काठमाडौं- लकडाउनका कारण आर्थिक अभाव भएर भोको बस्नु परेको महानगरीय प्रहरी कार्यालयले निःशुल्क खाद्यान्न उपलब्ध गराउने भएको छ। यसका लागि प्रहरीको सय नम्बरमा फोन गर्नुपर्नेछ।
राहत वितरणका लागि विभिन्न बैंक तथा व्यवसायीसँग समन्वय थालिसकेको कार्यालय प्रमुख प्रहरी नायब महानिरीक्षक विश्वराज पोखरेलले जानकारी दिए। पहिलो चरणमा २ सय ५८ जनालाई पुग्ने खाद्यान्न संकलन भइसकेको र आजै वितरण गरिने पोखरेलले बताए। मागका आधारमा तीनै जिल्लामा निःशुल्क राहत दिइने उनले बताए।
मुलुकमा कोभिड-१९ को संक्रमणको जोखिम बढेपछि सरकारले अत्यावश्यक कामबाहेक बाहिर ननिस्कन आदेश जारी गरेको आज छैठौँ दिन हो। लकडाउनका कारण दैनिक ज्याला मजदुरी गरेर गुजारा चलाउने कामदार तथा विपन्न र गरिब परिवारमा समस्या बल्झिँदै छ। दैनिक दाताले दिएको सहयोगमा चल्ने आश्रम, संरक्षण केन्द्र र बाल तथा वृद्धाश्रममा समेत समस्याको चाङ चुलिएको छ। लकडाउन जति दिन बढ्छ उनीहरुको दैनिकी थप कष्टकर हुँदै जान्छ।
‘मानवीयताका लागि जे सकिन्छ सहयोग गरौँ भनेर लागेका छौँ, कोही पनि भोकै बस्नु नपरोस् भनेर पैसा कै अभावमा भोकै बस्न बाध्य भएका नागरिकलाई निःशुल्क खाद्यान्न वितरण गर्न लागेका छौँ’, डिआइजी पोखरेलले भने, ‘समस्या हुनेले सिधै मलाई (मेट्रो वानमा) फोन गर्न सक्नुहुन्छ, प्रहरीको १०० नम्बर वा नजिकको प्रहरी कार्यालयमार्फत सम्पर्कमा आउन सक्नुहुन्छ, हामी राहत लिएर आउने छौँ।’
कसैले आफ्नो घरमा भएर पनि या किनेर खान सक्ने आए भने कारबाही गर्ने चेतावनी प्रहरीको छ। त्यसका लागि मातहतका प्रहरी प्रभाव र वृत्तले छानबिन गर्ने छन्। वास्तविक प्रभावितलाई मात्रै राहत दिइनेछ।
‘हाम्रो अभियान भनेको हुँदै नभएका, अलपत्र परेका र किनेरसमेत खान नसक्नेका लागि हो, दाताको सहयोग नपाएर सञ्चालनमै समस्या परेका आश्रमका लागि हो,’ पोखरेलले भने।
उनका अनुसार आइतवार एनआइसी एशिया बैंकको सहयोगमा झण्डै पाँच लाख बराबरको राहत वितरणको तयारी गरिएको छ। प्रतिपरिवार २५ किलो चामल, दुई किलो दाल, दुई किलो चना, एक किलो नून, आधा लिटर तेल र एक प्याकेट मसला प्याकेजका रुपमा राहत सामग्री वितरण गरिनेछ।
अन्य बैंकबाट पनि सहयोगमा सहकार्य गर्ने जानकारी आएको र यो कार्यक्रमलाई लकडाउनको अवधिभर निरन्तरता दिने पोखरेलले बताए। उपत्यकाको मातहतका प्रहरीलाई वास्तविक अभाव भएकाको विवरण ल्याउनसमेत भनिएको छ। राहत सामग्री प्रहरी आफैँले सुरक्षित तवरमा वितरण गर्ने जनाइएको छ। यो कार्यक्रम उपत्यकाको तीनै जिल्लामा लागू गरिएको छ।
पैसा नभएर एक छाक खानबाट कोही पनि बञ्चित नहोउन् भनेर उनीहरुका लागि निःशुल्क खाद्य सामग्री वितरण गर्न लागिएको हो। प्रहरीले अभाव भएकालाई सम्पर्कमा आउन अनुरोधसमेत गरिएको छ। विश्वमा कोरोना भाइसरको महामारी फैलिरहेका बेला नेपालमा अहिलेसम्म पाँच जनामा रोगको संक्रमण भएको पाइएको छ। जोखिम कायमै भएकाले अझै सतर्कता अपनाउनुपर्नेछ। लकडाउन प्रभावकारी देखिए पनि बिहान बेलुका उल्लंघन गर्ने क्रम भने रोकिएको छैन। प्रहरीले अहिले त्यस्ता व्यक्तिलाई सडकमै होल्ड गर्न थालेको छ। -नारायण ढुङ्गाना
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
