काठमाडौं-तारागाँउ रिजेन्सी होटल ‘हायात’ र ओरियण्टल होटल ‘र्याडिसन’ले चालु आर्थिक वर्षको तेस्रो त्रैमासिक वित्तीय विवरण सार्वजनिक गरेका छन्। चैत मसान्तसम्मको वित्तीय विवरण अनुसार तारागाँउको नाफामा २७.७० प्रतिशत र ओरियण्टलको नाफामा ४४.७१ प्रतिशतले गिरावट आएको छ।
विश्वव्यापी रुपमा फैलिएको कोरोना भाइरस (कोभिड-१९) को प्रभावले तेस्रो त्रैमासको व्यापारमै प्रभाव पारेको होटलले जनाएका छन्। माघदेखि नै विदेशी पर्यटकको आवागमन प्रभावित भएको थियो। विश्वव्यापी रुपमा फैलिएको कोरोना भाइरसको प्रत्यक्ष असर पर्यटन व्यवसायमा पर्न गई व्यवसाय ठप्प भएकाे होटलले स्पस्टीकरण दिएका छन्। यसले गर्दा होटलको आगामी अवधिको बिक्री तथा नाफामा समेत नकारात्मक प्रभाव पर्ने उनीहरुले जनाएका छन्।
कोरोनाका कारण राष्ट्रिय तथा अन्तर्राष्ट्रिय हवाई उडान ठप्प छन्। जसले गर्दा विदेशी पर्यटक आउन सक्ने अवस्था छैन। यहीकारण चौथो त्रैमासको नाफामा पनि धेरै ठूलो गिरावट आउने होटलले उल्लेख गरेका छन्।
तारागाँउले चैत मसान्तसम्ममा २५ करोड ७८ लाख रुपैयाँ नाफा आर्जन गरेको छ। गत वर्षको सोही अवधिमा होटलको नाफा ३५ करोड ६५ लाख रुपैयाँ थियो। तारागाउँले होटल व्यवसाय सञ्चालन गरेर ८५ करोड ८८ लाख रुपैयाँ आर्जन गरेको छ। गत वर्षको सोही अवधिमा होटलको आम्दानी एक अर्ब चार करोड रुपैयाँ थियो। यसै अवधिमा खर्च भने २८ करोड दुई लाख रुपैयाँ छ।
होटलको चुक्ता पुँजी एक अर्ब ८८ करोड रुपैयाँ छ भने जगेडा कोषमा ५५ करोड ५६ लाख रुपैयाँ छ। तेस्रो त्रैमासिक अवधिमा होटलको प्रतिशेयर आम्दानी १८.२१ रुपैयाँ छ भने प्रतिसेयर नेटवर्थ १३४ रुपैयाँ छ।
त्यस्तै ओरियण्टल होटलले बुधबार सार्वजनिक गरेको चैत मसान्तसम्मको वित्तीय विवरणअनुसार उक्त हाेटलले ११ करोड ४६ लाख रुपैयाँ नाफा आर्जन गरेको छ। गत वर्षको सोही अवधिमा होटलको नाफा २० करोड ७४ लाख रुपैयाँ थियो। सरकारले कोभिड-१९ नियन्त्रणका लागि लकडाउन गर्दा यसै अवधिमा होटलको नाफामा ४४.७१ प्रतिशतले गिरावट आएको हो।
होटलले यसै अवधिमा ६९ करोड तीन लाख रुपैयाँ आम्दानी गरेको छ। गत वर्षको यही अवधिमा ८७ करोड ६१ लाख रुपैयाँ आर्जन गरेको थियो। लकडाउन अगाडि पर्यटकको आवागमनमा भएको कमिले नै व्यवसाय प्रभावित भैसकेको थियो।
होटलको चुक्ता पुँजी एक अर्ब १२ करोड रुपैयाँ छ भने जगेडामा एक अर्ब १३ करोड रुपैयाँ छ। तेस्रो त्रैमासिक अवधिको नाफा अनुसार होटलको प्रतिशेयर आम्दानी १३.५५ रुपैयाँ छ भने प्रतिसेयर नेटवर्थ २०० रुपैयाँ रहेको छ।
सेयरमूल्यमा भने वृद्धि
सरकारले चार महिनादेखि लकडाउन गर्दा होटल तथा पर्यटन व्यवसाय सबैभन्दा धेरै प्रभावित छ। यो क्षेत्रले नाफा त परै जाओस् नियमित खर्च व्यवस्थापन गर्न पनि ऋण गर्नु पर्ने अवस्था छ। तर दोस्रो बजारमा सूचीकृत दुई होटलको शेयर मूल्यमा केही दिनदेखि लगातार मूल्य बढिरहेको छ। एक होटल सञ्चालकका अनुसार होटलले बजार प्रभावित हुने गरि केही निर्णय गरेको छैन। तर बजार भने लगातार बढिरहेको देख्दा आफू अचम्भित भएको उनले प्रतिक्रिया दिए।
विगत एक महिनामा तारागाँउ रिजेन्सीको बजार मूल्यको उतारचढाव
विगत एक महिनामा ओरियण्टल होटलको बजार मूल्यको उतारचढाव
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790307658.jpeg)
-1786602170.png)
