काठमाडौं- कोरोना भाइरसको संक्रमण फैलन नदिन नेपाली सेनाले पर्सनल प्रोटेक्टिभ सामाग्री र मास्क, पञ्जा र सेनिटाइजरको उत्पादन सुरु गरेको छ। संक्रमणको जोखिम बढेसँगै सेनाले उत्पादन समेत सुरु गरेको हो।
जन सम्पर्क तथा सूचना निर्देशनालयका अनुसार प्रत्येक प्रदेशमा क्वारेन्टाइन र आइसोलेसन वार्ड तयार गरेको र नेपाल सरकारले सिमामा स्थापना गरेको हेल्थ डेस्कहरुमा समेत दक्ष स्वास्थ्यकर्मीलगायत सुरक्षाको लागि सेनाका व्यक्ति परिचालन गरिएको छ।
कोरोना संक्रमण नियन्त्रण र रोकथामका लागि नेपाली सेनाले संगठनका सदस्यलाई बिदामा पठाउने र बिदा सकिएर ब्यारेक फर्केनेलाई अनिवार्य क्वारेन्टाइनमा राख्ने निर्णय गरेको विज्ञप्तीमा उल्लेख छ।
कोरोना भाइरससम्बन्धी कुनै संक्रमणका घटना आए सेनाका चिकित्सकसहित रथी तथा अधिकृतहरुसहितको कोर टिम गठन गरी सम्पूर्ण युनिट/सब-युनिट तथा अन्य सरकारी निकायसँग आवश्यक समन्वय गर्ने संयन्त्रको व्यवस्था मिलाइएको निर्देशनालयद्वारा जारी विज्ञप्तिमा उल्लेख छ।
सेनाले प्रत्येक प्रदेशमा क्वारेन्टाइन र आइसोलेसन वार्ड तयार गरेको, विभिन्न जिल्लामा प्रदेश सरकारसँगको समन्वयमा नेपाली सेनाका स्थानीय स्तरको क्वारेन्टाइन तथा आइसोलेसन वार्डहरु तयार गर्न सहयोग गरिरहेको, कोरोना भाइरस रोकथाम तथा न्युनिकरणको लागि राष्ट्रिय सेवा दलबाट तालिमप्राप्त विद्यार्थीलाई स्वयम् सेवकको रुपमा सचेतना कार्यको लागि परिचालन गर्न सुरु गरिएको विज्ञप्तिमा उल्लेख छ।
ब्यारेक हाताभित्रका बासस्थानमा खाटहरुको दूरी घटीमा एक मिटरको राख्ने व्यवस्था मिलाइएको र ब्यारेक हाताभित्र नै लकडाउन गरिएको सेनाले जनाएको छ। कोरोना भाइरस संक्रमण नेपालमा समेत फैलिन सक्ने परिस्थितिलाई दृष्टिगत गरी सम्भावित प्रतिकूल परिस्थितिमा संक्रमण नियन्त्रण तथा बिरामीको उपचारका लागि सरकारबाट पाएको जिम्मेवारी वहन गर्न सेना तयार रहेको र उच्च जोखिमविरुद्ध बचाउ तथा रोकथामका लागि उपलब्ध सबै उपायहरु अवलम्बन गर्न प्रतिबद्ध रहेको विज्ञप्तिमा उल्लेख गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749307650.png)
-1749200817.png)
