काठमाडौं- चीनको वुहानमा २०१९ को अत्यन्तमा उत्पत्ति भएको कोरोना भाइरस (कोभिड १९) का कारण अहिले सिंगो विश्व नै आक्रान्त छ। करीब विश्वका सबै देशमा कोरोना देखिइसकेको छ।
पछिल्लो समय कोरोनाको उत्पत्ति देश चीन कोरोनामुक्त नभएपनि संक्रमण र त्यसबाट हुने मानवीय क्षति नियन्त्रण गर्न सफल देखएको छ। तर युरोपका विभिन्न देश तथा अमेरिकामा अहिले कोरोनाको संक्रमण व्यापक रुपमा फैलिरहेको छ।
कोरोनाले च्यापेपछि बिरामी सिकिस्त हुने भएकाले उनीहरूलाई भेन्टिलेटरको आवश्यकता पर्छ। कोरोनाको असर देखिएपछि मानिसलाई श्वासप्रश्वास असहज हुन्छ‚ जसले गर्दा बिरामीलाई भेन्टिलेटरको अवश्यकता पर्छ।
अमेरिकामा कोरोनाको संक्रमण बढ्न थालेसँगै राष्ट्रपति डोनाल्ड ट्रम्पले कार उत्पादक कम्पनीहरूलाई तत्काल भेन्टिलेटर उत्पादन थाल्न निर्देशन दिएका थिए। ट्रम्पले डेढ साताअघि अमेरिकी दुई गाडी उत्पादक कम्पनीलाई तत्काल भेन्टिलेटर उत्पादन थाल्न निर्देशन दिएका थिए। जतिबेला अमेरिकामा ८३ हजार जनालाई कोरोना भाइरसको संक्रमण देखिएको थियो।
जबकी सोमबार बिहानसम्म यो बढेर ३ लाख ३७ हजारभन्दा बढी पुगिसकेको छ। कोरोना भाइरसको संक्रमण बढेसँगै उपचारका लागि आवश्यक भेन्टिलेटरको अभाव नहोस् भनेर गाडी उत्पादकलाई यस्तो बताएका हुन्। ट्रम्पले अमेरिकी गाडी उत्पादक कम्पनी जनरल मोटर्स (जिएम) र फोर्डलाई तत्काल प्लान्ट सुचारू गरेर भेन्टिलेटर उत्पादनमा लाग्न भनेअनुरूप कम्पनीहरूले उत्पादन गरिरहेका छन्। अमेरिकालाई चीनले समेत भेन्टिलेटर सहयोग गरिसकेको छ।
यता भारतको सबैभन्दा ठूलो कार उत्पादक मारूती सुजुकीले मासिक १० हजार भेन्टिलेटर उत्पादन गर्ने भएको छ। कोरोना भाइरस (कोभिड १९) को संक्रमण बढेसँगै भारत सरकारको आग्रहमा कम्पनीले उक्त संख्यामा भेन्टिलेटर बनाउने भएको हो। भारतमा सोमबार बिहानसम्म कोरोना संक्रमितको संख्या ४ हजारभन्दा बढी रहेको छ। पछिल्ला दिनमा भारतमा संक्रमण बढ्दै गएको छ।
मारूती सुजुकीले भेन्टिलेटरसँगै मास्क तथा अन्य प्रोटेक्टिभ इक्युपमेन्ट समेत उत्पादन गर्न सुरू गरेको छ। हाल मारूती सुजुकीलगायत सबैजसो सवारी उत्पादक कम्पनीले कोरोनाका कारण सवारी उत्पादन स्थगित गरेका छन्।
मारूती सुजुकीले भेन्टिलेटर उत्पादनका लागि एजभा हेल्थलेयरसँग समन्वय गरेको छ। एजभाले नियमित रूपमा भेन्टिलेटर उत्पादन गर्दै आएको छ। मारूती र एजभा हेल्थकेयरले संयुक्त रुपमा काम गरे छोटो समयमा ठूलो संख्यामा भेन्टिलेटर उत्पादन हुने अटोडट एनडिटिभीले लेखेको छ।
यसरी संयुक्त रूपमा भेन्टिलेटर उत्पादन हुँदा मासिक १० हजार थानभन्दा धेरै उत्पादन हुने अनुमान गरिएको छ। भेन्टिलेटरमा प्रयोग हुने प्रविधि, पर्फमेन्सलगायत अन्य विषयमा एजभा हेल्थकेयर जिम्मेवार हुनेछ। त्यस्तै मारूती सुजुकीले भेन्टिलेटर उत्पादनका लागि आवश्यक सामग्री, भेन्टिलेटरको गुणस्तर नियन्त्रणसहितको काम गर्नेछ। ठूलो संख्यामा भेन्टिलेटर उत्पादन हुँदा गुणस्तरमा आउन सक्ने कमजोरीलाई विशेष जोड दिइएको छ।
मारूती सुजुकीका चेयरमेन आरसी भारगभले कोरोना भाइरस (कोभिड १९)संग जुधिरहेको भन्दै अत्यावश्यक सामाग्री उत्पादनमा आफूहरू पनि लाग्ने बताइएका थिए। त्यसैले मारूती सुजुकी भेन्टिलेटरको सम्भावित उत्पादनमा लागेको बताए।
