काठमाडौं- सरकारले खाद्य वस्तुको अभाव हुन नदिन उच्च सतर्कता अपनाएको छ। विश्वव्यापी रुपमा फैलिएको कोरोना भाइरस ढकोभिङ-१९) संक्रमणले सर्जना गरेको संकट र आगामी दिनहरुमा यसबाट पर्न सक्ने थप प्रभावलाई मध्यनजर गर्दै सरकारले खाद्य वस्तुको मौज्दात दोब्बर बनाउनेदेखि वस्तु अभाव देखिए तत्काल समाधान गर्न एक उच्चस्तरीय कार्यदलसमेत गठन गरेको छ।
शुक्रबार उद्योग, वाणिज्य तथा आपूर्तिमन्त्री लेखराज भट्ट तथा राज्यमन्त्री मोतीलाल दुगडको उपस्थितिमा मन्त्रालय र अन्तर्गतका विभाग एवं संस्थान र कम्पनीहरुका उच्च पदाधिकारीहरुको बैठकले बजारमा दैनिक उपभोग्य अत्यावश्यक वस्तुहरु यथेष्ट मात्रामा भण्डारणका साथै पर्याप्त आपूर्ति गरी बिक्री वितरणको व्यवस्था मिलाउन आवश्यक सबै संयन्त्र परिचालन गर्ने निर्णय गरेको हो।
उक्त बैठकले मन्त्रालयका वाणिज्यतर्फका सचिवको संयोजकत्वमा सरोकारवाला मन्त्रालय र निकायका पदाधिकारीसहितको आपूर्ति व्यवस्थापन समन्वय समिति र वाणिज्य आपूर्ति तथा उपभोक्ता हित संरक्षण महाशाखा प्रमुखको संयोजकत्वमा मन्त्रालयका सम्बन्धित माहशाखाहरुको सहभागिता रहने गरी एक आपतकालीन आपूर्ति व्यवस्थापन कार्यदल गठन गर्ने निर्णय गरेको छ।
त्यस्तै खाद्य व्यवस्था तथा व्यापार कम्पनी लिमिटेड र साल्ट ट्रेडिङ कर्पोरेशन लिमिटेडको खाद्यान्न मौज्दातको वर्तमान संचितिलाई दोब्बर पार्ने निर्णय पनि उक्त बैठकले गरेको छ। आवश्यक भएमा साविकको नेशनल ट्रेडिङ् लिमिटेडको टेकूस्थित गोदाम उपयोग गर्ने तथा खाद्य व्यवस्था तथा व्यापार कम्पनी लिमिटेड, साल्ट ट्रेडिङ्ग कर्पोरेशन लिमिटेड र नेपाल आयल निगमका गोदामहरुमा संचित रहेको खाद्यान्न, ग्याँस र तेलको मौज्दातलाई बढाउने निर्णयसमेत भएको छ।
खाद्यान्न अभाव हुनसक्ने दुर्गम पहाडी जिल्लाहरुमा सम्भावित खाद्य संकट आउन नदिन समयमै आवश्यक परिमाणमा खाद्यान्न ढुवानीको व्यवस्था गर्न पनि मन्त्रालयले निर्देशन दिएको छ।
बजार अनुगमनका लागि वाणिज्य, आपूर्ति तथा उपभोक्ता संरक्षण विभागको नेतृत्वमा एकीकृत टोली निर्माण गरी परिचालन गर्ने र यसका लागि संघीय मामिला तथा सामान्य प्रशासन मन्त्रालयसँग आवश्यक जनशक्ति माग गर्ने निर्णय पनि बैठकले गरेको छ। अनुगमनमा देखिएका नियमविपरीतका क्रियाकलापमा संलग्न व्यवसायीहरुलाई तत्कालै कानुनबमोजिम हदैसम्मको कारबाही गर्ने मन्त्रालयले जनाएको छ।
त्यस्तै मन्त्रालय र अन्तर्गतका निकायमा कार्यरत कर्मचारीहरु अति आवश्यक अवस्थामा बाहेक बिदामा नबस्ने र आवश्यक पर्दा सार्वजनिक बिदाका दिनमा समेत काम गर्ने व्यवस्था मिलाउन निर्देशन दिइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791562069.png)
