काठमाडौं- परिस्थिति जटिल बनेको खण्डमा रेडक्रसले थप सहयोगको रणनीति बनाएको छ। कोरोना भाइरस संक्रमित र सम्भावित जोखिम भएका व्यक्तिहरूलाई घर वा सामुदायिक स्थलहरूमा क्वारेन्टाइनमा राख्नुपर्ने अवस्था आएमा रेडक्रसले स्थानको सहयोगका साथै आइसोलेसन वा क्वारेन्टाइनमा रहेका व्यक्तिहरूका लागि सहयो गर्ने रणनीति बनाएको हो।
आवश्यक सामग्रीहरू खरिद, स्वास्थ्य अवस्थाको अभिलेखन, पारिवारिक सम्पर्क स्थापना, कैदी बन्दीहरुलाई सहयोग, मनोसामाजिक परामर्श तथा सहयोग जस्ता क्षेत्रमा काम गरी जीवन सहज बनाउन रेडक्रसकर्मीहरु खटिने योजना बनाइएको छ।
योजना अनुसार उपचार गर्ने अस्पतालहरूलाई आवश्यक सहयोगको व्यवस्था मिलाइने छ।
कोभिड-१९ भएको पुष्टि भएमा ऊसँग सो अघि सम्पर्कमा आएका व्यक्तिहरूको पनि खोजी गरी उपचार गर्नुपर्ने अवस्थामा रेडक्रसले तालिमप्राप्त टोलीको तयारी गरिसकेको छ।
प्रतिकार्यका क्रममा रेडक्रस मूल्यमान्यताका साथै बाल संरक्षण, दुर्व्यवहार, लैंगिक तथा यौन हिंसा रोकथामका विषयलाई विशेष ख्याल गर्न निकायहरुलाई निर्देशन दिइएको छ।
७७ वटै जिल्लामा सक्रियता
कोभिड–१९ रोकथाम र प्रतिकार्यका लागि नेपाल रेडक्रस सोसाइटीले संस्थाका ७७ वटै जिल्लामा स्वयंसेवक र कर्मचारीहरुको सक्रियता बढाएको छ।
मुलुकका सबै जिल्लास्तरमा रेडक्रसका शाखाले सामुदायिक परिचालक/स्वयंसेवकको व्यवस्था गरेका छन्। संस्थाका विभिन्न विभागहरुले एकीकृत योजना बनाई क्षमता विकास गरी स्वयंसेवक परिचालन, सामुदायिक आवश्यकता र संलग्नताको अवधारणा बमोजिम जनचेतनामूलक कार्यक्रमहरु केन्द्रदेखि जिल्लास्तरमा सञ्चालन भइरहेका नेपाल रेडक्रस सोसाइटी स्वास्थ्य विभागका निर्देशक विपुल न्यौपानेले बताए।
विद्यालय तथा समुदायमा छलफल कार्यक्रम, अभिमुखीकरण/तालिम सञ्चालन, स्थानीय संघ सस्थाहरूसँग बैठक, सूचना, शिक्षा तथा सञ्चार सामग्रीको वितरण, सडक नाटक तथा एफएम रेडियो मार्फत् समुदायलाई आवश्यक सही सूचनाहरू प्रचारप्रसार गतिविधिहरुमा नेपाल रेडक्रसका सोसाइटीका युवा स्वयंसेवकहरु परिचालित भएका हुन्।
कोरोनाका कारण हुनसक्ने जोखिम न्यूनीकरणका लागि नेपाल सरकार, रेडक्रसका अन्तर्राष्ट्रिय महासंघ, युएन लगायतका निकायसँग आवश्यक समन्वय गरी समग्रमा त्यसबाट हुनसक्ने क्षतिको रोकथाम तथा नियन्त्रण गर्न मद्दत पुर्याउने गरी कार्यविधि र कार्ययोजना नै तयार गरी काम भइरहेको नेपाल रेडक्रसका कार्यकारी निर्देशक उमेश ढकालले बताए।
नेपाल सरकारको स्वास्थ्य मन्त्रालयसंग निकटमा रही सन् २०२० को जनवरीदेखि कोरोना भाइरसको प्रतिकार्य र रोकथाममा नेपाल रेडक्रस सोसाइटीले काम गर्दै आएको हो। आपतकालीन केन्द्र पनि सञ्चालनमा आइसकेको छ।
