काठमाडौं–काठमाडौं उपत्यकाको विद्युत वितरण प्रणाली अत्याधुनिक र प्रविधिमैत्री बनाउन नेपाल विद्युत प्राधिकरणले गत फागुन ४ गतेबाट सुरु गरेको भूमिगत वितरण प्रणाली निर्माणको काम द्रुत गतिमा भईरहेको छ। प्राधिकरणका अनुसार अहिले बुढानीलकण्ठ क्षेत्रको काममा उल्लेख्य प्रगति देखिएको छ।
काठमाडौं उपत्यका वितरण प्रणाली सुदृढीकरण आयोजना प्रमुख अभिषेक अधिकारीका अनुसार अहिले बुढानीलकण्ठ क्षेत्रलाई बढी प्राथमिकतामा राखेर काम भईरहेको छ भने चक्रपथ, चपली दक्षिण (गणेशस्थान) लगायतका क्षेत्रमा पनि काम भईरहेको छ।
दैनिक ४ वटा वटासम्म मेसिन राखेर काम भइरहेको अधिकारीको भनाइ छ। ‘धमाधम काम भईरहेको छ। मेसिनहरु आवश्यकताअनुसार प्रयोग भईरहेका छन्, केबल हाल्न बाँकी छ, अप्टिकल फाईबर आउँदैछन्, जिआई पाईप जडान गर्ने काम पनि सुरु गर्दैछौं,’ उनले भने। यो क्षेत्रको वितरण प्रणाली भूमिगत बनाउन भारतीय निर्माण कम्पनी केईआई इन्ड्रस्ट्रिज लिमिटेडले ठेक्का पाएको छ।
खन्ने क्रममा खानेपानीका पाइप फुटेको र जमिनमुनि रहेका ढुंगाका कारण मेसिन भाँचिनेजस्ता समस्या देखिएको अधिकारीले बताए। ‘हामीले काम गर्दा खानेपानीमा केही समस्या देखिएको छ। यसका कारण काम रोकिने भन्ने त होइन तर केही ढिला हुन्छ,’ उनले भने।
सडक खन्ने क्रममा खानेपानीका पाइप फुट्दा ठेकेदार कम्पनीले नै बनाउने गरी प्राधिकरणले सम्झौता गरेको थियो।
उपत्यकाको विद्युत वितरण प्रणाली निकै अस्तव्यस्त रहेका कारण प्राधिकरणले उच्च प्रविधियुक्त भूमिगत र स्वचालित विद्युत वितरण प्रणाली निर्माण सुरु गरेको हो। एसियाली विकास बैंकको आर्थिक सहयोगमा ३२ महिना अवधिमा सम्पूर्ण काम सक्नेगरी पहिलो चरणमा रत्नपार्क वितरण केन्द्र र महाराजगन्ज वितरण केन्द्र जोड्ने गरि भूमिगत विद्युत प्रसारण प्रणाली निर्माण हुँदैछ।
सडक खन्दा ‘होराइजेन्टल डाइरेक्सनल ड्रिलिङ’ प्रविधि अपनाईएका कारण सडकमा खाल्डाखुल्डी र हिलो धुलोको समस्या छैन। रातिमात्रै काम भइरहेका कारण सवारी जामको समस्या पनि देखिएको छैन।
रत्नपार्क वितरण केन्द्रअन्तर्गत बागबजार, न्यूरोड, ठमेल, त्रिपुरेश्वर, सिंहदरबार, अनामनगर, लाजिम्पाट, एयरपोर्ट, चाबहिल जोरपाटीलगायत स्थानमा करिब २ सय किलोमिटरमा ११ हजार भोल्टेजको भूमिगत लाइन तथा करिब ४ सय किलोमिटर ४ सय भोल्टेजको भूमिगत वितरण लाइन निर्माण हुँदैछ।
योसँगै करिब २ किलोमिटर अप्टिकल फाइबर पनि भूमिगत गरिनेछ। त्यस्तै महाराजगञ्ज वितरण केन्द्रअन्तर्गत सामाखुुसी, बालुवाटार, बुढानीलकण्ठ, टोखा, गोंगबु, महाराजगन्जलगायत स्थानहरुमा करिब २ सय ५० किलोमिटर ११ हजार भोल्टेज र करिब ४ सय किलोमिटर ४ सय भोल्टेजको भूमिगत लाइन निर्माण गरिनेछ।
यो वितरण केन्द्रभित्र पर्ने स्थानमा २ सय ५० किलोमिटर अप्टिकल फाइबर भूमिगत बनाइनेछ।
पहिलो चरणमा काठमाडौं उपत्यकामा उच्च प्रविधियुक्त भूमिगत वितरण प्रणाली लागू गर्ने र बिस्तारै अन्य महानगरपालिका र उपमहानगरपालिकामा पनि भूमिगत सँगसँगै स्वचालित वितरण प्रणाली र स्मार्ट मिटर कार्यान्वयनमा ल्याइनेछ। यस्तै, उपत्यकाबाहिर विराटनगर, वीरगञ्ज, पोखरालगायत प्रमुख सहरमा भूमिगत प्रणालीबाट विद्युत वितरण गरिने योजना रहेको प्राधिकरणले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749979333-1749983311.jpg)
-1749801778.jpg)
-1749797959.png)
-1749826086.png)
