काठमाडाैं- कोरान भाइरसले पर्यटन क्षेत्रमा गम्भीर असर गरेको भन्दै यसकाे पुनरुत्थानका लागि नेपाल चेम्बर अफ कर्मशले सरकारलाई सुझाव दिएको छ। सोमबार चेम्बर अफ कर्मशका अध्यक्ष राजेशकाजी श्रेष्ठको टोलीले संस्कृति, पर्यटन तथा नागरिक उड्डयनमन्त्री योगेश भट्टराईलाई भेटी उक्त सुझाव दिएकाे हो।
आन्तरिक पर्यटन प्रवर्द्धन गर्नका लागि निजामती तथा संगठित संस्थाका कर्मचारीहरु र नागरिकहरुलाई प्रोत्साहन प्याकेजसहित आन्तरिक प्रेरित गर्नुपर्ने, कोरोनाबाट होटल तथा एयरलाइन्सहरुलाई वित्तीय प्याकेजमार्फत् उद्धार गर्नुका साथै ऋणको ग्यारेन्टी, कपोरेट फन्डमा सरकारको टेवा, कर छुट, एयरपोर्ट चार्जलगायतमा वित्तीय सुविधा दिनुपर्ने, पर्यटन प्रवर्द्धनको लागि थिंक ट्यांकको व्यवस्था गर्ने लगायतका सुझाव दिइएकाे छ। त्यस्तै मेडिकल टुरिजम, होम स्टे एग्रो टुरिजम, कल्चरल टुरिजमलगायतका विधागत पर्यटन प्रवर्द्धनका लागि ठोस कार्यक्रम ल्याउन माग गरिएकाे छ।
पर्यटकको चाप घटेको समयमा पर्यटन पूर्वाधारमा जोड दिनपर्ने, नेपाल आयल निगमले माग्दै आएको नगद धरौटीको सट्टा बैङ्क ग्यारेन्टीको व्यवस्था गरी नगद धरौटी फिर्ता गर्नुपर्ने माग पनि राखेका छन्। चेम्बर अफ कमर्शले चीनमा कोरोनाको प्रकोप कम हुँदै गएकोले आउँदो सेप्टेम्बर-अक्टोबरमा पर्यटकीय सिजन भएकोले चीनको विभिन्न सहरबाट पर्यटक भित्र्याउने सरकारीस्तरबाट पहल गर्नुपर्ने, एयरलाइन्सहरुले चीनको विभिन्न सहरबाट पर्यटक ल्याउन पहल गर्नुपर्ने, हवाई जहाज, बस, कारसहित बास बस्ने स्थान होटल, रिसोर्ट, होमस्टे, रेस्टुरेन्ट तथा विमानस्थलमा डिसइन्फेक्ट गरिनु पर्ने सुझाएका छन्।
मन्त्री भट्टराईले चेम्बर अफ कमर्शको सुझाव बुझ्दै सरकारले पर्यटन क्षेत्रको विकासमा काम गरी रहेको बताए। कोरानाका कारण सबैभन्दा बढी प्रभाव पर्यटन क्षेत्रमा परेको भन्दै मन्त्री भट्टराईले आउने बजेट र नीति तथा कार्यक्रममा पर्यटन सुधारको प्याकेज घोषणा हुने बताए। उनले सरकारले एयरलाइन्स होटल, रेस्टुरेन्ट मर्जरको नीति बनाएर लागू गर्ने बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
