नलाई १० करोड।
- अन्तर्राष्ट्रिय विमानस्थलमा सियुपिपिएस र बिआरएस सेवाका लागि २५ करोड।
- गौतमबुद्ध अन्तर्राष्ट्रिय विमानस्थलमा फायर भेकल खरिदका ४१ करोड १० लाख।
- डाटा सेन्टर स्थापनाका लागि ५ करोड।
-त्रिभुवन अन्तर्राष्ट्रिय विमानस्थलमा ब्यागेज ह्यान्डलिङ प्रणालीका लागि ५ करोड ६० लाख।
-फ्लाइट निरीक्षण प्रविधिका ५ लागि करोड।