काठमाडौं– विश्वमा महामारीको रुपमा देखा परेको कोरोना भाइरस (कोभिड–१९)को संक्रमण नियन्त्रण र लकडाउन कार्यन्वयनका लागि नेपाल प्रहरीले महत्वपूर्ण भूमिका निभाएको प्रहरी प्रधान कार्यालयले जनाएको छ।
भाइरस संक्रमणलाई रोक्न सरोकारवाला निकायको सहयोगमा विभिन्न स्थानहरूमा किटनाशक औषधि छर्कने, स्वासबाट संक्रमण हुन नदिन प्रयोग गरिने मास्कलाई सुरक्षित प्रयोग गर्ने विधिबारे जानकारी गराउने, कोरोना नियन्त्रणसम्बन्धी सचेतनामूलक पर्चा वितरण गर्ने, भाइरसबाट बँच्न माइकबाट सचेतनामूलक सन्देश प्रवाह गर्ने, सडकपेटीमा बस्दै आएका घरबारबिहीन वृद्धवृद्धाहरूको स्वास्थ्यको ख्याल गर्दै उद्धार गरी सामाजिक संघसंस्थाहरूको सहयोगमा पुनस्थापित गर्ने लगायतका कार्य गर्दै आएको प्रहरी हेडक्वाटरले जनाएको छ।
लकडाउनमा प्रहरीको सक्रियताबारे प्रष्ट पार्दै प्रहरी महानिरीक्षक ठाकुरप्रसाद ज्ञवालीले भने, ‘लकडाउनको प्रभावकारी पालना गराउन व्यक्तिहरुलाई घरदेखि बाहिर निस्कन नदिन र नेपाल सरकारका विभिन्न संचार माध्यमबाट भएका विभिन्न क्रियाकलापका साथसाथै लकडाउन कार्यन्वयनका लागि नेपाल प्रहरीले करिब ३५ हजार पटकभन्दा बढी माइकिङ गरेर जानकारी गराएका छौं।’ नेपाल प्रहरीको अपराध अनुसन्धान, अपराध नियन्त्रण तथा शान्ति सुरक्षाको साथसाथै कुनै पनि विपद् र बिषम परिस्थितबाट सिर्जित अपराधको प्रकृति र प्रवृत्तिलाई नियन्त्रण गर्नका लागि योजनाबद्ध रुपले प्रहरीको परिचालन गर्न कुनै कमी आउन नदिइने ज्ञवालीले बताए।
लकडाउनको कार्यन्वयन अनुगमनका लागि आधुनिक प्रविधि (ड्रोन)को समेत प्रयोग गरी गतिविधि निग्रानी राखिएको ज्ञवालीले बताए। ‘पहिलोपटक घरबाट बाहिर निस्केका व्यक्तिलाई लकडाउनको जानकारी गराएर जहाँबाट आएको हो त्यही फिर्ता पठाउने र पुनः दोहाेर्याएमा गतिविधिको आधारमा आवश्यक कारबाहीसमेत गर्ने गरिएको छ,’ आइजिपी ज्ञवालीले भने, ‘नेपाल सरकारको लकडाउन आदेशलाई अन्य निकायसँग पनि समन्वय गरी नेपाल प्रहरीले पूर्णरुपमा समन्वयात्मक भूमिका र कार्यन्वयन गरेको छ। विपद्को समयमा थप काम गर्न नेपाल प्रहरी जहिले सुकै तयार रहेको छ।’
विपद्को अवस्थापछि हुन सक्ने अपराधको प्रवृत्तिलाई मध्यनजर गर्दै योजनाबद्ध तरिकाले प्रहरीको परिचालन हुने र त्यसमा कुनै कमी आउन नदिने ज्ञवालीले दाबी गरे।
कोरोनाको संक्रमणलाई रोक्नको लागि सामाजिक दूरी कायम गर्नु महत्वपूर्ण हुन्छ। लकडाउन कार्यन्वयनमा खटिने प्रहरीसमेत उच्च जोखिममा रहेको अवस्था छ। यस अवस्थामा सुरक्षित हुनका लागि मास्क, स्यानिटाइजरकाे प्रयोग गर्न सकिन्छ। आवश्यक औषधि उपचारका लागि नेपाल प्रहरी अस्पतालले विशेष व्यवस्था गरेको छ।
