काठमाडौं- कोभिड–१९ को त्रासका कारण अहिले दैनिक उपभोग्य वस्तुको आपूर्तिमा बजारको अवस्था असहज बन्दै गएको छ। खाना पकाउने ग्यास, मास्क र सेनिटाइजरमा अभाव देखिइसकेको छ।
खाद्यान्नलगायत दैनिक उपभोग्य वस्तुको माग बढेका कारण आपूर्ति सहज छैन। केही वस्तुमा कृत्रिम अभाव सिर्जना गरी मूल्य वृद्धि देखिन थालेको छ।
तर सरकारी निकायको अनुगमन भने दैनिक उपभोग्य वस्तुका क्षेत्रमा नभई अन्यत्रै केन्द्रित छ। औषधि पसल, खाद्यान्न तथा ग्यास पसल, पेट्रोल पम्पमा केन्द्रित गर्नुपर्ने बजार अनुगमन फेसियल हाउस र ब्युटी पार्लरमा भइरहेको छ।
बजार अनुगमनको जिम्मा पाएको वाणिज्य, आपूर्ति तथा हित संरक्षण विभागले बुधबार काठमाडौंका ६ वटा श्रृंगार पसलमा अुनगमन गर्यो। ६ मध्ये ५ लाख कारबाही स्वरुप आर्थिक जरिवाना पनि गराइयो।
काठमाडौं मलका २ वटा पसल फेसियल हाउस र रश्मिलाज फेसियल हाउस एण्ड ब्युटी केयर लाई २–२ लाख रुपैयाँ जरिवाना गरियो। काठमाडौं मलकै बाँकी ३ वटा पसललाई ५–५ हजार रुपैयाँ जरिवाना गरियो।
वाणिज्य, आपूर्ति तथा उपभोक्ता संरक्षण विभागका सह प्रवक्ता दीपकराज पोखरेल उपभोक्ताको गुनासो आएका कारण ब्युटी पार्लर र श्रृंगार पसलमा अनुगमन गरिएको बताउँछन्। बुधबार काठमाडौंका अरु विभिन्न क्षेत्रमा ग्यास पसल र पेट्रोल पम्पमा पनि अनुगमन भएको उनको भनाइ छ।
विभागका अनुसार बानेश्वरको एउटा पेट्रोल पम्प, कीर्तिपुर र पाँगाका विभिन्न खाद्य किराना र ग्यास पसलमा अनुगमन भएको छ। विभागले बुधबार ३ वटा टोली खटाएर अनुगमन गरेको थियो। जसमध्ये एउटा टोली काठमाडौं मलका फेसियल हाउस र ब्युटी पार्लरको अनुगमनमा खटिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791562069.png)
