काठमाडौं- साउन २ गते अकस्मात् नेकपा स्थायी कमिटी बैठक स्थगित भएपछि नेता सुरेन्द्र पाण्डेले ‘अब कति सर्ने हो! लाजैमर्दो भो’ भन्दै दिक्क मान्दै ट्विट गरे। बिहान १२ बजे स्थगित भएको बैठक दिउँसो ३ बजेका लागि बोलाइएको भएपनि नेता पाण्डेले दिक्दारी व्यक्त गरेका थिए।
बैठक बस्ने र स्थगित हुने बारम्बारको खबरले स्थायी कमिटीका धेरै नेतालाई आजित बनाएको छ। नेकपाका कुनै पनि समितिका बैठक हत्तपत्त बस्दैनन्। अध्यक्ष तथा प्रधानमन्त्री केपी शर्मा ओली बैठक बोलाउन पनि हत्तपत्त राजी हुँदैनन्। बैठक सुरु भइहाले पनि छिनभरमा सुरु हुने र निमेषभरमा अन्त्य हुने खबरले स्थायी कमिटी बैठक कति बेला बस्छ र कति बेला स्थगित हुन्छ धेरै नेताहरूलाई पत्तो हुँदैन।
असार १० गतेबाट सुरु भएको स्थायी कमिटी बैठक २७ दिनमा ६ दिन मात्रै बैठक बसेको छ। यही अवधिमा ११ पटक त स्थगित नै भएको छ। असार १० गतेदेखि सुरु भएको बैठकको पहिलो दिन ११ गतेसम्मलाई स्थगित गरिएको थियो। १२ र १३ गते स्थायी कमिटी बैठक चलाएर १४ गते मदन जयन्ती र १५ गते धान दिवस मनाउन भन्दै दुई दिन बैठक स्थगित भयो।
असार १४ मा मदन जयन्तीका दिन प्रधानमन्त्री केपी ओलीले संविधान संशोधन गरी नयाँ नक्सा जारी गरेपछि सरकारविरुद्ध दिल्ली र काठमाडौंका कोठाचोटामा षड्यन्त्र भएको अभिव्यक्ति दिए। यसपछि नेकपामा चर्किएको विवाद पुन उत्कर्षमा पुग्यो। असार १६ गते बसेको बैठकमा अध्यक्ष प्रचण्डसहित ६ सचिवालय सदस्य ३० भन्दा धेरै स्थायी कमिटी सदस्यले ओलीको प्रधानमन्त्री र पार्टी अध्यक्ष दुवै पदबाट राजीनामा मागेपछि विवादले शिखर चुम्यो।
सुरुदेखि नै प्रधानमन्त्री तथा अध्यक्ष ओलीका गतिविधि आलोचना गर्दै आएका अर्का अध्यक्ष प्रचण्डसहितका नेताहरुलाई ओलीको अभिव्यक्ति मसाला बन्न पुग्यो। त्यही विषयलाई लिएर नेकपामा विवाद चर्किँदै जाँदा स्थायी कमिटी बैठक त्यसको शिकार भएको छ। पार्टीमा चर्किएको विवाद टुंगो लगाउन एकपक्षीय र बहुपक्षीय रूपमा दर्जनभन्दा धेरै पटक छलफल भएपनि विवाद 'ज्युँका त्युँ' छ।
पटकपटक बैठक स्थगित हुँदा आफूलाई सबैभन्दा धेरै गाह्रो भएको गण्डकी प्रदेशका मुख्यमन्त्री एवम् स्थायी कमिटी सदस्य पृथ्वीसुब्बा गुरुङले बताए। लामो समयदेखि बैठक स्थगित हुने र चल्ने भईरहँदा पोखरा र काठमाडौंको आवतजावत यहीबीचमा मात्र ८ पटक भएको गुरुङले बताए।
