कोरोना अपडेट

भारत तथा खाडीबाट रोल्पा भित्रिने मुख्य निगरानीमा

महेश न्यौपाने बुधबार, चैत १२, २०७६ ११:३७

रोल्पा–रोजगारीको मुख्य गन्तव्य भारत तथा खाडी मुलुकबाट फर्कने क्रम बढेसँगै रोल्पामा पनि कोरोना भाईरस फैलन नदिन पूर्व तयारीका काम तीव्र गतिमा अघि बढिरहेका छन्।

नेपाली सेनाको सहयोगमा रोल्पा अस्पताल परिसरमा आइसोलेसन कक्ष तयार गरिएको छ। रोल्पा अस्पतालका ४ कोठा र नेपाली सेनाको सहयोगमा निर्माण भएको टेन्टलाई आईसोलेसन कक्षको रुपमा तयार गरिएको हो।

रोल्पा नगरपालिकाले नगरका सबै वडामा सूचना संकलन गरेको बताएको छ। ‘नगरका १० वटै वडामा जिल्लाबाहिरबाट आउने व्यक्तिको लगत संकलन गर्ने व्यवस्था गरेका छौं,’ नगर प्रमुख पूर्ण केसीले भने।

बाहिरबाट आउने व्यक्तिलाई जिल्ला सदरमुकाम लिवाङमा स्वास्थ्य जाँचको समेत व्यवस्था गरेको उनले बताए।

दाङवाट रोल्पा भित्रिने नाकाको रुपमा रहेको होलेरीमा प्राथमिक स्वास्थ्य केन्द्रले १५ कोठाको आइसोसेलन कक्ष तयार गरेको छ। प्यूठानबाट रोल्पा भित्रने सुनिलस्मृति गाउँपालिकाको खुंग्रीमा समेत आईसोलेसन कक्ष तयार गरिएको छ । जिल्लाका सबै गाउँपालिकाले हेल्थ डेस्क स्थापना गरेका छन्।

गाउँपालिकाभित्र रहेर स्वास्थ्य क्षेत्रमा काम गरिरहेका संघ संस्थाहरुसँगको सहकार्यमा कोरोनाविरुद्ध सचेतनामुलक कार्यक्रम सञ्चालन गरिरहेको सुनिलस्मृति गाउँपालिकाले जनाएको छ । साहस नेपाल, स्ट्रोम फाउन्डेसन र गाउँपालिका मिलेर पर्चा पम्प्लेट वितरण, बजार क्षेत्रहरुमा माईकिङ गर्ने काम गरिरहेको वडाध्यक्ष गंज क्षेत्रीले बताए।

जिल्लाको लुंग्री गाउँपालिकाले गाउँपालिका प्रवेशद्वारको रुपमा रहेका रुईनिवाङ, दोमई, मैनामारे, जुतुङखोलालगायतका स्थानमा हेल्थ डेस्क स्थापना गरेको छ। गाउँपालिका प्रवेश गर्दा अनिवार्य स्वास्थ्य परीक्षण गर्ने व्यवस्था गरेको गाउँपालिका अध्यक्ष दुर्गा खड्काले बताए।

जिल्लाको थवाङ गाउँपालिकाले कोरोना आपतकालीन कोष स्थापना गरेको छ। गाउँपालिका उपाध्यक्ष रामकिरणी रोकाको संयोजकत्वमा गठित समितिमा अन्य ४ सदस्य छन्। ग्लोवल आईएमई वैंकमा खाता रहने गरि सञ्चालन गरिएको कोषबाट कोरोना संक्रमितहरुको उपचारमा खर्च गरिने गाउँपालिकाका स्वास्थ्य संयोजक तुलवहादुर पुनले जानकारी दिए। कोषमा गाउँपालिकाले ५ हजार रुपैयाँ जम्मा गरेको छ।

यसैगरि गाउँपालिका अध्यक्ष वीरवहादुर घर्ती, उपाध्यक्ष रामकिरणी रोका, प्रमुख प्रशासकीय अधिकृत रेवतवहादुर वुढाथोकीले ५/५ हजार जम्मा गरेका छन्। कोषमा थवाङ गाउँपालिकामा कार्यरत कर्मचारीहरुले १ महिनाको पारिश्रमिकको १० प्रतिशत रकम जम्मा गर्ने भएका छन्। ‘कोषमा अन्य जनप्रतिनिधि, स्थानीय व्यापारी र सर्वसाधारणले समेत रकम जम्मा गर्ने अपेक्षा गरेका छौं,’ स्वास्थ्य संयोजक पुनले भने ।

सुनछहरी गाउँपालिकाले समेत पोवाङमा हात धुने व्यवस्था गरेको छ। ‘गाउँपालिका बाहिरबाट आउनेहरुलाई १४ दिन होम क्वारेन्टाईनमा राख्ने व्यवस्था गरेका छौं,’ गाउँपालिका अध्यक्ष आशबहादुर पुनले भने। गाउँपालिका छिर्नेहरुलाई स्वास्थ्य जाँचको व्यवस्था गरिएको पुनले बताए।

गाउँपालिकाका सवै वडामा रहेका स्वास्थ्य संस्थामा कम्तिमा २/२ वटा बेडको व्यवस्था रहने गरि आईसोलेसन कक्ष तयार गरिएको अध्यक्ष पुनले जानकारी दिए। गाउँपालिकानजिक रहेको पोवाङ स्वास्थ्य चौकीमा भने ५ वेडको आइसोलेसन कक्ष तयार गरिएको छ।

जिल्लाका सबै स्थानीय सरकारहरुले कोरोनाविरुद्ध सचेतना, क्वारेन्टाईन र आइसोलेसन कक्ष सञ्चालन गरेको प्रमुख जिल्ला अधिकारी लक्ष्मण ढकालले जानकारी दिए।

स्वास्थ्यकर्मीलाई मेडिकल सामग्री छैन

कोरोना संक्रमणको आशंका गरिएका बिरामी जाँच गराउदा लगाउने मेडिकल सामग्री नभएको रोल्पाका स्वास्थ्यकर्मीहरुले गुनासो गरेका छन्। संक्रमण परीक्षण गर्दा चाहिने आधारभूत मेडिकल सामग्री गाउन, बुट, मास्क र ग्लोभ्स उपलव्ध नभएको उनीहरुले बताए।

‘संक्रमणविरुद्ध लड्ने पहिलो पंक्तिको योद्धा भनेकै स्वास्थ्यकर्मी भए पनि उनीहरुका लागि चाहिने आधारभूत मेडिकल सामग्री अहिलेसम्म उपलव्ध हुन सकेको छैन,’ रोल्पा अस्पतालका डा अनिल केसीले भने। आईसोलेसन कक्षभन्दा पहिला स्वास्थ्यकर्मीका लागि मेडिकल सामग्री जरुरी रहेको उनले बताए। होम क्वारेन्टाईन नै उपयुक्त र सजिलो विधि भएको डा केसीको भनाइ छ। स्याम्पल परिक्षणका लागि चाहिने उपकरण भिटीएम समेत नभएको अस्पतालले जनाएको छ।

यसअघि रोल्पा उद्योग वाणिज्य संघले आयोजना गरेको सर्वपक्षीय बैठकमा स्थानीय प्रशासन र जनप्रतिनिधिले अविलम्व आईसोलेसन कक्ष तयार गर्ने बताएका थिए। सर्वपक्षीय बैठकको निर्णयबमोजिम जिल्लालाई अनिश्चितकालीन लकडाउन गरिएको छ।