कोरोना तयारी : समन्वय समिति गठन भएनन् सप्तरीका स्थानीय तहमा

समाचार

दिनेश शर्मा सोमबार, चैत ३, २०७६ १३:३५

राजविराज–सरकारले कोरोना भाइरसको संक्रमण रोकथाम तथा आवश्यक तयारीका लागि प्रत्येक स्थानीय तहमा ‘समन्वय समिति’ गठन गर्न निर्देशन दिए पनि सप्तरीमा भने त्यसको कार्यान्वयन भएको छैन। ९ नगरपालिकासहित १८ स्थानीय तहमध्ये हालसम्म सुरुङ्गा र कञ्चनरुप नगरपालिकाले मात्रै समिति गठन गरेका छन्।

स्वास्थ्य तथा जनसंख्या मन्त्रालयले गत फागुन २८ गते संघीय मामिला तथा सामान्य प्रशासन मन्त्रालयमा पत्र पठाएर स्थानीय तह र वडास्तरमा समन्वय समिति गठनको व्यवस्था मिलाउन आग्रह गरेको थियो। स्थानीय तहमा सम्बन्धित स्थानीय तहका प्रमुख र वडास्तरमा वडाध्यक्ष वा निजले तोकेको जनप्रतिनिधि संयोजक रहने गरी समिति गठन गर्ने व्यवस्था छ।

शम्भुनाथ नगरपालिकाले आज सोमबार वस्ने कार्यपालिकाको बैठकबाट समन्वय समिति गठन गर्ने तयारी गरेको छ भने अग्निसाईर कृष्णा सवरण गाउँपालिकाले मंगलबारको गाउँसभावाट समिति गठन गर्ने गाउँपालिका अध्यक्ष पर्शुराम यादवले बताए। यसैगरी राजगढ गाउँपालिकाले बुधबार समिति गठन गर्ने तयारी गरेको अध्यक्ष परमानन्द यादवले जानकारी दिए।

अन्य स्थानीय तहमा भने समिति गठनको विषय प्राथमिकतामा परेको छैन।

प्रचारप्रसार र जनचेतना

स्थानीय तहहरुमा कोरोना भाईरस सर्न सक्ने अवस्था र रोकथामका उपायका विषयमा प्रचारप्रसार सुरु भएका छन्। जानकारीमुलक पोस्टर टाँस्ने तथा पम्प्लेटहरु वितरण गर्ने कार्यक्रम चलाईएको छ।

कञ्चनरुप नगरपालिकाले गत शुक्रबार सरोकारवालाहरुसँग अन्तरक्रिया गरेको छ भने सोमबारदेखि वडास्तरीय कार्यक्रम सुरु गरिने मेयर वसन्त मिश्रले बताए। वडा समन्वय समिति गठन र चेतनामुलक कार्यक्रम एकसाथ अघि बढाउने नगरपालिकाको स्वास्थ्य शाखाका डम्वर गुप्ताले वताए।

यसैगरी सप्तकोसी नगरपालिकाले ११ वटै वडाका मुख्य चोकमा पोष्टर टाँगेको छ भने विद्यालयहरुमा पम्प्लेट वितरण गर्ने योजना बनाएको छ। नगरका सम्पूर्ण स्वास्थ्यकर्मी परिचालन गरिएको र गाउँ–गाउँमा गएर चेतनामुलक कार्यक्रम गर्ने तयारी भईरहेको स्वास्थ्य शाखा संयोजक महेशकुमार यादवले बताए।

यसैगरी राजविराज, हनुमाननगर कंकालिनी, वोदेवरसाईन, खडक नगरपालिकासहित अधिकांश स्थानीय तहले प्रचार प्रसारलाई अघि वढाएका छन् ।

तर, कतिपय सरोकारवालाले भने विश्वब्यापी समस्याको रुपमा रहेको कोरोनाका विषयमा स्थानीय तहहरु सम्वेदनशिल हुन नसेको आरोप लगाएका छन् । गैरसरकारी संस्था महासंघ सप्तरीका अध्यक्ष शम्भुनन्द चौधरीले शनिवारसम्म १ सय ४९ देशमा फैलिएको र ५ हजार ७ सय ९८ जनाको मृत्युको कारण वनेको कोरोनाका विषयमा स्थानीय तहले अपेक्षित काम गर्न नसकेको वताए । ‘नागरिकको सुरक्षाका सवालमा जनप्रतिनिधिहरु जसरी जागरुक हुनु पर्ने हो, त्यो देखिएको छैन’ उनले भने, ‘स्थानीय तहको सम्वेदनशीलता अपेक्षा गरेअनुसार छैन। समय छँदै आवश्यक तयारी गर्नु पर्ने हो, त्यो देखिएको छैन ।’

जिल्ला विपद व्यवस्थापन समितिको बैठक बस्दै

नोवल कोरोना भाईरस संक्रमण रोकथाम तथा आवश्यक तयारीका लागि मंगलवार जिल्ला विपद ब्यवस्थापन समितिको बैठक बोलाईएको छ। बैठकले संक्रमण रोकथाम र सम्भावित समस्या सामाधानका लागि आवश्यक निर्णय गर्ने समितिका संयोजक तथा सप्तरीका प्रमुख जिल्ला अधिकारी सुनील खनालले बताए ।

कोरोना भाईरसकै विषयमा सोमबार जनकपुरमा प्रदेशस्तरीय बैठक परेकाले जिल्लास्तरीय बैठक मंगलबारका लागि बोलाईएको उनले बताए। सीमा क्षेत्रका अत्यावश्यक ठाउँमा स्थानीय तह र जिल्ला स्वास्थ्य कार्यालयको समन्वयमा हेल्थ डेस्क स्थापना भएकाले त्यसको प्रभावकारीताका विषयमा पनि अनुगमन र मुल्यांकन भईरहेको उनको भनाई छ ।

गजेन्द्रनारायण सिंह अस्पतालमा आइसोलेसन वार्ड

राजविराजस्थित गजेन्द्रनारायण सिंह अस्पतालमा २ वटा आइसोलेसन बेड स्थापना गरिएको छ। कोरोनाका शंकास्पद संक्रमितलाई राखेर निगरानी गर्न आइसोलेसन बेड स्थापना गरिएको अस्पतालले जनाएको छ। शिशु वार्ड खाली गरी बनाईएको आइसोलेसन बेडका कारण केही स्वास्थ्यकर्मी भने त्रसित भएका छन् ।
बिरामी, कुरुवा र स्वास्थ्यकर्मी ओहोरदोहोर गर्ने बाटोमै आईसोलेसन बेड तयार गरिएकाले संक्रमण फैलन सक्ने उनीहरुको आशंका छ ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।