काठमाडौं- अमेरिकी इलेक्ट्रिक कार उत्पादक टेस्लाले अमेरिकाभन्दा बाहिर पहिलो पटक चीनमा आफ्नो प्लान्ट स्थापना गरेको छ। पछिल्लो केही समययता अमेरिका र चीनबीच व्यापार युद्ध नै चलेको छ। चिनियाँ उत्पादनमा अमेरिकाले कर लगाएपछि त्यसको बदलामा चीनले समेत अमेरिकी उत्पादनमा कर लगाइदियो।
छोटो समयमै विश्वभर चर्चा बटुलेको र आफ्नो उत्पादनका कारण लोकप्रियता हासिल गरेको टेस्लाले चीनलाई राम्रो बजार ठान्यो र अमेरिका बाहिर प्लान्ट विस्तार गर्दा चीनलाई नै रोज्यो। टेस्लाले शुक्रबार चीनमा सस्तो मूल्यका मोडल थ्री बिक्री सुरू गरेको बताएको छ। यो उत्पादन चीनकै सांघाईमा स्थापना गरिएको टेस्ला प्लान्टबाट उत्पादन भएका हुन्।
टेस्लाले चीनमा बिक्री हुन थालेका सबै मोडल स्थानीय रूपमै उत्पादन गरेकाले यसमा आयात करको कुनै झन्झट छैन। सांघाईमा बनेको लङ रेन्ज मोडल थ्रीकारको बिक्री जुनदेखि सुरू हुनेछ। सहुलियतसहित यो कारको मूल्य ३ लाख ३९ हजार ५० युआन तोकिएको छ। यो रेयर ह्वील ड्राइभ कारको मूल्य हो।
टेस्लाले चीनमा एक पटकको फुल चार्जमा ६ सय किलोमिटरभन्दा बढी माइलेज दिने कार बनाएको छ। चीनमै बनेको अल-ह्वील ड्राइभ मोडल थ्रीको मूल्य ४ लाख १९ हजार ८ सय युआन पर्छ जबकि यही कार आयात गरेर ल्याउँदा ४ लाख ३९ हजार ९ सय युआन पर्छ। त्यस्तै हाइइन्ड मोडल थ्री आयातितको मूल्य ५ लाख ९ हजार ९ सय युआन पर्छ भने स्थानीय उत्यादन योभन्दा केही सस्तो हुनेछ।
चीनमा प्लान्ट स्थापनाका लागि टेस्लाले चिनियाँ बैंकसँग १ अर्ब ४० करोड अमेरिकी डलर (१० अर्ब युआन) ऋण लिएको थियो। टेस्ला इलेक्ट्रिक कार उत्पादकको रुपमा छोटो समयमा विश्वभर चर्चामा छ। चीनको सांघाईमा स्थापना गरिको गिगाप्लान्टबाट चीनसहित एसियाली बजारलाई लक्षित गरिएको छ।
५ वर्षमा तिर्ने गरी चाइना कन्स्ट्रकसन बैंक, एग्रिकल्चर डेभलपमेन्ट बैंक अफ चाइना, इन्डस्ट्रियल एन्ड कमर्सियल बैंक अफ चाइना र सांघाई पुडोङ डेभलपमेन्ट बैंकले टेस्लालाई ऋण उपलब्ध गराउन सहमत भएका थिए। चिनियाँ बैंकहरुले टेस्लालाई यो वर्षको सुरुवातमै ३ अर्ब ५० करोड युआन ऋण उपलब्ध गराएका थिए। १२ महिनामा तिर्ने गर्ने गरी उक्त रकम उपलब्ध गराइएको थियो।
टेस्लाले सांघाईमा स्थापना गरेको गिगा प्लान्टले वार्षिक ५ लाख इलेक्ट्रिक सवारी उत्पादनको क्षमता राख्छ। पछिल्लो समय शून्य प्रदूषण सवारीको प्रयोग बढेकाले इलेक्ट्रिक सवारी उत्पादकहरूले उत्पादन तथा बजार विस्तार गरिरहेका छन्। वर्तमान विश्वमा चीन सबैभन्दा ठूलो कार बजार हो। त्यसैले टेस्ला इलेक्ट्रिक कार उत्पादन सहित चिनियाँ बजारमा प्रवेश गरेको हो।
यसले चीन-अमेरिका व्यापार युद्ध मत्थर पार्न सहयोयी भूमिका खेल्ने विश्लेषण अन्तर्राष्ट्रिय सञ्चारमाध्यमले गरिरहेका छन्। बजारको मागअनुसार टेस्लाले उत्पादन समेत विस्तार गर्ने शुक्रबार नै बताएको हो।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।