काठमाडौं– निजी हवाई सेवा प्रदायक कम्पनी बुद्ध एयरले चार्टर उडानमार्फत् पोखराबाट ५८ विदेशी नागरिकको उद्धार गरेको छ। फान्सेली दूतावासको आग्रहमा परराष्ट्र मन्त्रालयको सिफारिसमा गृह मन्त्रालय हुँदै नेपाल नागरिक उड्डयन प्राधिकरणले बुद्ध एयरलाई स्पेसल उडान अनुमति दिएपछि बुद्धले विदेशीलाई काठमाडौं ल्याएको हो।
उडान अनुमतिसँगै परराष्ट्र मन्त्रालयले प्राधिकरणमार्फत् बुद्ध एयरलाई उद्धार गर्ने विदेशी नागरिकको नाम लिष्ट उपलब्ध गराएको थियो। दिउँसो ३ बजेर १५ मिनेटतिर काठमाडौंबाट पोखराका लागि उडेको बुद्ध एयरको एटिआर ७२ जहाजले ५८ जना विदेशी नागरिकको उद्धार गरेको हो। उद्धार गरिएको नागरिकमध्ये अधिकांश फान्सेली नागरिक छन्। पोखरा र लुक्लाबाट उद्धार गरिएका फान्सेली नागरिकलाई अब फान्सले चार्टर जहाज पठाएर आफ्नो देश लैजानेछ।
उनीहरू आफ्नो देश नलैजाँदासम्म विमानस्थल आसपासको होटलमा राखिने छ। त्यसको खर्च फान्सेली पक्षले तिर्नेछ।
बिहीबार मात्रै लुक्लाबाट पनि तारा एयरले फान्सेली नागरिकको उद्धार गरेको थियो। लुक्लाबाट १५ जना उद्धार गरिएको थियो। उक्त उद्धारमा पनि अधिकांश फान्सेली नै थिए।
यसबाहेक बुधबार र बिहीबार एयर डाइनेस्टीले १२ जना, सिम्रिकले ४ जना विदेशीको सगरमाथा क्षेत्रबाट उद्धार गरेका थिए।
यसअघि बुधबार मात्रै कोरोना भाइरस रोग रोकथाम तथा जोखिम न्यूनीकरण उच्चस्तरीय समितिले देशको विभिन्न ठाउँमा अलपत्र परेको विदेशी नागरिकको उद्धार गरी उनीहरुकै देश फिर्ता गर्ने निर्णय गरेको थियो।
सरकारले नेपालको विभिन्न भूभागमा रहेका विदेशी पर्यटकलाई त्रिभुवन अन्तर्रा्ष्ट्रिय विमानस्थलमा ल्याउँदै उनीहरुकै देश फर्काउने तयारीलाई तीव्रता दिएको छ।
कोरोना जोखिम न्यूनीकरण उच्चस्तरीय समितिको बुधबारको निर्णयपछि संस्कृति, पर्यटन तथा नागरिक उड्डयन मन्त्रालयले पनि आफू मातहतको निकायलाई देभका विभिन्न ठाउँमा रहेको पर्यटकको खोजी गरी उद्धारको तयारी गर्ने निर्देशन दिएको छ।
यता नेपाल नागरिक उड्डनय प्राधिकरणले पनि लकडाउनको बेलामा मुभमेन्ट कम हुने गरी पर्यटक उद्धारका लागि स्पेसल उडान अनुमति दिने थालेको छ। प्राधिकरणले गृह र पराराष्ट्र मन्त्रालयको रिफारिसमा विदशीको उद्धार गर्ने उडान अुनमति दिँदै आएको छ। ठूला जहाज जान सक्ने ठाउँमा जहाजबाट र पहाडी क्षेत्रमा रहेको विदेशी नागरिक उद्धारका लागि हेलिकोप्टर उडानमा अनुमति दिने तयारी गरेको प्राधिकरण महानिर्देशक राजन पोखरेलले जानकारी दिए।
लकडाउनसँगै पोखरामा अझ पनि केही पर्यटक अलपत्रमा परेको सुनिन आएको संस्कृति, पर्यटन तथा नागरिक उड्डयन मन्त्रालयले जनाएको छ। अलपत्रमा परेको पर्यटकको उद्धारका लागि सरोकारवाला निकायसँग छलफल भइरहेको मन्त्रालयले जनाएको छ। त्यसमध्ये बिहीबार ५८ जनाको उद्धार भएको हो।
समितिले त्रिभुवन अन्तर्राष्ट्रिय विमानस्थलमा ल्याएपछि पनि तत्काल उनीहरुलाई फर्काउन नसकेको अवस्थामा उनीहरुकै खर्चमा होटलमा राखेर व्यवस्थापन गर्न निर्देशन दिएको थियो।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।