काठमाडौं- नेपाल पत्रकार महासंघले १४ बुँदे अपिल जारी गर्दै सञ्चारकर्मीलाई कोरोना भाइरसबारे समाचार सम्प्रेषणमा संवेदनशील हुन आग्रह गरेको छ। शुक्रबार अपिल जारी गर्दै महासंघले त्रास फैलने, कुनै समुदाय लक्षित, संक्रमितको गोपनियतामा गम्भीर हुन आग्रह गर्दै सकारात्मक समाचारमा केन्द्रित हुन आग्रह गरेको हो।
उपचारमा संलग्न चिकित्सकको मनोबल बढ्ने सामाग्री, उपचारपछि निको भएकाहरुको अनुभवलगायतका सामाग्री प्रकाशन र प्रशारणमा जोड दिन उसले आग्रह गरेको छ।
महासंघको अपिल
- कोरोनाको नामाकरण गर्दा नै कसैमाथि लाञ्छना नलाग्ने गरी गरिएकाले भाइरसलाई कुनै देश, क्षेत्र वा समुदायसँग मात्र जोडेर लेख्ने, बोल्ने, देखाउने नगरौं। आधा अधुरो जानकारीले त्रास र संक्रमितप्रति विभेद बढाउने काममात्र गर्छ। त्यसैले आधिकारिक स्रोत र विषयविज्ञहरुबाट मात्र सूचना लिऔं।
- कोरोना भाइरस लागेका वा लागेको हुनसक्ने पर्याप्त सम्भावना भएका मानिसहरुका बारेमा लेखौं। तर, कसैलाई पनि कोरोना भाइरसको शंका भएकै आधारमा शंकास्पद कोरोना संक्रमितजस्ता शब्द प्रयोग नगरौं। संक्रमितको व्यक्तिगत गोपनियतामा असर पुग्ने गरी समाचार सम्प्रेषण नगरौं।
- कसैलाई कोरोना लागेको छ वा कोरोनाको सम्पर्कमा आएका छन् भन्ने स्पष्ट आधार र प्रमाण छ भने लेखौं। तर, कसैलाई उसका कारणले कोरोना सर्न सक्ने वा उसले कोरोना फैलाउन सक्ने भन्नेजस्ता लाञ्छना नलगाऔं।
- वैज्ञानिक तथ्य र तथ्याङ्कका आधारमा मात्र कोरोना भाइरसका बारेमा लेख्ने गरौं। कुनै पनि अनाधिकृत सूचना वा हल्लालाई सञ्चार माध्यममा स्थान नदिऔं र आफ्ना व्यक्तिगत सामाजिक सञ्जालहरुमा पनि सेयर नगरौं।
- सरकार तथा अन्य आधिकारिक स्वास्थ्य निकायहरुले दिएका सुझावहरुलाई पालना गरौं र आधिकारिक सूचनामात्रै सम्प्रेषण गरौं। कोरोना भाइरस रोकथाम तथा उपचारका बारेमा सकारात्मक समाचारलाई प्राथमिकता दिऔं। सकारात्मक समाचारहरुले मानिसको मनोबल बढाउन सक्छ। त्रास फैलाउन सक्ने सूचना सम्प्रेषण नगरौं। चाँडो जाँच र उपचार गर्दा जीवन जोगिने कुरा पनि सबैलाई बताऔं।
- संक्रमणविरुद्ध अग्रभागमा रहेका स्वास्थ्यकर्मी, स्वयंसेवीप्रति सहयोग पुग्ने र उनीहरुलाई प्रोत्साहन हुने खालका समाचार सम्प्रेषण गरौं।
- कोरोना प्रभावित भई निको भइसकेका व्यक्तिहरु, आफूलाई सुरक्षित राख्दै कोरोना प्रभावितहरुको उपचार र हेरचाहमा संलग्नहरुका समाचार र अनुभूति प्रकाशन प्रसारण गर्दा कोरोना लागिहाले पनि निको हुनसक्छ भन्ने सन्देश जान्छ।
- कोरोनाको उपचार र रोकथाममा संलग्न स्वास्थ्यकर्मी र अग्रपंक्तिमा काम गर्ने अन्य अहिलेका ‘हिरो’ हुन्। उनीहरुलाई सम्मान गरौं र उनीहरुका सकारात्मक समाचार सामग्री सम्प्रेषण गरौं।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।