काठमाडौं- सरकारी प्रवक्ता युवराज खतिवडाले सरकारले लामो दुरीका सवारीसाधनमा रोक लगाए पनि ढुवानी सेवाहरु अवरुद्ध नहुने बताएका छन्। कोरोना भाइरस रोकथामसम्बन्धी उच्चस्तरिय समितिको बैठकको निर्णय सार्वजनिक गर्दै उनले यसले आपूर्ति व्यवस्थामा कुनै नकारात्मक प्रभाव नपर्ने बताए।
खतिवडाले सार्वजनिक र निजी अस्पतालमा चेकजाँचमा आउनेहरुलाई शंकाकै आधारमा जाँच नगर्ने गरेको गुनासो आएको बताउँदै यस्ता प्रवृत्तिलाई निरुत्साहित गर्ने निर्णय भएको समेत बताए। उनले चाहिने स्वास्थ्य उपकरण सरकारले उपलब्ध गराउने तर स्वास्थ्य संस्थाहरुले अस्पतालमा आउनेहरुलाई शंकाकै आधारमा जाँच नगर्ने गर्न नहुने बताए।
कलकारखाना बन्द भएको अवस्थामा घर फर्कनेहरुको संख्या बढेको र धेरै भिडभाडहुँदा संक्रमणको डर हुने भएकाले लामो दुरीका सवारीसाधनको आवागमन रोकेको उनले जानकारी दिए।
सरकारले अन्तराष्ट्रिय हवाई उडान रोक्दा केही नेपाली विमानस्थलमा अलपत्र परेको सूचना आएको र सो समस्या समाधान गर्न सम्बन्धित देशको दुतावासले नेपालीलाई लगेर क्वारेन्टाइनमा राख्ने निर्णय भएको समेत जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
