काठमाडौं- पूर्व सञ्चार तथा सूचना प्रविधिमन्त्री गोकुल बाँस्कोटाले प्रधानमन्त्री केपी शर्मा ओली निवास बालकोटमा बस्दै आएका छन्। कुनै पनि सार्वजनकि पद धारण नगरेका उनी यतिबेला सामाजिक सञ्जाल ट्विटरमा लेख्दै सरकारको प्रतिरक्षामा खडा छन्। सरकारले गरेका हरेक कामको समर्थन गर्दै आएका बाँस्कोटाले आफूले भ्रष्टाचारको आरोप लागेलगत्तै राजीनामा दिएको भन्दै अरुलाई नैतिकवान् बन्न भनिरहेका छन्।
मन्त्रीबाट ८ फागुनमा राजीनामा दिएपछि बाँस्कोटा आफ्नो निवास लोकन्थली फर्किएका छैनन्। नेकपा केन्द्रीय सदस्यसमेत रहेका बाँस्कोटा मन्त्री भएपछि मन्त्रीनिवास पुल्चोकमा बस्ने ठाउँ नभएको भन्दै ओली निवास बालकोट गएर बस्न थालेका थिए। उति नै बेला बाँस्कोटाले आफ्नो एक तलामा तीन कोठा मात्रै भएकाले प्रधानमन्त्री निवास बालकोटमा बस्न बाध्य भएको सार्वजनिक गरेका थिए। तर, पूर्वमन्त्री बाँस्कोटाले आफ्नो घरमा नेत्रविक्रम चन्द ‘विप्लव’ नेतृत्वको नेकपाले बम फिस्फोट गराएपछि बलकोट बस्दै आएको बताए। ‘मेरो लोकन्थलीको घरमा विप्लवहरूले बम बिस्फोट गराएपछि बस्न मिल्ने अवस्था छैन,’ बाँस्कोटाले भने, ‘अहिले मन्त्री हुँदा बसेको ठाउँ बालकोटमै छु। अन्त कहाँ जाउँ?’
समाजिक सञ्जालबाट सरकारको बचाउ
मन्त्रीबाट हेटपछि बाँस्कोटाले सामाजिक सञ्जाल र अन्य माध्यमबाट समेत सरकारको नियमित बचाउ गर्दै आएका छन्। ३० चैतमा बाँस्कोटाले सरकारको बचाउमा उखानको सहारामा राम्रो काम गर्दागर्दै पनि आरोप थोपर्ने काम भएको उल्लेख गरे। ‘मालिक आदेश गर्छ,अण्डा खाजा ल्याउ। उसिनेको अण्डासाथ कामदार आँउछ, अम्लेट बनाउन सकिनस् मालिक भन्छ। अम्लेटसाथ मजदूर आँउछ। मालिक भन्छ, उसिन्न सकिनस्। दुवैसाथ कामदार आँउछ,’ सरकारको संरक्षण गर्दै बाँस्कोटाले थपेका थिए, ‘आगो हुँदै मालिक भन्छ उसिन्नुपर्नेलाई अम्लेट रअम्लेट बनाउनुपर्ने अण्डालाई उसिनिछस् (सरकारलाई हेर्ने केही आँखाहरु) कोरना।’
यस्तै २८ चैतमा सबै दल समेट्न उच्च स्तरीय राजनीतिक संयन्त्र बनाउने विषय उठाए लगतै सरकारको बचाउ गर्दै आफ्नै पार्टीका अध्यक्ष प्रचण्डको विरोध जनाए। ‘तलदेखि माथिसम्म नै जननिर्वाचित सरकार छन्। सत्तापक्ष र प्रतिपक्ष सबै त्यहाँ कोरनाविरुद्ध अहोरात्र हातेमालोसाथ कार्यरत छन्,’ सरकारको संरक्षण गर्दै बाँस्काटाले भने, ‘अनिसँगै स्वास्थ्यकर्मी, सेना, पुलिस, कर्मचारी र नागरिक युद्धमोर्चामै। तब संविधानले नचिन्ने उच्चस्तरीय सर्वदलीय संयन्त्र के सेकाउन चाहियो?’ उच्चस्तरीय राजनीतिक संयन्त्र गठनका कुरा खारेज गर्न बाँस्कोटाले सरकारलाई सुझाव दिएका छन्।
यस्तै बाँस्कोटाले गत मंगलबार ट्विटरमा सरकारलाई सुझाव दिँदै कोरोनाको प्रकोप बढ्दै गएकाले किसानका लागि मल, बीउ औषधिको समयमै व्यवस्था गर्ने उल्लेख गरे। ‘कोरोनाको लपेटाईबीच प्रमुख अन्नबाली लगाउने समय पनि सुरु हुनै लाग्यो,’ बास्कोटाले लेखेका छन्, ‘मल, बीउँ र ओखतीको बन्दबस्ती समयमै गर्न नसोचे अर्को साल झन् कठिन हुने पो हो कि।’
बाँस्कोटाले आफ्नै पार्टीको सरकार भएकाले बचाउ गर्नु आफ्नो कर्तव्य भएका उनले बताएका छन्। ‘अहिले आफ्नै पार्टीको सरकार छ। त्यही पार्टीको केन्द्रीय सदस्य हुँ। अर्को चुनावमा यही पार्टीबाट चुनाव उठ्ने हो,’ बाँस्कोटाले थपे, ‘आफ्नै पार्टीको सरकारको विरोध गर्नेलाई सोध्नुस् किन विरोध गर्नु हुन्छ भनेर। मैले समर्थन गर्नु जायज।’
नैतिकताका आधारमा राजीनामा दिएको भन्दै आफ्नै बखान
सेक्युरिटी प्रिन्टिङ प्रेस खरिदमा ७० करोड डिल गरेको अडियो सार्वजनिक भएपछि ८ फागुनमा राजीनामा दिएका बाँस्कोटाले आफूले आरोप लाग्ने बित्तिकै नैतिकताका आधारमा राजीनामा दिएको ट्विटरमा बखान गर्दै आएका छन्। आफूले सरकारलाई छानबिन गर्न सजिलो होस् भनि नैतिकताका आधारमा राजीनामा दिएको भन्दै आएका छन्। आफूले भ्रष्टाचार नगरेको बारम्बार बताउँदै आएका बाँस्कोटाले २९ चैतमा आफ्नो राजीनामालाई तत्कालीन प्रधानमन्त्री कीर्तिनिधि विष्ट र केशबहादुर विष्टसँग तुलना गरेर ट्विटरमा लेखे।
‘एक जनाले मात्र प्रश्न खडा गर्ना साथ राज्यसंयन्त्रहरूलाई छनबिन गर्न सहयोग पुगोस् भनेर राजीनामा दिएँ,’ बाँस्कोटाको ट्विट छ, ‘सिंहदरवार जल्नासाथ कीर्तिनिधि विष्ट र रगंशालामा दुर्घटना हुनासाथ केशरबहादुर विष्टले राजीनामा दिए बाहेक कसले मैलेजसरी राजीनामा दिएका छन्?अझ म अनैतिक र भ्रष्ट? बात गर्छन्?’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749200817.png)
