फाइल फोटो : प्रतिनिधिसभा बैठक
काठमाडौं- प्रतिनिधिसभाको शून्य समयमा बोल्ने सांसदहरुले चौरजहारी घटना मानवीय अपराध भएकाले यसमा संलग्नहरुलाई उन्मुक्ति दिन नमिल्ने भन्दै तत्काल छानबिन समिति गठन गर्न माग गरेका छन्।
शून्य समयमा बोल्ने अधिकांश सांसदहरुले यो घटना निन्दनीय मात्र नभई पाशविक हत्या समेत भएको टिप्पणी गरेका छन्। प्रमुख प्रतिपक्षले ढ्यापढ्यापे समय लिएर नै उक्त घटनाको छानबिनका लागि विशेष समिति गठन गर्न माग गरेको छ।
सांसद आशा विकले अझै पनि आशामै रहेको टिप्पणी गरिन्। ‘मृतकको परिवारले छोरा फिर्ता मागेका छैनन्। न्याय मागेका छन्। यसमा सरकारले ढिलाई गर्न वा छलछाम गर्न सक्दैन’, उनले भनिन्।
उनले चौरजहारी घटना छानबिनका लागि संसदीय समिति गठन होस् भनी माग गरिन्।
सांसद इन्दुकुमारी शर्माले प्रेम गर्नु नै पाप हो? भन्दै समाजका रहेको सामान्ती जातीय संस्कार अहिले छताछुल्ल भएको टिप्पणी गरिन्। माओवादीको उद्गम केन्द्र रुकुममा भएको घटनाले सबैको शिर झुकेको उनले बताइन्।
सांसद कमला रोकाले रुकुम पश्चिम चौरजहारी घटनाको अकल्पनीय भएको भन्दै नवराव विकको सपना भेरीमा बगाए पनि यो विभेदको लागि न्याय मर्न नहुने उनले बताइन्।
सांसद कृष्णभक्त पोखरेलले चौरजहारीको घटनाले सबैलाई लज्जित पारेको टिप्पणी गरे। ‘यो मानवता विरुद्ध अपराध हो। धेरै कानुन बने तर यो विभेद अन्त्य भएन’, उनले भने, ‘जसले जातीय विभेद गर्छ, त्यसलाई कारवाही गर्ने व्यवस्था गरौं। हरेक घटना मिलाउने होइन, कारबाही गर्न थालौं।’
सांसद खगराज अधिकारीले पनि पश्चिम रुकुमको घटनाको अपराधीलाई हदैसम्मको कारबाही माग गरे।
सांसद गगनकुमार थापाले संविधान र कानुन बनाए पनि जातीय विभेद नहटेको टिप्पणी गरे। रुकुमको घटनाले सबैको अनुहारमा कालो पोतेको भन्दै उनले अब हेरेर बस्ने हो भने लाज पनि लजाउने बताए। उनले संसदीय छानबिन समिति निर्माण नभएसम्म आवाज उठाइरहने बताए।
रोग र भोगसँग पनि जुध्ने तयारी गरौं
शून्य समयमा बोल्ने सांसदहरुले कोरोना भाइरसको महामारीका बीचमा सरकारको तयारी अपुग भएको भन्दै सरकारको ध्यानाकर्षण गराए। देशभरका क्वारेनटाइन, सीमाबाट प्रवेश गर्ने नागरिक र भोकले मर्न लागेमा श्रमिकहरुका आवाज सुन्न आग्रह गरे।
सांसद अमृता थापाले बाँकेमा भारतबाट फर्केमा मजदुरहरुको गाडी दुर्घटना हुँदा १२ जनाको मृत्यु र केही घाइते भएकोप्रति दुःख व्यक्त गरिन्। सरकारले विदेशमा रहेका नेपालीलाई भित्र्याउनु स्वागतयोग्य कदम भएको भन्दै उनले कोरोनासँग जुध्ने सामाग्रीको जोहो नपुगेको टिप्पणी गरिन्। ‘भोक र रोग दुवैबाट बचाउने योजना निर्माण गर्न ध्यानार्कषण गराउँछु’, उनले भनिन्।
