काठमाडौं- भारतको पट्नाबाट नेपालसँगको व्यापार सहजीकरणका लागि दुईपक्षीय छलफल भएको छ। भन्सार विभागका महानिर्देशक र पटनाका भन्सार अधिकारीहरुको बिहीबार दिउँसो भिडिओ कन्फरेन्समार्फत छलफल भएको हो।
अत्यावश्यक वस्तुको सहज आपूर्ति व्यवस्थापनका विषयमा दुई निकायका अधिकारीहरुको छलफल भएको छ। यसैगरी भारतमा लकडाउन भएपछि अवरुद्ध भएको नेपालको आयातलाई सहज बनाउन सहयोग गर्न पनि भन्सार विभागका महानिर्देशक सुमन दाहालले पट्नाका अधिकारीहरुलाई आग्रह गरेका छन्।
छलफलमा नेपाली पक्षले भारत र तेस्रो मुलुकबाट आयातित वस्तुहरुको पारवहन प्रक्रिया सहज बनाइदिन आग्रह गरेको छ। 'नेपालमा भन्सारमा स्वास्थ्य सुरक्षाका लागि अपनाइएका उपायहरु प्रति उनीहरुले खुशी व्यक्त गरे र नेपाल प्रवेश गर्न लागेका वस्तुको पारहवन पहिलो प्राथमिकता हुने बताएका छन्,' महानिर्देशक दाहालले भने।
नेपाली पक्षले मास्क, स्यानिटाइजर र भेन्टिलेटर जस्ता वस्तुको निकासीलाई पहिलो प्राथमिकता दिन आग्रह गरेको छ। 'अहिले आयात रोकिए पनि बाटोमा रहेका वस्तु निकासीका लागि भने सहज व्यवस्पान गरिदिन उनीहरु सहमत भएका छन्,' उनले भने।
उनीहरुले यसबारे आफ्ना माथिल्ला निकायसँग कुरा गरेर औषधिलगायतका अत्यावश्यक वस्तु नेपाल पठाउने बाटो खुला गर्ने बचन दिएका दाहालले जानकारी दिए।
यसैगरी भन्सार एजेन्टहरुका लागि पास उपलब्ध गराउन र व्यवसायका लागि भारत जानुपर्ने व्यवसायीका लागि पनि पास उपलब्ध गराइदिन भन्सार विभागले बिहार सरकारलाई आग्रह गरेको छ।
जवाफमा भारतीय पक्षले नेपाल भित्रिने अत्यावश्यक वस्तुको सहज निकासीमा सहयोग गर्ने र नेपालले भनेजस्तो भन्सार एजेन्ट र व्यवसायीलाई पास उपलब्ध गराइदिने वचन दिएको छ।
भारतीय पक्षले नेपालमा वनस्पतीको क्वारेन्टाइन वीरगञ्ज भन्सारबाट टाढा रहेकाले त्यसको व्यवस्था गर्न आग्रह गरेका छ्न्। नेपाली पक्षले यसको सहज व्यवस्थापनका लागि अन्य निकायसँग छलफल गर्ने बचन दिएको छ।
नेपालको मुख्य दुई व्यापारिक नाका वीरगञ्ज र विराटनगरमा बिहारबाट सामान आयात हुन्छ। विभागले पश्चिम बंगाल र उत्तर प्रदेशसँग पनि यस्तै छलफलको तयारी गरेको छ। यी ३ राज्यबाट सहज व्यापार भए नेपाल र भारतबीचको दुईपक्षीय व्यापार लगभग सबै समेटिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787798392.jpg)
-1786602170.png)
-1787821306.jpg)
-1786513116.png)