भेन्टिलेटर उत्पादनका लागि आवश्यक पर्ने बजेट, सम्बन्धित निकायबाट लिनुपर्ने अनुमति तथा स्वीकृत मारूती सुजुकीले लिनेछ। यी सबै कुरा कम्पनीले एजभा हेल्थलेयरलाई निःशुल्क उपलब्ध गराउनेछ। त्यस्तै मारूती सुजुकी इन्डिया लिमिटेडको साझेदार कृष्ण मारूती लिमिटेडले मास्क उत्पादन गरेर हरियाणा सरकार र केन्द्र सरकारलाई उपलब्ध गराउनेछ। कम्पनीले उत्पादनको आवश्यक स्वीकृति लिइसकेकाले जतिसक्दो छिटो उत्पादन थाल्ने जनाएको छ।
फ्रेन्च कार उत्पादक पिएसए र रेनो तथा फर्मुला १ का इन्जिनियरहरू समेत स्वास्थ्य सामाग्री उत्पादनमा केन्द्रित भएका छन्। अहिले जुन रूपमा कार उत्पादकहरू भेन्टिलेटर तथा स्वास्थ्य सामाग्री उत्पादनमा लागेका छन् यसले दोस्रो विश्वयुद्धको झझल्को दिएको प्रतिक्रिया दिएका छन्। अहिलेको अवस्थामा अस्पतालहरूमा जडित भेन्टिलेटरले अपुग हुने र नियमित भेन्टिलेटर उत्पादकले ठूलाे संख्यामा उत्पादन गर्न नसक्ने भएकाले कार उत्पादकलाई बनाउन आह्वान गरिएको हो।
त्यहीअनुरूप कोरोना प्रभावित देशहरूमा रहेका कार उत्पादकले भेन्टिलेटर बनाइरहेका छन्। कोरोनाका कारण कार उत्पादकहरू प्लान्ट बन्द गरेर बसेका थिए। विज्ञहरूले विषम परिस्थितिमा बनाइने भेन्टिलेटर प्रविधिसहित विभिन्न पक्षमा उत्कृष्ट हुनुपर्ने सुझाव दिएका छन्।
फ्रान्सका राष्ट्रपति इम्यानुअल म्याक्रोनले पिएसए र अटोमोटिभ इक्युपमेन्ट सप्लायर भलिओलाई मेको मध्यसम्ममा १० हजार भेन्टिलेटर बनाउन भनेका छन्।
बेलायत बेस्ड फर्मुला-१ ले दैनिक १ हजार स्वास्थ्य सामाग्री बनाउन आफ्नो टिम योग्य रहेको सरकारी निकायलाई बताइसकेको छ। यद्यपि एटोमिक साइन्टिस्टले भने कार उत्पादकले बनाएको मेडिकल सामाग्री त्यति विश्वसनीय नहुने भन्दै विज्ञप्ति जारी गरेको थियो।
तर कार उत्पादकहरुले भने यो संकटको घडीमा सरकारले भने बमोजिम गुणस्तर कायम गर्दै पूर्ण क्षमतामा भेन्टिलेटरसहित आवश्यक स्वास्थ्य सामाग्री बनाउन प्रतिबद्ध रहेको बताएका छन्। इटालियन कार उत्पादक समूह फियाट क्राइसलरले पनि भेन्टिलेटर बनाइरहेको छ। इटाली हालसम्म कोरोना भाइरसको सबैभन्दा बढी प्रभावित मुलुक हो।
त्यहाँ कोरोनाबाट सोमबारसम्म १५ हजारभन्दा बढीले ज्यान गुमाइसकेका छन्। महामारीको यो अवस्थामा सबै कार उत्पादकलाई सरकारले गरेको आग्रहलाई दायित्वको रूपमा ग्रहण गरेका छन्। इटालियन कम्पनी पिएसएले सरकारले आग्रह गरेलगत्तै उत्पादन क्षमता बढाएर महामारीविरूद्ध लड्न मास्क तथा अन्य उपकरण उत्पादन केन्द्रित भएको कम्पनीका सिइओ माइक मनलेले बताएका छन्।
अमेरिकी कम्पनी टेस्लाले समेत भेन्टिलेटर बनाउन गरेको सरकारको आग्रहअनुसार काम गरिरहेको जनाएको छ। टेस्लाले भेन्टिलेटरको डिजाइन, आवश्यक मटेरियल्स जुटाएर बनाउन थालिसकेको छ।
भारतीय कम्पनी महिन्द्राले पनि भेन्टिलेटर बनाउन सकिने र त्यसका लागि आवश्यक तयारी गरिसकेको जनाएको छ। बेलायतको भक्सहल, एयरबस र रोल्स रोयसलेपनि राज्यलाई सहयोग गर्न सकिने क्षेत्र पहिचान गरी काम गरिरहेको छ। बेलायतको एनएचएसँग हाल ८ हजार भेन्टिलेटर रहेको र तत्काल कम्तिमा २० हजार भेन्टिलेटर आवश्यक पर्ने अघिल्लो साता नै बताएका थिए। ज्यागुअर ल्याण्ड रोभरसहित रोल्स रोयस, एयरबस र युनिपार्टले १ साताभित्रै आवश्यक स्वास्थ्य उपकरण बनाएका थिए।
भेन्टिलेटर कोभिड १९ बाट ग्रसित बिरामीलाई अतिआवश्यक हुन्छ। यसले उनीहरूलाई सास फेर्न सहज बनाउँछ। भेन्टिलेटर जीवन र मरणको दोसाँध हो।
(इन्डिपेन्डेन्ट डटकम, द इकोनोमिक्स टाइम्स डटकम लगायत अनलाइनमा प्रकाशित समाचारबाट अनुवाद गरिएको)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
