बुटवल : लकडाउनयता ५ हजारको स्वास्थ्य परीक्षण, ७ हजार परिवारलाई राहत

कोरोना अपडेट

बुटवल : लकडाउनयता ५ हजारको स्वास्थ्य परीक्षण, ७ हजार परिवारलाई राहत१३०० पैदल यात्रुको उद्दार, ३७ जनाको पीसीआर टेष्ट, सबैको नेगेटिभ

दीपक घिमिरे सोमबार, वैशाख ८, २०७७ ०७:४२

भैरहवा–बुटवलमा कोरोना भाइरस (कोभिड–१९) को संक्रमण फैलिन नदिन सचेतना, सजगता र स्वास्थ्य परीक्षणका काम भइरहेका छन्। सँगसँगै राहत वितरणका काम पनि चलिरहेका छन्।

बुटवल उपमहानगरपालिकाले निर्माण गरेका क्वारेन्टाइनमा रहेका र उपचारका लागि विभिन्न स्वास्थ्य संस्थामा आएकाहरु सबैको परीक्षण गरिएको छ। बुटवलले १९ वटै वडालाई लक्षित गरेर फिभर क्लिनिक सञ्चालन गरेको छ भने स्वास्थ्यकर्मीलाईं हटलाइन सेवामा खटाएको छ।

उपमहानगर प्रमुख शिवराज सुवेदीले परीक्षणको दायरा बढाउनु र लकडाउनको पूर्ण पालना गराउनु नै अहिलेको मुख्य चुनौती रहेको बताउँदै नगरमा राहत वितरण, सचेतना र सावधानीका काम भइरहेको जानकारी दिए।

‘फिभर क्लिनिकमार्फत् अवस्था पहिचान र दर बढ्न नदिन देशैभरि परीक्षणको दायरा बढाउँदै लगिएको छ र समुदायस्तरमा सचेतनाका कार्यक्रम पनि सञ्चालन गरिएको छ’ प्रमुख सुवेदीले भने। निजी क्षेत्र, समाजसेवी र मनकारीहरुको सहकार्यमा पैदल यात्रीको उद्दार, खानपान र यातायातकोसमेत व्यवस्था मिलाएको उनले बताए।

झण्डै १३ सय पैदल यात्रीको उद्दार

यो अवधिसम्म बुटवलले विभिन्न ठाउँबाट पैदल यात्रा हुँदै बुटवलसम्म आइपुगेका विभिन्न जिल्लाका पैदल यात्रुलाई उद्दार गरेको छ। उनीहरुलाई बुटवल १ र १२ मा त्यहाँका वडाध्यक्षहरुकै नेतृत्वमा खाने, बस्ने र बसमार्फत् आ–आफ्ना ठाउँमा पठाउने काम भइरहेको छ।

शनिबारमात्रै एक सय ७५ जनालाई बस र टिपरमार्फत् बर्दिया, कैलाली र दाङसम्म पठाइएको वडा नं. १२ का अध्यक्ष दुर्गा सुवेदीले जानकारी दिए। आइतबारसम्म एक हजार तीन सय जनासम्मलाई खाना खुवाउने, स्वास्थ्य परीक्षण गर्ने र गाडीको व्यवस्था गरेर घरसम्म पठाउने काम भएको उनले बताए।

बुटवलले वडा नं. १२ तामनगरमा रहेको कोरियन टेक्निकल कलेजको खाली भवनमा क्वारेन्टाइन निर्माण गरेको छ। त्यहाँ १६ जनालाई राखिएको छ। सोही ठाउँमा क्यान्टिन सञ्चालन गरेर अर्गानिक खाना खुवाउने काम भइरहेको बुटवलका प्रमुख प्रशासकीय अधिकृत चक्रपाणी शर्माले बताए । उनले लकडाउन र परीक्षणले नै संक्रमणको दिशा र दशा तय गर्ने भन्ने कुरालाई राम्रोसँग बुझिएको बताए।

३७ जनाको पीसीआर टेष्ट, सबै नेगेटिभ

क्वारेन्टाइनमा रहेका र त्यहाँबाट लुम्बिनी प्रादेशिक अस्पतालमार्फत् कोरोना विशेष आइसोलेसन अस्पतालमा लगिएका बिरामीको भने पोलिमर चेन रियाक्सन (पीसीआर) विधिबाट नमुना परीक्षण भएको छ। आइसोलेशनमा रहेका ३७ जनाको उक्त विधिबाट नमुना परीक्षण भएको र यी सबैको नतिजा नेगेटिभ आएको उपमहानगरका स्वास्थ्य शाखाका प्रमुख कुन्दनकुमार सिंहले बताए।

