धनगढी- धनगढी उपमहानगरपालिकाले योजनाबद्ध विकासका लागि प्रोजेक्ट बैंक स्थापनाको तयारी गरेको छ। आइतबार धनगढीमा आयोजना गरिएको विकास सम्मेलनमा धनगढी उपमहानगरपालिकाले प्राथमिकीकरणका चार क्षेत्रका छवटा विषयमा बृहत छलफल गरी प्रोजेक्ट बैंक तयार गरेको छ।
सम्मेलनमा सामाजिक, आर्थिक, पूर्वाधार विकास र वातावरणको संरक्षणका क्षेत्रमा मुख्य प्रोजेक्ट बैंकहरू प्रस्तुत गरिएका थिए। प्यानल छलफल र सहभागीहरूको सुझाव लिएर कार्यपत्रहरूलाई पूर्णता दिइएको थियो। सम्मेलनबाट आएका सुझाव र कार्यपत्रलाई आधार बनाएर विश्लेषणसहितको प्रतिवेदन तयार गर्ने र सोही विषयलाई समेटेर प्रोजेक्ट बैंक तयार गर्न सम्मेलनले सुझाव दिएको छ।
सम्मेलनमा भूषण बिष्टले सूचनाप्रविधीका माध्यमबाट नागरिकलाई दिने सोवालाई कसरी सुदृढीकरणगर्न सकिन्छ भन्ने बिषयमाकार्यक्रम प्रस्तुत गरेका थिए। बिनोद उपाध्यायले धनगढीको शुसासनलाई कसरी सुदृढीकरण गर्न सकिन्छ भन्ने बिषयमाकार्यपत्र प्रस्तुत गरेका थिए।
त्यसैगरी नारायण खनालले धनगढीलाई दिगो र बस्न योग्य कसरी बनाउन सकिन्छ भन्ने बिषयमा कार्यपत्र प्रस्तुत गरेका थिए। डाक्टर ढुण्डीराज पाठकले फोहर ब्यबस्थापन सम्वन्धी, डाक्टर राजेन्द्रवीर चन्दले र डाक्टर नारायणप्रसाद पासकोटाले स्थानीयतहको आर्थिक अवस्थाका बारेमा कार्यपत्र प्रस्तुत गरेका थिए।
धनगढी विकास सम्मेलन धनगढीको विकासका लागि कोषेढुंगा हुने राष्ट्रिय योजना आयोगका सदस्य सुशिल भट्टले बताए। ‘स्थानीयतहले गरेको यो पहिलो प्रयास हो,’ उनले भने, ‘यसले धनगढी उपमहानगरपालिकालाई मार्ग दर्शन गर्ने छ।’ उनले राष्ट्रको विकासका लागि योजनाबद्ध ढंगले अघि बढ्नुपर्ने बताए। ‘हामी अहिले स्रोतको पहिचान बिनै विकासको योजनाहरु कार्यान्वयन गरिरहेका छौं,’ उनले भने, ‘यसले राम्रो परिणाम दिएको छैन। कार्यान्वयन योग्य योजना तयार नभएसम्म कार्यान्वयन चरणमा लग्न हुँदैन।’
सदस्य सुशिलले राष्ट्र विकासका लागि सबैमा छटपटी र हुटहुटी हुन आवश्यक रहेको बताए। उनले आयोजना चक्र व्यवस्थापनको सिद्धान्तका आधारमा राष्ट्रिय योजना आयोग अघि बढेको जनाए। धनगढी उपमहानगरपालिका प्रमुख नृपबहादुर वडले सम्मेलनले दिएको म्यान्डेटका आधारमा प्रोजेक्ट बैंक बनाउने बताए। 'यसलाई कार्यपालिकामार्फत नगरसभामा लगिने छ’, नगरप्रमुख वडले भने. 'आवश्यक परेमाकानुन समेत बनाएर अगाडी बढीने छ। यसैलाई टेकेर नगरले छोटो तथा लामो समयका योजना बनाउने छ।'
धनगढी उपमहानगरपालिकाका उपप्रमुख सुशीला मिश्रभट्टले धनगढीका लागि विकास सम्मेलन पहिलो अभ्यास भएको बताइन्। उनले भनिन्, 'यस सम्मेलनले हामीलाई दिशानिर्देश गरेको छ। त्यसैका आधारमा अगाडी बढ्ने छौं।'
सुदूरपश्चिम विश्व विद्यालयका पूर्व राजिष्टार डाक्टर हेमराज पन्तले धनगढीले गरेको विकास सम्मेलन ऐतिहासिक भएको बताए। उनले भने, 'यसले धनगढी उप–महानगरपालिकालाई कसरी अगाडी बढ्ने भनेर निर्देशित गरेको छ।' कार्यक्रममा सामाजिक, आर्थिक, वातावरण, उद्योग, पर्यटनका साथै राष्ट्रिय अन्तराष्ट्रिय गैरसरकारी संस्थाका प्रतिनिधीहरूको उपस्थिति थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
