भैरहवा- महालक्ष्मी विकास बैंक लिमिटेडले प्रदेश ५ सरकारद्वारा स्थापित कोरोना भाइरस नियन्त्रण तथा उपचार कोषका लागि ४ लाख रुपैयाँ सहयोग गरेको छ। बैंकका भैरहवा शाखा प्रबन्धक गौतम गुप्ताले प्रदेश ५ का मुख्यमन्त्री शंकर पोखरेललाई बुधबार चेक हस्तान्तरण गरेका हुन्।
शाखा प्रबन्धक गुप्ताले सातवटै प्रदेशले स्थापना गरेको कोषमा ४ लाखका दरले सहयोग गरिएको जानकारी दिए। असहज परिस्थितिमा उक्त सहयोगले कोरोना भाइरस संक्रमणको महामारी रोक्न, नियन्त्रण तथा संक्रमितहरुको उपचार गर्न मद्दत पुग्ने उनले विश्वास व्यक्त गरे।
प्रदेश ५ का नागरिकको स्वास्थ्य रक्षाका लागि कोरोना भाइरसको नियन्त्रण तथा संक्रमित व्यक्तिहरुको उपचारका लागि प्रदेश सरकारले सो कोष स्थापना गरेको हाे।
चेक ग्रहण गर्दै मुख्यमन्त्री पोखरेलले विपद्को समयमा निजी क्षेत्रको सहयोग आवश्यक रहेको भन्दै महालक्ष्मी विकास बैंकलाई धन्यवाद दिए। कार्यक्रममा रुपन्देही क्षेत्र नम्बर ३ (१) बाट निर्वाचित प्रदेश ५ का प्रदेशसभा सदस्य तथा समाजवादी पार्टी संसदीय दलका प्रमुख सचेतक सन्तोष कुमार पाण्डेय र बैंकका कर्मचारी निशा श्रेष्ठको उपस्थिति रहेको थियो।
सामूहिक विद्यालय परिवारद्वारा आर्थिक सहयोग
सामूहिक विद्यालय परिवार रुपन्देहीले प्रदेश ५ सरकारद्वारा स्थापित कोरोना भाइरस नियन्त्रण तथा उपचार कोषका लागि १ लाख १ हजार रुपैयाँ सहयोग गरेको छ। परिवारका अध्यक्ष गम्भिर गुरुङले प्रदेश ५ का मुख्यमन्त्री शंकर पोखरेललाई बुधबार रकम हस्तान्तरण गरेका हुन्।
रकम हस्तान्तरण कार्यक्रममा रुपन्देही क्षेत्र नम्बर ३ (१) बाट निर्वाचित प्रदेश ५ का प्रदेशसभा सदस्य तथा समाजवादी पार्टी संसदीय दलका प्रमुख सचेतक सन्तोष कुमार पाण्डेय, प्याब्सनका केन्द्रीय उपाध्यक्ष विष्णु पन्थी, परिवारका पूर्व अध्यक्ष एवं सल्लाहकार राजकुमार गुरुङ, पूर्व उपाध्यक्ष बसन्त पाण्डेको उपस्थिति रहेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
