फाइल फोटो
काठमाडौं- सत्तारुढ नेपाल कम्युनिस्ट पार्टी (नेकपा) का वरिष्ठ नेता झलनाथ खनालले सरकारको काम र नीतिहरुको चर्को आलोचना गरेका छन्। साहना प्रधान प्रतिष्ठानद्वारा सोमबार साँझ आयोजित ‘नेकपाको आजको समस्या के हो? सम्भावना के हो?’ विषयक अन्तरक्रियामा बोल्दै खनालले पार्टीलाई पुनर्गठन गर्नु अत्यन्त आवश्यक रहेको बताए।
उनले ओलीको नेतृत्वमा सरकार गठन भएदेखि नै गलत नीतिहरु अनुशरण गरेको बताए। ‘तीन वर्षको अवधिमा तीन वटा बजेट आए। तर हाम्रा आर्थिक नीति के हुने, बजेट कसरी वितरण गर्ने, मुलुकको अर्थतन्त्रलाई कसरी विकास गर्ने, मौद्रिक नीतिहरु के हुने भन्ने जस्ता विषयमा पार्टीमा छलफल हुनसकेन’, उनले भने, ‘हामी समाजवादको दिशातर्फ अघि बढ्ने अवस्थामा आमी आइपुगेका थियौं। त्यसका लागि कस्तो अर्थतन्त्र चाहिन्छ? के नवउदारवादको बाटोबाट हामी अगाडि बढ्न सक्थ्यौं। तीनवटा बजेटलाई हेर्यौं भने नवउदारवादको बाटोबाट बजेट कतै दायाँबायाँ गरेको देखिँदैन। समाजवादको कदम चालेको देखिँदैन।’
उनले यस बीचमा भएका नियुक्तिहरुमा पनि पार्टीको नीति र निर्णयलाई मतलब नराखिएको बताए। ‘एकलौटी नियुक्ति भए। एउटा गुटको हैसियतले काम गरियो’, उनले भने।
उनले केपी ओलीको नेतृत्वमा एउटा गुट खडा भएको तथा पार्टी एकातिर र गुट अर्कोतिर भएको बताए। ‘गुट र पार्टीका बीचमा अन्तरविरोधहरु खडा हुँदै गए। गुट र पार्टीका बीचमा अहिले अन्तरविरोध खडा भएका छन्’, उनले भने।
उनले सरकार गठन भएदेखिका अढाइ वर्षका अनुभव अत्यन्त तीता भएको बताए।
खनालले अहिलेको ठाउँबाट हेर्दा पार्टीको तीनवटा भविष्य देखिने बताए। प्रस्तुत छ, उनकै शब्दमा उनले देखेका सम्भावनाहरुः
पहिलो, यथास्थितिमा जाने। पार्टी फुट्ने पो हो कि भन्ने डरले, केपी ओलीले विभिन्न त्रासहरु देखाइरहनुभएको छ, त्यसबाट त्रसित भएर उहाँलाई नै हामीले राखिछाडौं, उहाँलाई नै प्रधानमन्त्री र अध्यक्ष बनाइराखौं, पार्टीमा अरु केही पनि नगरौं, उहाँले जे जे गर्नुहुन्छ, त्यही फलो गरेर जाऔं, उहाँलाई पाँचौं वर्षसम्म त्यो पदमा रहिरहन दिऔं, भनेर हामी जाने हो भने हामी ‘रुट आउट’ हुँदैछौं। हाम्रो जुन जनमत हो, त्यो समाप्त हुँदैछ। विगतमा हामीले जुन खालको जनमत प्राप्त गरेका थियौं, यो अढाइ वर्षमा त्यो आधाले खुम्चिसकेको छ।
