काठमाडौं- नेपाल राष्ट्र बैंकले असारमा कोरोनाबाट प्रभावित अर्थतन्त्रलाई उकास्ने गरी असारमा पूर्ण प्याकेज ल्याउने तयारी गरेको छ। राष्ट्र बैंकका गभर्नर महाप्रसाद अधिकारीले असारको तेस्रो वा चौथो सातामा अर्को प्याकेज ल्याउने बताएका छन्।
कोरोना भाइरसले अर्थतन्त्रमा पारेको असरलाई हेरेर वर्षको अन्त्यमा राष्ट्र बैंकको दिनुपर्ने विषयलाई प्याकेजका रुपमा दिने अधिकारीले जानकारी दिए।
नेपाल चार्टर्ड एकाउन्टेन्ट्स संस्था (आइक्यान)ले गरेको भिडियो कन्फरेन्समा अधिकारीले कोभिडको प्रभाव कम हुँदै गएपछि राष्ट्र बैंकले उपचारसहितको प्याकेज ल्याउने घोषणा गरे।
उनले भने, ‘अहिलेको प्याकेजमा ट्रिटमेन्टको धेरै कुरा रहेन। यो स्थितिमा बैंकका ग्राहकहरुमा वित्तीय अभिलेखन पुरा गर्नुपर्ने तनाव छ। त्यो तानवलाई कम गर्न दुई राउण्डको प्याकेज ल्याइएको हो।’
लकडाउन सकिएपछि व्यवसायलाई पुनरोत्थानका लागि अर्को किसिमका प्याकेज ल्याइने अधिकारीले स्पस्ट पारे। अहिले आइरहेका प्याकेजहरु एक खालको अन्तरिम प्यकेजहरु हुने अधिकारीले बताए। ‘जसले ग्राहकहरुलाई वित्तीय दायित्वसम्बन्धी तत्कालको बेदना कम गर्ने प्रयासस्वरूप मात्रै हो,' उनले भने।
अन्तरिम दुई प्याकेज ल्याउँदा बैंकहरुले विरोध जनाएका थिए। बैंकहरुको विरोधलाई संकेत गर्दै उनले भने, ‘यो ल्याइराख्दा कसैलाई कुनै न कुनै किसिमले असर पर्छ। एउटाले नदिइ अर्कोले पाउने विषय पनि हुँदैन।‘
उनले घुमाउरो पारमा राष्ट्र बैंकको निर्देशन पुरा नगरे हस्तक्षेप गर्न सक्ने संकेत गरेका छन्। ‘विजनेसमा बसिसकेपछि आम्दानी घट्दा सबैलाई चित्त दुख्छ। कमाउन पाए हुन्थ्यो भन्ने जसलाई पनि लाग्छ। त्यसमा हामीले अन्यथा लिदैनौं,' उनले भने, 'तर के त भन्दा आ-आफ्नो भूमिका आ-आफ्नो ठाउँबाट निर्वाह गर्ने हो। सबैले आ आफ्नो भूमिका निर्वाह गरियो भने हस्तक्षेप कम हुँदै जान्छ।‘
भिडियो कन्फरेन्समा अधिकारीले वित्तीय क्षेत्र चेपुवामा परेको बताए। ‘वित्तीय क्षेत्र कसरी चेपुवामा अर्थात स्याण्डविच बन्न खोजिरहेको छ,' उनले भने, 'यदि यो लम्बिँदै गयो भने यसको असर खराब हुन्छ।‘
अर्थतन्त्रको खम्बाको रूपमा रहेको रेमिट्यान्स घट्दा तरलतामा महत्वपूर्ण असर पर्ने अधिकारीले बताए। 'रेमिट्यान्स तरलताको स्रोत पनि हो र वैदेशिक मुद्राको महत्वपूर्ण स्रोत हो। यसमा विस्तारै घट्ने प्रवृत्ति देखिएको छ,' उनले भने, 'चैतमा प्रसस्त घटेको छ। बैशाखमा केही थोरै बढ्ने छाँट छ। पहिलेको दाँजोमा एक तिहाइ आउने स्थिति हामीले देखिरहेका छौँ।‘ आयातमा आएको संकुचनले यस वर्षको भुक्तानी सन्तुलनलाई साथ दिएको अधिकारीले बताए।
यस समयमा एकले अर्कोलाई दोष दिएर हिँड्नु भन्दा एक आपसमा मिलेर संयक्तरूपमा काम गर्नुपर्ने अधिकरीले जोड दिए। ‘निजी क्षेत्र बिना अर्थतन्त्र चल्दैन। ग्राहक बिना बैंक चल्दैन। त्यस्तै बैंक नभइकन हामीले अर्थतन्त्र चलाउँछु भन्न हुँदैन,' उनले भने, 'त्यसैले हामी सबैले एक आपसमा मिलेर संयुक्तरूपमा काम गर्नुछ। एकले अर्कोलाई दोष दिएर यहाँ केही अर्थ रहँदैन।‘
वित्तीय क्षेत्रलाई परेको असरलाई समाधान गर्नका लागि बाह्य साझेदारहरुसँग सँगै जान खोजिरहेको अधिकरीले जानकारी दिए। विश्व बैंक, अन्तर्राष्ट्रिय मुद्रा कोष र अन्तर्राष्ट्रिय वित्त निगमलगायत निकायसँग छलफल गरिरहेको अधिकारीले बताए।
वित्तीय मानहरु नबिग्रने गरी बीचको हिँड्नु पर्ने अधिकारीले सुझाएका छन्। अन्तर्राष्ट्रिय लेखामानहरु नबिग्रने गरी आम्दानी बाँध्ने कुराहरु, प्रोभिजनिङका कुराहरु, अनुमानित नाफा नोक्सानका कुराहरुको लेखाजोखा राख्न आइक्यान तथा राष्ट्र बैंक मिलेर अगाडि बढ्नु पर्ने अधिकारीको तर्क छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
