दार्चुला- भारतीय सीमाबाट नेपाल प्रवेश गर्ने पुल बन्द भएपछि पाैडिएर नेपाल छिरेका एक नेपालीलाई प्रहरीले नियन्त्रणमा लिएकाे छ। प्रहरीले नियन्त्रणमा लिए लगत्तै आक्रोसित हुँदै उनले आफूलाई नसमात्न चेतावनी दिएका छन्।
चार दिनदेखि भारतको धार्चुलामा रहेका उनी पुल नखोलेपछि जाेखिम माेल्दै महाकाली नदीमा हेलिएका थिए। नेपाल आएपछि उनलाई प्रहरीले नियन्त्रणमा लिएकाे हाे। यसरी पाैडिएर नेपाल आउने व्यक्ति हुन्, बैतडीकाे डिलाशैनी गाउँपालिका १ कोटपेटराका ४८ वर्षीय इन्द्रराज खत्री।
प्रहरीले थुन्न खोजेपछि उनीले रिसाएर आफू छेउ नआउन चेतावनी दिए। उनी भारतको रीमामा मजदुरी गरी घर फर्किँदा नेपालमा लकडाउन भएकाे थियाे भने सीमा क्षेत्र बन्द भएकाे थियाे। जसका कारण उनी भारतको धार्चुलामा अलपत्र थिए।
‘यहाँ नजिक नआऊ। हामी रक्सी खान लागेको हो? खान र जीवन यापनका लागि भारत गएको हो,’ प्रहरीले पक्राउ गरेर ल्याएपछि उनले भने, ‘हाम्रा बच्चाकाे जिम्मा कसले लिन्छ? केपी शर्माले लिने हो? कि सांसद गणेश ठगुन्नाले जिम्मा लिने हो?’
उनको प्रश्नपछि प्रहरीले कताबाट आएको भनेर सोध्दा उनले प्रहरीलाई पुल बन्द भएपछि नदीमा पौडी खेलेर आएको जवाफ दिए। उनलाई नेपाल प्रहरी र सशस्त्र प्रहरीले नियन्त्रण लिएको हो। पुल खोल्न प्रमुख जिल्ला अधिकारीसँग आग्रह गर्न पौडी खेलेर नेपाल आएको खत्रीले बताए।
सरकारले नेपाल आउन दिनुपर्ने आफूहरुकाे माग रहेको उनको भनाइ छ। अहिले दार्चुला सीमा नाकामा ३ सय बढी नेपाली रोकिएका छन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।