रेडक्रसले भाइरसभन्दा कैयौंगुणा छिटो फैलिएको अफवाह वा भ्रम कम गराई मानसिक दबाब, पीडा र डरका साथै समुदायमा हुनसक्ने हेयभाव कम गराउन कार्य गरिरहेको नेपाल रेडक्रस सोसाइटीका सञ्चार विभाग निर्देशक दिव्यराज पौडेलले जानकारी दिए।
सहयोगका साथै व्यक्तिगत सुरक्षाको प्रबन्ध
शुक्रराज सरुवा रोग अस्पताल स्वास्थ्य डेस्कमा नेपाल रेडक्रसका स्वयंसेवकहरु दैनिक खटिइरहेका छन्। यसका साथै रेडक्रस स्वयंसेवक र कर्मचारीहरुले देश भित्रिने नाका, एयरपोर्ट तथा मानिसहरूको बढी चहलपहल हुने स्थानमा हेल्प डेक्समा सहयोग गरिरहेका छन्। यसैबीच थप सजगता अपनाउन केन्द्रीय कार्यालयमा प्रवेश गर्ने कर्मचारी तथा स्वयंसेवकको तापक्रम नाप गर्ने, गेटबाट पस्ने बित्तिकै हात धुने, बैठक बस्नै परेमा दुरी कायम गर्ने उपायहरु अवलम्बन गरिएको छ।
रक्तसञ्चार केन्द्रमा रगतको मागको लागि आउने बिरामीका आफन्तहरुलाई पनि यस्तै सुरक्षाका उपायहरु अपनाइएका छन्।
रक्तदानमा सहयोग गर्न अनुरोध
नेपाल सरकारले भिडभाड नगर्न निर्देश गरे अनुरुप मानिसहरुको सामूहिक भेला हुने क्रम घट्दै गइरहेकोले रक्तदान कार्यक्रममा समेत प्रभाव पर्न गई काठमाडौं लगायत देशका सबै जसो जिल्लाहरुमा रक्तदानका कार्यक्रमहरुमा कमी आएको रक्तसञ्चार केन्द्रकी निर्देशक डा मनिता राजकर्णिकारले बताइन्।
'रगतको आपूर्तिमा कमी हुन नदिन र रगत आवश्यक पर्ने बिरामीहरुको जीवन बचाउन पायक पर्ने रक्तसञ्चार केन्द्रहरुमा गई रक्तदान गर्न नेरेसोले अनुरोध गरेको छ।
डा राजकर्णिकारले भन्नुभयो- 'असहज परिस्थितिमा रक्तसञ्चार निरन्तर गर्न थप सतर्कता र तयारी गरिएको छ र सहयोगको लागि स्वास्थ्य मन्त्रालयसँग कुराकानी भइरहेको छ।'
अत्यावश्यक सेवाबाहेक अन्य सबै गतिविधि स्थगन
अहिलेको सन्दर्भलाई दृष्टिगत गर्दै कोरोना भाइरस तथा डेंगु रोकथाम र नियन्त्रण लगायत रक्तसञ्चार सेवा, एम्बुलेन्स सेवा, प्राथमिक उपचार तथा विपद् प्रतिकार्य जस्ता अत्यावश्यक र आपतकालीन सेवा गतिविधिहरु बाहेक अन्य तालिम, गोष्ठी, भ्रमण, भेला जस्ता कार्यक्रम अर्को सूचना जारी नभएसम्म नगर्न नगराउन नेरेसो केन्द्रीय कार्यालयले सबै निकायहरुलाई सूचना जारी गरेको संस्थाका कार्यवाहक महामन्त्री हरिप्रसाद न्यौपानेले जानकारी दिइन्।
कोरोना भाइरसको प्रकोपको परिस्थिति मूल्यांकन गरी चैत्र तेस्रो साता हुने संस्थाको महाधिवेशनलाई २०७७ जेठ अन्तिम सातालाई सारिएको नेपाल रेडक्रस सोसाइटीका अध्यक्ष संजीव थापाले बताए। यसअघि चैत्रको २३ देखि २५ गतेदेखि काठमाडौँमा महाधिवेशन तोकिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788000297.png)
-1787905631.jpeg)
-1786602170.png)
-1787821306.jpg)
-1786513116.png)
