काठमाडौं- दोस्रो बजारमा सुधार आए सँगै नेपाल स्टक एक्सचेन्ज (नेप्से)ले कारोबार समय थप गर्ने तयारी गरेको छ। कारोबार समय थप गर्न सिडिएससीको सफ्टवेयरमा केही परिवर्तन गर्नु पर्ने भएकोले यसको आवश्यक प्रक्रिया अगाडि बढाइने नेप्सेका प्रमुख कार्यकारी अधिकृत चन्द्रसिंह साउदले जानकारी दिए।
कारोबार सयम थप गर्न सिडिएससीको प्रणालीमा केही परिवर्तन गर्नुपर्छ। सिडिएससीको सफ्टवेर परिवर्तन गर्न सफ्टवेयर निर्माता भारतको 'टिसिजी' लाई तीन महिना अगाडि नै जानकारी गराउनु पर्ने व्यवस्था छ।
कारोबार समय थप गर्न नेपाल धितोपत्र बोर्डबाट सैद्धान्तिक स्वीकृति पाएपछि नेप्सेले टिसिजीलाई जानकारी गराउने साउदले जानकारी दिए। धितोपत्र बोर्डले आइतबार पत्र काटेर नेप्सेलाई 'कारोबार समय थप गर्न केके गर्नु पर्छ' भन्दै पत्राचारसमेत गरेको छ। कारोबार समय थप गर्ने विषयका साथै प्राविधिक प्रक्रिया अगाडि बढाउनुपर्छ भन्दै सोधिएको बोर्डका प्रवक्ता निरज गिरीले जानकारी दिए।
बोर्ड र नेप्सेबीचमा कारोबार समय थप गर्ने विषयमा आपसी सहमति भइसकेको बुझिएको छ। बोर्डका अध्यक्ष भीष्मराज ढुङ्गानाले नै समय थप गर्नु पर्ने बताउँदै आएका थिए। उनैको पहलमा समय थप हुन लागेको हो।
दोस्रो बजारमा लगातार कारोबार रकम बढ्न थालेपछि नेप्से र बोर्डले समय थप गर्न पहल सुरु गरेका हुन्। अहिलेकै अवस्थामा यति सानो बजारमा कारोबार रकम थप गरिहाल्नु पर्ने अवस्था नभएको नेपाल सेयर लगानीकर्ता संघका अध्यक्ष उत्तम अर्यालले बताए। सयम थप गर्नु पर्ने विषय बहसको विषय भएकाले सम्पूर्ण स्टेक होल्डर र लगानीकर्तासँग छलफल गरेर मात्रै अगाडि बढाउनु पर्ने उनले बताए।
'यो समय सबैका लागि उपयुक्त थियो। समय थप गर्दा केही लामो हुन्छ। हाम्रो नेपालको मार्केटमा यति छिटै समय थप गर्नु पर्ने देखिएको छैन,' उनले भने।यसका लागि लगानीकर्ता र स्टेक होल्डर सँग छलफल गरेर मात्रै अगाडि बढाउनु पर्ने नेपाल शेयर लगानीकर्ता संघका अध्यक्ष उत्तम अर्यालले बताए।
समय थप गर्ने विषय स्वागत योग्य भए पनि अहिलेको राफसाफ प्रणालीमा भने सुधार ल्याउने पर्ने नेपाल इन्भेस्टर फोरमका उपाध्यक्ष छोटेलाल रौनियारले बताए। अहिलेकै अवस्थामा धेरै लगानीकर्ता क्लोज आउटमा पर्ने समस्या छ उनले भने यदि समय मात्रै थप गरियो भने लगानीकर्ता थप मारमा पर्ने छन्।
बजारको विस्तारसँगै कारोबार समय भने थप गरिनु पर्ने उनको तर्क छ। पहिला पनि तीन घण्टाबाट ४ घण्टा पुर्याइएको थियो। अब ५ घण्टा कारोबार गर्न पाउदा लगानीकर्तालाई सजिलो हुने रौनियार बताउछन्। तर राफसाफ प्रणालीलाई भने पुर्ण रुपमा डिजिटलाइज गर्नु पर्ने उनको माग छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
