नयाँ दिल्ली- कोरोना भाइरसका कारण पूर्णरुपमा बन्द हुने पहिलो शहरमा उत्तरी कर्नाटकको कलबुर्गी शहर परेको छ। कोरोना संक्रमित एक बिरामीको मृत्यु भएपछि स्वतस्फूर्त रुपमा मानिसहरुले बजार बन्द गरेका हुन्।
कलबुर्गी शहरमा मृत्यु भएका एक व्यक्ति केही दिनअघि मात्रै साउदी अरबबाट फर्किएका थिए। सरकारले उनको सम्पर्कमा रहेका अन्य दुईभन्दा धेरै व्यक्तिको खोजी गर्दै आइसोलेसनमा राखेको छ। ७६ वर्षीया उक्त व्यक्ति साउदी अरबको धार्मिक यात्रा गरेर भारत फर्केका थिए।
स्वास्थ्य बिग्रिएपछि उनी पहिला आफ्नो घर कलबुर्गीमा बसेका थिए। तर निकै गम्भीर बिरामी भएपछि उनी हैदरबादको एक अस्पतालमा भर्ना भएका थिए। अस्पताल लैजाँदै गर्दा उनको बाटोमा मृत्यु भएको थियो। उनको मृत्यु भएको दुई दिनपछि अस्पतालको रिर्पोट आएको थियो। उक्त रिर्पोटमा उनको कोरोना पोजेटिभ देखिएको थियो। यो घटनालगत्तै पुरै शहर बन्द भएको छ।
राज्य सभामा पूर्व सदस्य ८२ वर्षीया केबी शनप्पाले बिबिसीलाई आफ्नो पुरै जिन्दगीमा यस्तो अवस्था नदेखेको बताए। ‘मैले आफ्नो आठ दशकको उमेरमा कलबुर्गी शहर यस्तो सुनसान भएको कहिल्यै देखेको थिइनँ,’ उनले भने‚ ‘यस्तो लाग्छ शहरमा कर्फ्यू लागेको छ।’
पूर्व पत्रकार टीवी शिवानन्दन सरकारी र नीजि सबै सेवा बन्द छन् केवल नगर निगमको केही सेवामात्र जारी रहेका छन्। पसल र व्यवसायिक प्रतिष्ठानका साथै सँधै खुल्ला हुने मदिरा पसल र चिया पसल पनि बन्द रहेका छन्। केही स्थानमा भने किराना पसलहरु खुल्ला रहेका छन्।
हालै कोरोनाका बिरामीलाई जाँचिरहेका डाक्टर र उनको छोरालाई समेत पोजेटिभ देखिएपछि शहरमा आतंक फैलिएको छ। कलबुर्गीका कमिस्नर शरत बीका अनुसार चार अन्य शंकास्पद बिरामीहरुको प्रतिवेदन आउन बाँकी रहेको छ।
शरतका अनुसार शहरका केही जिल्लामा सार्वजनिक र नीजि यातायात सेवा सीमित भएका छन्। यसअघि यी सेवाहरु बन्द गर्ने भनिएको थियो। पहिलो पीडित व्यक्तिको सम्पर्कमा आएको ७१ जना र पछि सम्पर्कमा आएका सय २ सय ४३ मानिस पत्ता लगाएपछि राज्य सरकारले लकडाउन गर्ने निर्णय गरेको उनले बताए। यसपछि जिल्लामा सार्वजनिक बिदा दिइएको र त्यसका लागि मस्जिदहरुको पनि सहयोग लिइएको शरतले बताए। मृत्यु भएका बिरामीसँग सम्पर्कमा आएका ५ सय १६ जनालाई घरमै राखेर निगरानी भइरहेको कमिस्नर शरतले बताए।
कोरोना भाइरसका कारण महाराष्ट्रको नासिक र नागपुरमा धारा १४४ लागू गरिएको छ। तर कलबुर्गीमा यस्तो केही नगरीपनि सबै शहर बन्द रहेको छ। १९९३ पछि पहिलो पटक उक्त शहरको हालत कर्फ्यूजस्तो भएको हो। स्वास्थ्य एवं परिवार कल्याण विभागको अतिरिक्त मुख्य सचिव जावेद अख्तरले लकडाउनको फैसला सरकारको भएपनि कोरोना संक्रमण नफैलियोस् भनी सर्तकता अपनाइको उनले बताए।
उनका अनुसार १९९३को दंगापछि कहिल्यै पनि यो शहर बन्द भएको थिएन। तर अहिले कर्फ्यूबिनै सुनसानको अवस्थामा छ कलबुर्गी।
भारत दोस्रो स्टेजमा
इन्डियन काउन्सिल अफ मेडिकल साइन्स एण्ड रिर्सचले भारत कोरोना भाइरसको संक्रमणको दोस्रो स्टेजमा रहेको बताए। विदेशबाट आएका व्यक्तिबाट संक्रमण फैलिएपछि उनीहरुको उपचार भइरहेको र उनीहरुबाट संक्रमण भएका व्यक्तिको बारेमा १४ दिनसम्म घरमा राख्ने र उपचार गर्ने काम भइरहेको जनाइएको छ।
यदि तेस्रो स्टेजमा पुग्ने हो भने सबै स्थानीयमा यो फैलँदै जाने भएकाले कलबुर्गी शहर स्वतः रुपमा लकडाउन भएको हो। भारतका हालसम्म १ सय ७७ जनामा कोरोना भाइरस देखिएको छ।
तीन जनाको मृत्यु भएको छ। हालसम्म महाराष्ट्रमा सबैभन्दा धेरै ४७ जनामा संक्रमण पाइएको छ। केरलामा २५ र उत्तर प्रदेशमा १९ जनामा कोरोना भाइरस संक्रमण भएको पाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
