काठमाडौं–तोकिएभन्दा बढी मूल्यमा सामान बेच्ने सेल्सबेरी डिपार्टमेन्ट स्टोर्सलाई २ लाख रुपैयाँ जरिवाना तिराईएको छ। आईतबार वाणिज्य, आपूर्ति तथा उपभोक्ता संरक्षण विभागले गरेको बजार अनुगमनका क्रममा जावलाखेलमा रहेको उक्त डिपार्टमेन्ट स्टोरले चामलको बोरामा बढी मूल्य लिएको भेटिएपछि कारबाहीस्वरुप जरिवाना गरिएको हो।
विभागका सहायक प्रवक्ता दीपकराज पोखरेलका अनुसार सेल्सबेरी डिपार्टमेन्ट स्टोरले भ्याट बिल बनाएर चामलको बोरामा अधिकतम खुद्रा मुल्य (एमआरपी) भन्दा बढी मूल्य राखेर बेचेको भेटिएको थियो। ‘उक्त डिपार्टमेन्ट स्टोरले बढी मूल्यमा सामान बेचेको विभागमा गुनासो आएको थियो। हामीले अनुगमन गर्दा पनि बढी मूल्य लिएको भेटिएपछि उपभोक्ता संरक्षण ऐन २०७५ बमोजिम कारबाही गरेका हौं,’पोखरेलले भने।
आईतबार वाणिज्य विभागको २ वटा टोली बजार अनुगमनमा निस्केको थियो। अनुगमन अधिकृत दीपकराज पोखरेलको नेतृत्वमा जावलाखेल र इमाडोल क्षेत्रमा अनुगमन भएको थियो भने अर्का अनुगमन अधिकृत मोहन कार्कीको नेतृत्वमा कुलेश्वर क्षेत्रमा अनुगमन भएको थियो। आइतबारको अनुगमन ग्यास पसलमा केन्द्रित भए पनि सेल्सबेरी डिपार्टमेन्ट स्टोरले बढी मूल्यमा सामान बेचेको गुनासो आएपछि त्यहाँ पनि अनुगमन गरिएको पोखरेलले बताए।
अनुगमनका क्रममा बजारमा ग्यासको समस्या धेरै नरहेको पनि आफूले पाएको पोखरेलले बताए। ‘दैनिक जसो ग्यास ढुवानी भइरहेको रहेछ। केही कम्पनीका ग्यासमा भने सामान्य लाइन पनि देखियो। हामीले अनुगमन गरेको क्षेत्रमा नेपाल ग्यासको ३ सय सिलिण्डर लाईनमा रहेको देखियो। अरुमा खासै समस्या छैन,’पोखरेलले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791562069.png)
