भारतबाट गाउँ पुगे तर कोरोना जित्न सकेनन्

फिचर

भारतबाट गाउँ पुगे तर कोरोना जित्न सकेनन्नगर प्रमुख भन्छन्- कुनै लक्षण थिएन, एक्कासी ढल्नुभयो

दुर्गा दुलाल आइतबार, जेठ १८, २०७७ १५:१४

प्रतीकात्मक फोटो

काठमाडौं- शनिबार दैलेखमा क्वारेन्टाइनमै एक ३५ वर्षीय युवाको मृत्यु भयो। उनको कोरोना परीक्षणका लागि बिहीबार नै स्वाब संकलन गरिएको भए पनि मृत्युपछि मात्रै पोजेटिभ रिपोर्ट आएको थियो। उनी कोरोना संक्रमणपछि मृत्यु हुने सातौं व्यक्ति हुन्।

दैलेखको दुल्लु नगरपालिकाका ती युवा दश दिनअघि मात्रै भारतबाट आएका थिए।

गुजरातको होटलमा कुकको काम गर्ने उनका निम्ति नेपाल र भारततिरको आउजाउ नौलो थिएन। तर, यसपटक भने उनी लामो समयपछि फर्केका थिए। दुवै देशमा लकडाउन सुरु भएपछि उतै थुनिएका उनी भारतमा रेल सञ्चालन हुन थालेपछि नेपाल फर्केका थिए।

नेपाल प्रवेश गर्नुअघि उनी भारतको बराइजमा क्वारेन्टाइनमा बसेको थाहा भएको छ। त्यहाँ सात दिनसम्म क्वारेन्टाइनमा बसेपछि उनी रुपैडिया नाका हुँदै नेपाल प्रवेश गरेका थिए।

‘नेपालगञ्जमा भारतबाट फर्केका धेरै नागरिक अलपत्र रहेको खबर आएपछि नगरपालिकाले गाडी रिर्जभ गरेर उद्दार गर्दै गाउँपालिकाको क्वारेनटाइनमा राखेका थियौं’, दुल्लु नगरपालिकाका प्रमुख घनश्याम भण्डारीले भने।

गाडीमा ४२ जना आएका थिए।

नगरपालिकाले व्यवस्थापन गरेको नेपाल विद्युत प्राधिकरणको भवनमा रहेको क्वारेन्टाइनमा ती युवालाई राखिएको थियो। उनीसँगै अन्य दुई जना पनि बस्ने गरेका थिए। उनीहरु एउटै गाउँका हुन्।

‘अस्पताल लैजाने मौका नै पाएनौं’
नगर प्रमुख भण्डारीका अनुसार ती युवामा कोरोनाको कुनै लक्षण नै देखिएको थिएन। ‘मृतकमा न ज्वरो आएको थियो, न त रुघाखोकी नै लागेको थियो’, मेयर भण्डारीले भने, ‘अघिल्लो दिन मैले भेटेको र भोलिपल्ट चिया मात्र खान्छु भन्नुभएछ। चिया खाएर बसेको केही समयमा उहाँ एक्कासी ढल्नुभएछ।’

७:४५ बजे ती युवा ढलेपछि ८ बजेतिर चिकित्सक लिएर नगर प्रतिनिधि पुगेको तर उनको मृत्यु भएको भण्डारीले बताए। क्वारेनटाइन स्थलबाट अस्पताल दुई किलोमिटर पर रहेको तर उक्त अस्पताल लैजान पनि नभ्याइएको उनले बताए।

‘उहाँलाई कोरोनाको केही लक्षण नै थिएन’, नगर प्रमुख भण्डारीले भने, ‘मृत्यु भएपछि कोरोना पुष्टि भएको छ।’

उक्त नगरपालिकाले ३५ वटा क्वारेनटाइन बनाएको छ। यी क्वारेनटाइनमा २२ सय १३ जना बसिरहेका छन्। उनीहरु सबै भारतवाट आएको र विभिन्न नाकाबाट उद्दार गरेर नगरपालिकाले राखेको मेयर भण्डारीले बताए।

हालसम्म दुईजनामा मात्र कोरोना पुष्टि भएको र अन्यको रिपोर्ट आइनसकेको उनले बताए। कोरोना परीक्षणका लागि जुम्ला र सुर्खेत स्वाब जम्मा गरेर पठाएको तर रिर्पोट नआएको उनले बताए।

परीक्षण रिपोर्ट समयमा नआउँदा समस्या भएको उनको गुनासो छ। संक्रमित पत्ता लगाउनै नसक्दा धेरै जोखिम भएको उनले बताए। ‘यदि समयमै रिपोर्ट आएको भए ती मृतकलाई बचाउन पो सकिन्थ्यो कि’, उनले भने, ‘अन्य कति छन्, उनीहरुलाई कसरी बचाउने र नभएका व्यक्तिलाई कसरी सर्न नदिने भन्ने चुतौती थपिएको छ।’