काठमाडौं- कोरोना भाइरसका कारण सबै कलकारखाना तथा कार्यालयहरू बन्द छन्। सरकारले नै अत्यावश्यक काम बाहेक घरबाहिर ननिस्कन आह्वान गर्दै लकडाउन गरेको छ।
मंगलबार बिहान ६ बजेदेखि गरेकाे एक साता लामो लकडाउन नसकिँदै सरकारले आइतबार पुनः चैत २५ गते राति १२ बजेसम्मका लागि लकडाउनको अवधि बढाएको छ। योसँगै सवारी साधनमा लाग्ने वार्षिक कर, नवीकरण, सवारी चालक अनुमतिपत्र नवीकरण, प्रदूषण जाँचपास तथा रूटपर्मिट नवीकरणको अवधि यहि समयमा सकिन सक्छ।
यसरी समय सकिएपछि नियमअनुसार जरिवाना लाग्ने कानुनी व्यवस्था रहेको छ। लकडाउनका कारण न सवारी धनी कर तिर्न तथा नवीकरण गर्न जानसक्छ न त कार्यालयहरू नै खुलेका छन्। यो अवधिमा कर तिर्ने तथा नवीकरण गर्ने म्याद गुज्रिएकाहरूले लकडाउन खुलेपछि कर तिर्दा जरिवाना नलाग्ने व्यवस्था सरकारले गरेको छ।
आइतबार बसेको मन्त्रिपरिषद् बैंठकले कोरोना भाइरसको कारण उत्पन्न परिस्थितिलाई ध्यानमा राख्दै सवारी साधन प्रयोगमा लाग्ने कर लगायतका विषयमा समय थप गरेको हो। यो विषम परिस्थतिमा सरकारी कार्यालय बन्द रहेको र लकडाउन खुलेको एक महिनाभित्रमा बाँकी रहेका काम सक्नुपर्ने गरी आगामी बैशाख मसान्तसम्मको समय थप गरिएको हाे।
अर्थ र सञ्चार तथा सूचना प्रविधिमन्त्री डा युवराज खतिवडाले असहज परिस्थितिका कारण सरकारले यो अवधिमा कर तिर्नु पर्नेहरूले लकडाउनपछि बैशाखसम्ममा कर तथा नवीकरण गर्दा जरिवाना नलाग्ने व्यवस्था मिलाइएको जानकारी दिए।
अहिलेको अवस्थामा सवारी नवीकरण, यातायात तथा सवारी चालक अनुमतिपत्र, सवारी चालकको नवीकरण, प्रदूषण नवीकरण, रुट नवीकरणजस्ता कामहरु बैशाख मसान्तसम्ममा गर्न सकिने गरी समय थप गरिएको हाे। माथि उल्लेखित कामको लागि कुनै किसिमको बिलम्ब शुल्क र जरिवाना नलाग्ने मन्त्रिपरिषद्ले निर्णय गरेको हो।
जरिवाना मिनाहा गर्ने अधिकार कार्यालय वा प्रदेश सरकारलाई छैन। त्यसैले केन्द्र सरकारले मन्त्रिपरिषद्बाट उक्त निर्णय गरेको हो। यो निर्णयले देशभरका सवारी धनीहरूलाई केही राहत मिलेको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।