जताततै अहिले सरकारको विरोध बढिरहेको छ। एकपछि अर्का अनियमितलाई सरकारले नियन्त्रण गर्न सकेको छैन। भ्रष्टाचारको काण्डलाई नियन्त्रण गर्न सकेको छैन। त्यसले गर्दा जनतामा सरकारको अलोकप्रियता निरन्तर चुलिँदै गएको अवस्था छ। हामीले जवाफ दिनसक्ने अवस्था छैन। प्रधानमन्त्रीले कुनै किसिमको अनियमितता भएको छैन भनेर जवाफ दिनुहुन्छ। त्यस्ता जवाफले आम जनताका जिज्ञासाहरु मेटिँदैन। अहिलेकै अवस्थाबाट अगाडि जाने हो भने हाम्रो भविष्य अन्धकार देखिन्छ। त्यसैले हामीले नयाँ ढंगले नसोची हुँदैन।
दोस्रो, हामीले रिफर्म गर्नुपर्छ। सुधार गर्नुपर्छ। पार्टीभित्रै सुधार नगरी हुँदैन। सरकारलाई सुधार नगरी हुँदैन। हाम्रो नीति, प्रक्रिया र पद्धतिहरुमा सुधार नगरी हुँदैन। सुधार गरेर अघि बढ्यौं भने सरकारलाई क्रमशः पुनर्गठन गर्ने, नीतिहरुलाई पुनर्गठन गर्ने, कार्यक्रमहरुलाई पुनर्गठन गर्ने, नयाँ गतिका साथ पार्टीलाई परिचालन गर्ने गरेर अघि बढ्यौं भने पार्टीलाई पुनर्जीवन दिनसक्ने सम्भावना प्रवल छ। त्यसरी गयौं भने मात्रै आउने निर्वाचनमा फेस गर्न सक्ने अवस्थामा पुग्छौं। र फेरि नेकपाले बहुमत ल्याउन सक्ने अवस्थामा पुग्छौं।
अहिले हामीसँग दुई तिहाई बहुमत छ। त्यो मत त वर्तमान कमरेड केपी ओलीको सरकारले खाई नै सक्यो। फेरि दुई तिहाइको बहुमत तत्काल हामी कल्पना गर्न सक्दैनौं। यदि हामीले पार्टीलाई पुनर्जीवन दियौं। त्यही सिलसिलामा अर्को पटक बहुमत ल्यायौं भने पनि गनिमत भयो।
तेस्रो, हामीले सुधार नगरेर यथास्थितिवादबाटै अघि बढ्यौं भने अनिश्चित भविष्यतर्फ लाग्छौं। हाम्रो देश विश्वको महत्त्वपूर्ण देशको रुपमा चित्रित भइरहेको छ। स्थापित भइरहेको छ। किनकि हाम्रो देश तीनवटा शक्तिको प्रतिस्पर्धाको केन्द्र बन्दै गइरहेको छ, भारत, चीन र अमेरिका। भूराजनीतिक अवस्थितिलाई ध्यानमा राखेर हामीले ठीक ढंगका नीति लिएर अगाडि बढ्न सकेनौं भने कम्युनिस्ट पार्टी मात्रै होइन। अरु कुनै पनि राजनीतिक शक्ति टिक्न गाह्रो हुन्छ। त्यस्तो बेलामा शक्ति राष्ट्रहरुले भूमिका खेल्ने र परिणामस्वरुप नेपालचाहिँ अस्थिरताको कुचक्रबाट अगाडि बढ्ने सम्भावना हाम्रोसामु छन्।
विभिन्न सम्भावनाहरुलाई केलाउँदै हामीले सुधारको बाटो हिँड्दै पार्टीलाई पुनर्गठन, सरकारलाई पनि त्यही ढंगले पुनर्गठन गर्नुपर्छ। अब अढाई वर्ष बाँकी छ, त्यसबीचमा असल कामहरु गरेर हामीले आफूलाई नयाँ ढंगले स्थापित गर्नुको कुनै विकल्प छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
_OHnC2j8U2n-1781168997.jpg)
-1764146706.png)