क्वारेन्टाइनमा बसेकाको आरडीटी टेष्ट

यसैगरी बुटवलले निर्माण गरेको क्वारेन्टाइनमा हाल १६ जना रहेका छन्। उनीहरुलाई बुटवल–१२, तामनगरमा राखिएको छ। उनीहरु त्यहाँ बसेको १६ दिन पुगेको छ। यतिञ्जेलसम्म उनीहरुमा कुनै संक्रमणको लक्षण देखिएको छैन । उनीहरुलाई र्यापिड डाइग्नोष्टिक टेष्ट (आरडीटी) परीक्षण गरिएको उपमहानगरका स्वास्थ्य शाखाका प्रमुख सिंहले जानकारी दिए। यो परीक्षणमा पोजेटिभ देखिएमा मात्रै पीसीआर विधिबाट परीक्षण गर्नुपर्ने हुन्छ ।

लकडाउन यता झण्डै पाँच हजारको स्वास्थ्य परीक्षण

बुटवल उपमहानगरका सहरी स्वास्थ्य प्रवद्र्धन केन्द्र तथा स्वास्थ्य चौकीहरुसहित लुम्बिनी प्रादेशिक अस्पतालमा गरेर हालसम्म झण्डै पाँच हजार जनाको स्वास्थ्य परीक्षण भएको छ। ज्वरो आएका, रुघाखोकी लागेर कोरोनाको आशंका लागेकासहित अन्य विभिन्न रोगका बिरामीहरु स्वास्थ्य परीक्षणका लागि ती संस्थामा आएका हुन् । बुटवलका स्वास्थ्य संस्थामा प्राथमिक उपचारपछि प्रादेशिक अस्पतालमा पठाइएका उनीहरु सबैको स्वास्थ्य परीक्षण गरिएको र कसैमा पनि कोरोनाको लक्षण नदेखिएको लुम्बिनी प्रादेशिक अस्पतालका मेसु डा. राजेन्द्र खनालले जानकारी दिए ।

झण्डै सात हजार परिवारलाई राहत वितरण

बुटवलमा दैनिक ज्यालादारी गर्ने विपन्न अवस्थाका श्रमिकका परिवारको लगत संकलन गरि राहत वितरण गरिएको छ। लकडाउनको पहिलो चरणमै उनीहरुको लगत संकलन गरेर राहत वितरण सुरु गरिएको थियो । जसअनुसार करिब सात हजार परिवारलाई अहिले दोस्रो चरणमा राहत वितरणको काम भइरहेको बुटवलका प्रवक्ता रामप्रसाद रेग्मीले जानकारी दिए। राहत वितरणको कामलाई प्रभावकारी, व्यवस्थित र लक्षित समुदायमा सहजै पु¥याउनका लागि बुटवलले नै मुुलुकमै पहिलोपटक कार्यविधि बनाएको प्रवक्ता रेग्मीको दाबी छ । सोही कार्यविधि अनुसार सामाजिक निजी क्षेत्र र संघसंस्थाको सहकार्यमा राहत संकलन तथा वितरणका काम भइरहेका छन्।

भैरहवासहित देशका ११ ठाउँमा प्रयोगशाला

देशभर भैरहवाको राष्ट्रिय गहुँ बाली अनुसन्धान केन्द्रसहित विभिन्न ११ ठाउँमा पोलिमर चेन रियाक्सन (पीसीआर) विधिबाट नमुना परीक्षण गर्ने प्रयोगशाला सञ्चालनमा छन्। टेकुस्थित राष्ट्रिय जनस्वास्थ्य प्रयोगशाला, धरानको बीपी कोइराला स्वास्थ्य विज्ञान प्रतिष्ठान, जनकपुरधामको जनकपुर प्रादेशिक अस्पताल, पोखराको पोखरा स्वास्थ्य विज्ञान प्रतिष्ठान, सुर्खेतस्थित प्रादेशिक अस्पताल, धनगढीको सेती प्रादेशिक अस्पताल, हेटौंडाको किटजन्य रोग अनुसन्धान तथा तालिम केन्द्र, धुलिखेलको काठमाडौं विश्वविद्यालय शिक्षण अस्पताल तथा चितवनको भरतपुर कोभिड–१९ डाइग्नोस्टिक प्रयोगशाला र विराटनगरको कोसी अञ्चल अस्पतालमा परीक्षण भइरहेका छन्।