अस्पतालका मेडिकल डाइरेक्टर प्रहरी अतिरिक्त महानिरीक्षक डा आशा सिंह भन्छिन्, ‘प्रहरीका लागि नेपाल प्रहरी अस्पतालमा आइसोलेसन वार्डको व्यवस्था गरेका छौं। पिपिई व्यवस्थाका साथै प्रहरी मानसिक रुपमा बलियो हुनु आवश्यक छ। प्रहरी कर्मचारीको उपचारको लागि नेपाल प्रहरी अस्पताल सक्षम छ।’ यसका लागि पूर्व तयारी पनि गरेको, त्यसलाई अझ सुदृढ बनाउन थप सामग्रीको व्यवस्था, आइसोलेसन, आइसियूको क्षमता वृद्धि गर्ने व्यवस्था गरिरहेको सिंहले बताइन्।
लकडाउनको अवस्थामा अधिकतम जनशक्ति खटाउने उद्देश्य अनुरुप विभिन्न प्रशिक्षणमा रहेका प्रहरी जनशक्तिलाई जुनसुकै अवस्थामा पनि आवश्यक स्थानमा खटिन तयारी अवस्थामा राखिएको प्रहरी प्रधान कार्यालयले जनाएको छ। जसका लागि सम्पूर्ण जिल्लामा थप जनशक्ति परिचालन गरिएको छ।
राष्ट्रिय प्रहरी प्रशिक्षण प्रतिष्ठान महाराजगंजका कार्यकारी निर्देशक प्रहरी अतिरिक्त महानिरीक्षक तारिणी प्रसाद लम्साल भन्छन्, ‘प्रतिष्ठानको तत्वावधानमा संचालन हुने तालिम हाल स्थगित गरिएको छ। अग्रपङ्तिमा बसेर काम गर्नुपर्ने प्रहरी कर्मचारीलाई अहिले तालिममा भन्दा पनि लकडाउनलाई पूर्ण कार्यन्वयन गराउनेतर्फ केन्द्रित गरिएको छ।’ देशलाई संकट परेको यस बिषम परिस्थितिमा नेपाल प्रहरीले आफूलाई अग्रमोर्चामा उभ्याएको उनले बताए।
महामारी रोकथाम र नियन्त्रणका लागि गरिएका पूर्व तयारीका काममा अन्य निकायझैं नेपाल प्रहरी एक्यवद्ध भई अगाडि बढेको उनको भनाइ छ।
सम्भावित अवाञ्छित गतिविधिबारे चनाखो हुँदै स्वास्थ्यकर्मी, अस्पताल, भीडभाड व्यवस्थापनलगायतका काममा प्रहरीको सक्रियता उल्लेखनीय रहेकाे प्रहरी प्रधान कार्यालयले जनाएको छ। कालोबजारी नियन्त्रण गर्ने, लकडाउन पालना गराउने तथा अनुगमन गर्ने एवं उल्लंघन गर्नेलाई नियन्त्रणमा लिने मात्र होइन भाइरसको कारण जनमानसमा उत्पन्न डरत्रासको वातावरण र पीडावोधलाई बिर्साउने गरी सम्झाउने बुझाउने काम नेपाल प्रहरीले गर्दै आएको छ।
नेपाल प्रहरीले वृत्तचित्रसमेत निर्माण गरी लकडाउन कार्यन्वयन सम्बन्धमा नेपाल प्रहरीले गरेको कामको विस्तृत जानकारी प्रदान गरेको छ।
हेर्नुस् भिडियाे :
(प्रहरी प्रधान कार्यालयबाट प्राप्त बुलेटिनबाट तयार पारिएको सामग्री)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787802736-1787803515.jpeg)
-1786602170.png)
-1786513116.png)