‘बैठक सुरु हुँदा आर्थिक वर्षको अन्तिम अन्तिम बेला थियो। क्याबिनेट बैठक गरेर सुल्झाउनु पर्ने थियो। अरु महत्वपूर्ण विधेयक पनि अल्झिरहेका थिए। फुकाउन प्रतिपक्षी दलका नेतासंग छलफल गर्नुपर्ने थियो,’ नेपाल लाईभसँग कुराकानी गर्दै मुख्यमन्त्रीसमेत रहेका स्थायी कमिटी सदस्य गुरुङले भने, ‘काठमाडौं-पोखरा आउँदैजाँदै काम गरेँ। अहिलेसम्म बैठकको बीचमा मात्रै ८ पटक आउने जाने भएछ।’
बैठककै बीचमा गण्डकी प्रदेशमा बाढी पहिरोबाट जनधनको ठूलो क्षति हुँदा समस्या भएको गुरुङले सुनाए। ‘यही बीचमा यति धेरै बाढी पहिरो आयो कि बाढीपहिरोबाट सबैभन्दा धेरै प्रदेश प्रताडित भयो। म्याग्दीका गाउँगाउँमा पुग्नु थियो,’ गुरुङले भने, ‘म्याग्दीबाट पोखरा र्झन पाएको थिएन, बैठक भयो भनेर बोलाइयो। काठमाडौँ दौडिएर आएँ।’
बाढीपहिरोबाट तनहुँ, स्याङजा लमजुङलगायत क्षेत्रमा आफैँ घटनास्थल पुग्न नपाउँदा उकुसमुकुस भएको गुरुङले सुनाए।
000
कम्युनिस्ट पार्टीको स्थायी कमिटी बैठकको महत्व नेताहरुले नै नबुझेको स्थायी कमिटी सदस्य गणेश साहको धारणा छ। स्थायी कमिटी बैठकलाई अनिर्णयको बन्दी बनाएको भन्दै साहले तीतो पोखे।
पार्टीका प्रवक्ता नारायणकाजी श्रेष्ठले शीर्ष नेतृत्वबीच सहमति कायम नहुँदासम्म बैठक समापन नहुने बताए। पार्टीमा जति छिटो सहमति हुन्छ, त्यति छिटो बैठक सकिने श्रेष्ठको भनाई छ।
२७ दिनमा ११ पटक बैठक स्थगित
अध्यक्ष ओलीले बैठक नै राख्न नमानेपछि बैशाख १० गते २० स्थायी कमिटी सदस्यहरुले दुवै अध्यक्षलाई पत्र लेखे। नेताहरुले स्थायी कमिटी बैठक निरन्तर माग गरेपछि असार १० गतेदेखि स्थायी कमिटी बैठक सुरु भयो। पहिलो दिन अध्यक्ष ओली प्रचण्डले मात्रै धारणा राखेर १२ गतेसम्म बैठक स्थगित भयो। असार १२ गते बसेको बैठक असार १४ र १५ गते स्थगित भयो। १६ गते बैठक सुरु भयो।
असार १६, १७ र १८ गते स्थायी कमिटी बैठक बसी १९ गते स्थगित गरी २० गतेका लागि बैठक बोलाइयो। पार्टीमा सहमति हुन नसकेपछि पुनः असार २२ गतेसम्मका लागि स्थगित भयो। असार २२ गते बैठक बस्न नसकेपछि २४ गतेका लागि बोलाइयो। फेरि असार २४ गते पनि बैठक बस्न नसकेपछि असार २६ गतेका लागि तय भएको थियो।
असार २६ गते बाढी पहिरो आएको भन्दै साउन २ गते बिहान ११ बजे बैठक बोलाइयो। शुक्रबार बिहान ११ बजे बैठक बस्न नसकेपछि दिउँसो ३ बजेका लागि बैठक सारियो। ३ बजे पनि बैठक बस्न नसकेपछि आइतबार दिउँसो ४ बजेसम्मका लागि बैठक स्थगित भयो।
साउन ४ गते बैठक बस्न नसकेपछि साउन ६ गते बिहान ११ बजे बस्ने तय भयो। बिहान ११ बजे बैठक बस्न नसकेपछि दिउँसो एक बजे बैठक बोलाएपनि एक घण्टा बस्न नपाउँदै बाढीपहिरोबाट जनधनको क्षति भएकाले साउन १३ गतेसम्म बैठक स्थगित गरिएको जानकारी गराइएको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
