काठमाडौं- सरकारले कोरोना भाइरसका कारण काममा बाधा परेकाले आयोजनाहरूको ठेक्का म्याद थप गर्न चाहेमा १ महिना थप गरिदिने भएको छ। आइतबार बसेको मन्त्रिपरिषद् बैठकले यस्तो निर्णय गरेको हो।
सार्वजनिक खरिद ऐन बमोजिम भएका खरिद सम्झौताका लागि ठेकेदार कम्पनीले म्याद थप गर्न माग गरे १ महिना थप गरिने व्यवस्था मन्त्रिपरिषद्ले गरेको हो। मन्त्रिपरिषद्को निर्णयमा भनिएको छ, 'कोराना भाइरसको संक्रमणको नियन्त्रणका लागि नेपाल सरकारले लकडाउन गर्ने निर्णय हुनु अगाडि सार्वजनिक खरिद ऐनबमोजिम भएका सार्वजनिक खरीद संझौताको म्याद थप गर्न माग गरेमा एक महिनासम्म थप गर्ने।'
यसरी म्याद थप गर्दा २०७६ चैत महिनामा बैंक ग्यारेन्टीको म्याद समाप्त हुने अवस्था भएमा सो बैंक ग्यारेन्टी जारी गर्ने बैंकले बिना थप दस्तुर लकडाउन खुलेको मितिले एक महिनासम्म मान्य हुने गरी म्याद थप गर्नुपर्ने व्यवस्था समेत सरकारले गरेको छ।
कोरोना भाइरसको संक्रमण फैलन सक्ने सम्भावनालाई न्यूनीकरण गर्न सरकारले चैत ११ गतेदेखि १ साताका लागि लकडाउन गरेको थियो। गएको आइतबारको मन्त्रिपरिषद् बैठकले लकडाउनको म्याद थप गर्दै चैत २५ गतेसम्मलाई पुर्याएको थियो।
यो अवधिमा अत्यावश्यक बाहेकका कुनै पनि काम हुन नसकेकाले सरकारले ठेकेदार कम्पनीहरूलाई उक्त सुविधा दिएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