सांसद उमाकान्त चौधरीले मधेसमा भएका क्वारेनटाइन सबै मापदण्ड विपरित रहेको बताए। विश्व स्वास्थ्य संगठनले तोकेको एउटै मापदण्ड नपुगेको भन्दै उनले यस्ता क्वारेनटाइनहरु कोरोना संक्रमणको थलो बन्दै जाने अवस्था सिर्जना हुने टिप्पणी गरे। राहत उद्धार र परीक्षण तीनवटै कुरा छिटोभन्दा छिटो गर्न उनले माग गरिन्। रोग र भोकले जनता मर्ने अवस्था आएको भन्दै उनले यसमा ध्यान दिन सरकारलाई आग्रह गरे।
सांसद उमा रेग्मीले कोरोना भाइरसको महामारीले देश आक्रान्त भएको र सुत्केरी हुन गएका महिला र डाइलाइसिस गर्न गएका बिरामीलाई पिसिआर परिक्षण गरेर आएमा मात्र गर्ने भन्दै फर्काउन थालिएकोप्रति ध्यानाकर्षण गराइन्। त्यस्ता अस्पतालहरुलाई कारबाही गर्नु पनि उनले माग गरिन्। सबै अस्पताल खुल्ला गराएर बिरामीको सेवा दिने व्यवस्था मिलाउन सरकारसँग उनले माग गरिन्।
सांसद उमाशंकर अरगरियाले सरकारको कोही भोकै मर्दैन र भोकै पर्दैन भन्ने नारा ल्याएको तर मानिस भोकै मरिरहेका भन्दै सरकारको ध्यानाकर्षण गराए।
सांसद कल्याणी खड्काले भारतबाट फर्केका मानिसहरुका कारण प्रदेशहरुको अवस्था भयावह हुँदै गएको टिप्पणी गरिन्। सबंभन्दा धेरै प्रदेश २ मा समस्या रहेको भन्दै उनले संसदको ध्यानाकर्षण गराइन्। क्वारेनटाइनहरु दयनीय अवस्था रहेको भन्दै उनले यसमा सरकारले ध्यान दिनुपर्ने बताए। उनले नाकामै पिसिआर गर्ने व्यवस्था हुनुपर्ने माग गरिन्। यसरी परीक्षण परी पोजेटिभ आएका व्यक्तिलाई आइसोलेसन र नेगेटिभ आएकाहरुलाई क्वारेनटाइनमा राख्न उनले माग गरिन्। प्रदेश २ को सबैभन्दा धेरै संक्रमित रौतहटका २१५ रहेका भन्दै उक्त क्षेत्रलाई विशेष ध्यान दिन उनले माग गरिन्।
सांसद कृष्णप्रसाद दाहालले कोरोना रोक्न जति चुस्त दुरुस्त हुनुपर्ने हो, हुन नसकिरहेको टिप्पणी गरे। ‘हाम्रा बसहरु तोकिएको नाकामा लगेर मानिसहरुको उद्धार गर्ने काम सुरु होस्’, उनले भने, ‘मापदण्ड पूरा गरेर स्वास्थ्यमाथि ध्यान दिएर परीक्षण गर्दै सम्बन्धित पालिकामा पुर्याउने कार्य सरकारले गरोस्।’
सांसद गजेन्द्र महतले जुम्लामा संक्रमण बढेकोले हिजोको व्यवस्थापनले धान्दैन भन्ने पुष्टि भएको टिप्पणी गरे। कोरोना परीक्षणको काम कर्णाली स्वास्थ्य विज्ञान प्रतिष्ठानले गरिरहेको भए पनि किट अभाव र क्वारेनटाइनमा राख्न मानिसलाई समस्या भएको उनले बताए।
सांसद गोपाल बहादुर बमले लकडाउन कोरोना रोकथामको उपाय भए पनि यसमा यसमा भ्रष्टाचार पनि नहोस् भन्दै कामना गरे। त्यस्तै यही अवसरमा कसैका लागि कमाउने मौका पनि नहोस् भन्दै उनले प्रभावकारी काम गर्न माग गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
