काठमाडौं–विश्वभर फैलिएको कोरोना भाइरसको प्रभावबाट पर्न सक्ने असर न्यूनीकरण र आपूर्ति प्रणाली व्यवस्थित गर्न उद्योग, वाणिज्य तथा आपूर्ति मन्त्री लेखराज भट्टले निजी क्षेत्रका छाता संगठनसँग छलफल गरेका छन्।
सरकार र निजी क्षेत्रको सहकार्यमा गर्नुपर्ने कामका विषयमा मन्त्री भट्टले नेपाल उद्योग वाणिज्य महासंघ, नेपाल चेम्बर अफ कमर्श र नेपाल उद्योग परिसंघका अध्यक्ष लगायतका पदाधिकारीसँग छलफल गरेका हुन्।
छलफलपछि दैनिक उपभोग्य खाद्य सामग्रीको जिल्लागत आवश्यकता पहिचान गरी उद्योगी, व्यवसायी, एवं व्यापारीका सबै छाता संगठनले मातहतका आ–आफ्ना सदस्यहरुलाई आपूर्ति व्यवस्था सहज एवं सुलभ बनाउन र मूल्य वृद्धि हुन नदिन आवश्यक व्यवस्था मिलाउने लगायतमा महत्वपूर्ण विषयमा सहमति पनि भएको छ।
आपूर्ति व्यवस्थालाई नियमित र सहज बनाउन बढी जनसंख्या र जनघनत्व भएका तराई लगायतका जिल्लामा खाद्य वस्तुको मौज्दातको स्थिति, खपत, माग र आपूर्ति बीचको अन्तरसम्बन्धी तथ्यांक अद्यावधिक गर्ने सहयोग गर्न पनि मन्त्री भट्टले निजी क्षेत्रलाई आग्रह गरेका छन्।
उद्योगी व्यवसायीका छाता संगठनहरुले जिल्लास्थित संयन्त्रमार्फत् तथ्यांक संकलन गरी मन्त्रालयलाई दैनिक रुपमा उपलब्ध गराउने प्रतिबद्धता जनाएका छन्।
दैनिक अत्यावश्यक उपभोग्य वस्तुहरु उत्पादन गर्ने उद्योगहरुको आँकडा अद्यावधिक गर्नुका साथै उत्पादित वस्तुले बजारको माग धान्न सक्ने अवस्थाको आँकलन गर्ने र यस संकटको घडीमा त्यस्ता वस्तुहरुको नियमित उत्पादन र वितरणको व्यवस्था मिलाउने सहमति पनि निजी क्षेत्रले सरकारसँग गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791562069.png)
