सिओल- पोखरा लेखनाथका राजु सापकोटा तीन महिनादेखि कोरियामा भिसा अवधि सकिएपछि नेपाल फर्किन नपाएर अलपत्र छन्। सापकोटाको मार्च २३ मा नेपाल फर्किने टिकट थियो तर नेपाल सरकारले कोरिया सहित विदेशबाट नेपाल जाने सबै उडानमा प्रतिबन्ध लगाएपछि उनी कोरियामै रोकिए।
उनले तीन महिनादेखि न काम गर्न पाएका छन्, न त आफ्नो देश नै फर्किन नै। भन्छन्, ‘भा सकिएर नेपाल जाने मुखैमा नेपालले अन्तर्राष्ट्रिय उडानमा रोक लगायो। यहाँ बाहिर काम गर्न जाऊँ भने ज्यानको जोखिम छ। जसरी भए पनि आफ्नै घर जान पाए हुन्थ्यो।’
त्यस्तै, झापाका हर्देव गणेश, सुवास ढकाल लगायतको गुनासो पनि उस्तै छ।
यसैबीच नेपाल सरकारले कोरियामा अलपत्र नेपालीलाई स्वदेश फर्काउने निर्णय गरेको छ। सरकारले नेपाल वायुसेवा निगमको विमान कोरिया पठाएर उनिहरुको उद्धारको तयारी गरे पनि निगमले भने कोरियामा विमान अवतरणको अनुमति पाएको छैन।
यसअघि यहाँको सरकारसँग सिओलस्थित नेपाली दूतावास मार्फत कोरियामा विमान अवतरणको अनुमति माग गरे पनि हरेक पटक यहाँको सरकारले अनुमति दिन अस्वीकार गर्दै आएको छ।
दूतावासले पटक-पटक कोरियामा विमान अवतरणको अनुमति मागे पनि यहाँको सरकारले अनुमति दिन नमानेकाले नेपाल वायुसेवा कोरिया आउन सक्ने अवस्था नरहेको सरोकारवालाको दावी छ।
तर कोरियाले यसअघि नेपालबाट कोरिया कामदार ल्याउनका लागि भएकाले अनुमति नदिएको र अहिले उद्धार गर्न आउने भएकाले अनुमति पाउन सक्ने दाबी नेपाली दूतावास सिओलका उपनियोग प्रमुख रामसिंह थापाको छ ।
थापा थप्छन्, ‘प्रक्रिया सुरु भइसक्यो। अब पर्यटन मन्त्रालयले नेपालस्थित कोरियन दूतावास समक्ष अनुरोध पत्र पठाउँछ। त्यसपछि मात्र अनुमति पाउने वा नपाउने विषयको टुंगो लाग्छ।’
यसअघि नेपाल बिदामा गएका कोरियामा कार्यरत नेपालीको भिसा अवधि समाप्त हुन लागेको भन्दै गैरआवासीय नेपाली संघको अनुरोधमा नेपाल सरकारले वायुसेवा निगमकै जहाज कोरिया पठाउने प्रयास गरे पनि असफल भएको थियो।
नेपाल सरकारले त्यतिबेला कोरियामा विमान अवतरणका लागि यहाँको भूमि पूर्वाधार तथा यतायात मन्त्रालयसँग गरेको अनुरोधमा मन्त्रालयले नेपालले आफ्नो विमान कोरियामा उडान भर्न कोरिया सरकारको हवाइ सुरक्षा मापदण्ड पुर्याउनुपर्ने र यस विषयमा सम्झौता हुनुपर्नेमा सो नभएकाले अनुमति दिन नसकिने जवाफ फर्काएको थियो।
कोरियामा नेपाली विमानलाई अनुमति दिन लामो समय लाग्ने भएकाले अहिले तत्काल नेपाल वायुसेवालाई कोरियामा अवतरणको अनुमति दिन नसकिने बताउँछन्, कोरियाको अन्तर्राष्ट्रिय हवाइ उडान हेर्ने फरिजिन मिनिस्ट्रका कर्मचारी ह्वाङ व्यङछल।
नेपाल वायुसेवाका विमान कोरिया आउन सक्ने सम्भावना अत्यन्तै न्यून हुँदा पनि सरकारले भने नेपाल चार्टर उडानमा जाँदै गरेको कोरियन एयरसँग अहिलेसम्म समन्वय गरेको छैन।
कोरियामा अलपत्र नेपालीहरु सरकारले कहिले उद्धार गर्छ भन्दै पर्खिएर बसेका छन् तर आगामी मे १६ र २० का लागि कोरियन एयरका चार्टर विमान भने नेपाल रित्तै गएर नेपाली कामदार लिएर फर्किने तयारीमा छन्।
सरकारले वायुसेवाकै विमान पठाएर उद्धार गर्ने भने पनि लाग्ने हवाई शुल्क स्वयं व्यक्तिले तिनुपर्ने सर्तमा दूतावासले हस्ताक्षर गराइसकेको छ। यस्तो अवस्थामा सकेसम्म कम शुल्कमा नेपालीको उद्धार गर्नुपर्नेमा सरकारले कोरियन एयरका विमानलाई रित्तै नेपाल जाने अनुमति दिएर यहाँ अलपत्र नेपालीलाई पुनः महंगोमा विमान चार्टर गराउने बाटोमा लागेको पीडितहरुको गुनासो छ।
उनीहरु भन्छन्, ‘हामी लाग्ने शुल्क तिर्न तयार छौं। हामिलाई सस्तोमा र छिटो नेपाल लैजाने विषयमा सरकारको ध्यान जाओस्।’
सरकारले कोरियन एयरका चार्टर विमानहरु नेपाल जाउँञ्जेल नेपाल वायुसेवाले अनुमति माग्दै छ भन्दै टार्ने र अन्त्यमा महंगोमा कोरियन एयर नै चार्टर गरेर यहाँका नेपाली कामदारलाई चर्को शुल्क तिराउने गुनासो पीडितहरुको छ।
कोरियामा जुन महिनाको अन्त्य सम्ममा ४ हजार ५ सय नेपालीको भिसा अवधि सकिँदै छ। ९ सय ७२ जनाले आफ्नै शुल्कमा नेपाल फर्किन तयार रहेको बताउँदै दूतावासमा फारम भरेका छन्।
नेपाल फर्किन चाहने ९ सय ७२ जनाको विवरण सरकारलाई पठाइसकिएको सिओलस्थित नेपाली दूतावासले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1792292945.webp)
-1786602170.png)
